Mavingu 19:23 - Bhiblia Yo Sawuleka

²³ Kuthava Mkoma ka yisa kuhanyani; awule a mthavako a na enelelwa, kambe kha na mbi telwa ngu dikhombo ni da dimwedo.

Mavingu 19:23 Referans Kwoze

Matewu 5:6

Va katekile ava va ku ni nzala ni ditora da wululami, nguko va na khuriswa!

Mavingu 12:21

Kha ku na txikarato ni txa tximwetxo txi nota ka wo lulama, aniko vaonhi va taletwe ngu wubihi.

Masalmo 90:14

Hi khurise ngu lirando lako i di ngadi mixo kasiku hi na tsaka, hi embelela ka otshe masiku a kuhanya kwathu.

1 Timoti 4:8

Nguko ku ti toloveta ka mithumo ya mmidi kuvhuna ka kudotho, kasi ku ti toloveta ka mithumo ya wukhongeli kuvhuna ka totshe, nguko ku na ni txithembiso txa wutomi wa konkuwa ni wa mbimo yi yi tako.

Mavingu 10:27

Kuthava Mkoma ka engetela masiku, aniko malembe a vo biha ma na komiswa.

Masalmo 103:17

Aniko lirando la Mkoma kha li nga ni magwito ka vale va m'thavako kululama kwakwe kha ku na magwito ka liveleko ni liveleko,

Masalmo 85:9

Kha ditshuri kuhanyisa kwakwe ku hafuhi ka vale va m'thavako ni wudhumo wakwe wu na aka ditikoni kwathu.

Varoma 8:28

Athu ha tiziva ti to Txizimu txa tshanganisa sotshe si txi maha wunene ka vale va txi dhundako, avale txona txi nga va dhana ngu kuranda ka txona.

Malakiya 4:2

Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

Masalmo 91:16

Ni na mninga kuhanya masiku amangi, kambe ni na mkomba kuhanyisa kwangu.”

Masalmo 25:13

Moya wakwe wu na zumbiseka kwati ni liveleko lakwe li na mana ditiko di di nga thembiswa.

2 Timoti 4:18

Mkoma a na ni hulusa ni ka yotshe mithumo yo biha; a na ni ponisa kasiku e ni yisa ka Mfumo wakwe wa nzumani. Kupfaliswa ku nave kwakwe ngu malembe ni malembe. Amen.

Masalmo 19:9

Kuthava Mkoma ngunene; ka simama yotshe mbimo. Kulamula ka Mkoma nga ditshuri kambe ku lulamile yotshe mbimo.

Mithumo 9:31

Hambi keto, Dibanza di ti ni kuthutha ka dotshe ditiko da Judheya ni da Galileya ni da Samariya, di txi kula, di txi hanya ngu kuxonipha Mkoma, di txi anda ngu kuvhunetelwa ngu Moya wo Sawuleka.

Masalmo 91:10

Khu na mbi manwa ngu dikhombo ni da dimwedo, hambi mtungu ni wawumwewo kha wu na mbi hoka ditendani kwako,

Mavingu 11:19

Nga kule wululamo wu yisako kuhanyani, ngu toneto awule a londisako to biha wa ti yisa kufani.

Mavingu 19:22

Dibhindu da m'thu ngu tile a ti navelako; kambe txisiwana i txhuko kupinda wa makuhu.

Mavingu 3:24

Mbimo yi u no otela, khu na mbi thava; ngako u txi na otela, ni wukohe wako wu na va wo tsakisa ka wusiku wotshe.

Mavingu 22:4

Hakhelo ya kutinamisa ni kuthava Mkoma, ndithomba, ni wudhundo, ni wutomi.