Mavingu 18:10 - Bhiblia Yo Sawuleka

¹⁰ Ditina da Mkoma dinera do tsana, mlulami a na tutumela ka dona, eya ti khongelela a di txitimwi.

Mavingu 18:10 Referans Kwoze

2 Samuwele 22:3

Txizimu dirigwi dangu, ni na themba ka txona. Txitxhangu txangu, ni mtamo wa kuhanyiswa kwangu, dikhokhola dangu ni wuthavelo wangu. Awe Mhanyisi wangu, u ni hanyisile ka vale va ni xanisako.

Masalmo 91:2

Ni na khani: Mkoma Ngene Txizimu txangu, mbuthavelo wangu, mkhokhola wangu, ni na themba kwakwe!

Isaya 26:4

Thembani Mkoma ngu ha ku si gwitiko, nguko Mkoma Txizimu, dirigwi da yotshe mbimo.

Masalmo 144:2

Ene i Mthaveleli wangu, mkhokhola wangu, wuthavelo wangu; ngena mtiruli wangu ni m'vhikeli wangu, awu ni thembako kwakwe; ngene a ni ningako mtamo wa kufuma vathu.

Masalmo 27:1

Mkoma ngene kuwoninga kwangu ni kuhanyisa kwangu. Ni nga thava mani kani? Mkoma i mkhokhola wa kuhanya kwangu. Ni nga dhukiselwa ngu mani kani?

Masalmo 18:2

Mkoma, dirigwi dangu, ni mkhokhola wangu wo tsana, kambe mtxhatxhisi wangu; Txizimu txangu mkhokhola wangu, buthavelo wu ni thembako wona; njitxhavangu txangu, mtamo wa kuhanyiswa kwangu, wuthavelo wangu wa hombe.

Genesisi 17:1

Mbimo yi Abramu a nga va ni tanga ya mtxhanu ni mune wa magumi ni mtxhanu ni mune a malembe, Mkoma a to humelela masoni kwakwe, a txi khene: “Ani ni Txizimu txa Mtamo-Wotshe, u fanete kuhanya masoni kwangu, u txi ni engisa ngu kuhetiseka.

Mtuletelo 1:8

Ani ngani Alfa ni Omega, kha Mkoma Txizimu, awu a kuho, awu a nga ti ho, awu a tako, awu i ku nyamne wa mtamo.

Matewu 1:23

“Wotuma a na mana txirumbu e veleka mwanana wa m'zambi, awu a no raywa ditina daku i Emanuweli, (Emanuweli, ati ti wombako ku ‘Txizimu txi na ni nathu.’ ”)

Isaya 9:6

Nguko hi veleketwe mfana, hi ningilwe mwanana wa mfana; se wukoma wu txitimwi ka makata akwe; ditina dakwe a na dhanwa ku Didhota do Xamalisa, Txizimu txa Mtamo, Tate wa Mbimo Yotshe, Mkoma wa Kudikha.

1 Samuwele 30:6

Se Dhavhidha a to henya ngutu, nguko vathu va ti ti womba-womba ngu kulava ku m'balisela ngu marigwi, nguko timbilu ta vathu votshe ti ti kuxanisekani, mmwani ni mmwani ngu mhaka ya vanana vakwe va majaha ni vamahorana; hambi keto Dhavhidha a to tsana ka Mkoma, Txizimu txakwe.

Jeremiya 23:6

Judha a na hanyiswa ka masikuyo akwe, ni Israyeli a na zumba ngu kuthutha. Ndide ditina dakwe di a no dhanwa ngu dona: “Mkoma ngene kululama kwangu.”

Masalmo 91:14

Nguko Txizimu txi kha txona: “Ni na hulukisa vale va ni randako, ni na va vhikela, nguko va ni ziva ti to ni Mkoma.

Habhakuki 3:19

Mkoma Txizimu ngene mtamo wangu, se a na maha ti to mikondo yangu yi txi nga ya mhunti, a na ni maha ni tsimbila ka makhalo o guleka. (Ka muembeleli ni ka sivetaveta sangu sa tindando.)

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

2 Samuwele 22:51

Ene ngene i ku txitezi txa kuhanyisa ka mfumeli wakwe, kambe a komba lirando ka wule wo totwa wakwe, ka Dhavhidha ni ka liveleko lakwe, kala kupinduka.

Genesisi 32:11

Na ku kombela, ni lamulele manzani ka mkomwangu Esawu, nguko na m'thava, ati to a nga thuka a txi ta e ta hi daya, ani ni vamame, ni vanana.

Eksodha 6:3

Ni humelete ka Abrahamu, ka Isaake ni ka Jakobe ni di Txizimu txa Mtamo-Wotshe; aniko ngu ditina dangu, ani Mkoma, kha na ti zivekisa ngu dona.

2 Samuwele 22:2

A to khene koko: Mkoma dirigwi dangu, ni wukhalo wangu wo tsana, ni mtxhatxhisi wangu.

Mavingu 14:26

Mndani ka kuthava Mkoma ku ni themba yo tsana, kambe ku nava wuthavelo wa vanana vakwe.

Mavingu 29:25

Dijowa da m'thu di na riya milawu, kambe awule a thembako ka Mkoma, a na vekwa ka wukhalo wo guleka.

1 Samuwele 17:45

Kambe Dhavhidha a to khene ka Mufilista: Awe uta kwangu wu di ni ditxhari, ni mseve, ni txivhikelo; kambe ani ni ta kwako ngu ditina da Mkoma wa Mabutho a Tiyimbi, i ku Txizimu txa Mabutho a Tiyimbi a ka Israyeli, awule wu mruketelako.

Masalmo 20:2

Txizimu txi na ku rumele txivhuno txi di Nyumbani ka txona, txi kuxayisa txi di Siyoni.