Mavingu 29:3 - Bhiblia Yo Sawuleka

³ M'thu wule a randako wutxhari, a tsakisa tate wakwe, kambe mngana wa magelegele, wa xakela thomba.

Mavingu 29:3 Referans Kwoze

Mavingu 27:11

Txhariha mwanangu, u tsakisa mbilu yangu, kasiku ni mana txokari txo xamula ka wule a no ni txhipisa.

Luka 15:30

Aniko a wuyile mwanana wu wako, a nga xakela suma sako ni magelegele, se ene u m'dayete dirole do nona!’

Mavingu 15:20

Mwanana wo txhariha a tsakisa tate wakwe, aniko m'thu wo mbi engisa mlayo a eyisa mwamwakwe.

Mavingu 10:1

Ndiya Mavingu a Solomoni. Mwanana wo txhariha a tsakisa tate wakwe, aniko mwanana wu i ku txiphukuphuku i xomulo ka mwamwakwe.

Luka 15:13

Msana ka masikuanyana madotho, awu wa mnanda a to pakela thundu yakwe, e khukha a txi tsula ka ditiko da kule, a txi ya hangalasela thomba yakwe, ngu kuhanyisa ku ambi ti pimela.

Mavingu 28:7

Awule a veketako mlayo, mwanana wo txhariha, aniko mngana wa vale va lidyo, wa thela tingana tate wakwe.

Mavingu 6:26

Nguko wamsikati wa wugango, wa hoka ku kukombela hambi dipawu da didotho; kambe digelegele, di tsimbila di lava wutomi wa wunene.

Mavingu 21:17

Awule a randako ku ti tsakisa a na mana kukelelelwa; awule a randako vhinya ni mafura, kha na mbi dhuka e va ni thomba.

Mavingu 28:19

Awule a dimako mafu akwe, a na khura ngu sakudya, kambe wule a londetelako ta walo, a na talelwa ngu wusiwana.

Mavingu 23:15

Mwanangu, ngako mbilu yako yi di txharihile, yangu mbilu koko yi na tsaka, ina, mbilu yangu yipune.

Mavingu 21:20

Thomba ya yinene ni mafura siho nyumbani ka txhari, aniko wamwamna wo mbi pfisisa wa yi hangalasa.