Mavingu 10:22 - Bhiblia Yo Sawuleka

²² Txikatekiso txa Mkoma ngu txona txi ningako thomba ka m'thu, kambe ene kha na kuengetela txilo.

Mavingu 10:22 Referans Kwoze

Masalmo 107:38

Se Mkoma a to va katekisa a txi va andisa ngutu asi hunguli mtengo wa sihari sawe sa sifuyo.

Genesisi 26:12

Isaake a dimile e phaya ka ditiko dile, se a txi elula ka dona dilembe dile, so pinda ngu 100 ka sile a nga phaya, nguko Mkoma a mkatekisile.

Genesisi 24:35

Mkoma a katekisile ngutu nyamne wangu, e maha nyatithombe wa hombe: A mningile tinvuta ni tihomu, silivhela ni nzalama, sithumi sa txiwamna ni sa txisikati, makamelu ni timbongola.”

Genesisi 12:2

Ni na maha lihunzu la hombe ngu ngawe; ni na kukatekisa, ni kuninga ditina da hombe, uva ditshina da makatekwa.

Masalmo 37:22

Avale Mkoma a nga va katekisa va na mana mafu, aniko avale a nga va singitela va na fuviswa.

Mavingu 20:21

Thomba yo yi mana ngu txikuluveta kukhatani, magwito a kona kha ma nga ni kukateka.

Genesisi 13:2

Abramu a ti ni sifuyo ngutu, ni silivhela ni nzalama.

Mavingu 28:22

Awule a ku ni diso do biha, a tutumela tithomba, kambe kha ti zivi taku wusiwana wu nata kwakwe.

Zakariya 5:4

Aniko txiruko txiya, ni na txi tisa, kuwomba Mkoma wa Mabutho a Tiyimbi, se ni na txi wuleta nyumbani ka dikhamba, ni nyumbani ka wule a xambanyako makuhu ngu ditina dangu; txi na zumba wusiku wothse nyumbani kwakwe, kambe txi na heta mapulango a yona, ni marigwi a kona.

Genesisi 14:23

ti to kha ni na mbi teka txilo txi txi kulumbako, hambi ndrima, mwendo ngoti yo sunga ngu yona tikathula. Nguko u nga thuka u womba ku khawe ni humelelisile Abramu.

Joxuwa 6:18

Aniko anu ti woneleni ka so yila, kasi ku mi si ti nyenyezisi ngu ku si teka, se mi txi tisa dikhombo wugoveloni ka Israyeli, ku txi ta fuviswa.

1 Vafumeli 21:19

Se tsula u txi ya m'gela ku khawe: Mkoma a womba tiya: Ina mwendo khu ngo m'daya u txi teka thomba kani? U na m'gela kambe ku khawe: Mkoma a womba tiya: Ka wukhalo wule timbwa ti nga danzela mnoha wa Nabhote, timbwa ti na danzela ni wako mnoha, ina mnoha wako kha ditshuri.

Genesisi 26:13

Ene a to khata kuhumelela e simama a txi kula kala kuza e maha nyatithombe wa hombe.

Dhewuteronome 26:10

Se wona taku, ni tisile mihando yo khata ya mafu awa u nga ni ninga, awe Mkoma.” Sekoko u na yi veka masoni ka Mkoma, Txizimu txako, kambe u na khizama masoni ka Mkoma Txizimu txako.

Dhewuteronome 28:11

Mkoma a na andisa sihiwa sa mihando ya mndani kwako, ni sa mihando ya thembweni kwako, ka ditiko di Mkoma a nga xambanya ka vatate vako ti to va na kuthava.

2 Makronika 25:9

Se Amaziya a to khene ka m'thu wa Txizmu: Hi na maha txani ngu dizana wa titalenta ta nzalama tile ni nga ninga dibutho da va ka Israyeli kani? Se m'thu wa Txizimu a to xamula, a txi khene: Mkoma a na kuninga so tala ngutu kupinda siya.

Mavingu 8:21

Kasi kumaha ti taku avale va ni randako, ve mana thomba ya kwa mbi guma, ve tata sisangala sawe.

Mavingu 14:24

M'bhoti wa titxhari ngu thomba yawe, wuphukuphuku wa siphukuphuku ngu wuphukuphuku wa sona.

Dhaniyeli 1:15

Ngako ku dipindile digumi da masiku, tikhohe tawe ti to woneka ti di tshurile ngutu, vona va ti enile ngutu kupala otshe mazambi ale ma nga ti tidya sakudya sa mfumeli.

1 Makronika 4:10

Nguko Jabhesi a to kombela ka Txizimu txa Israyeli, a txi khene: Ni katekise ngutu, u anamisa mihingano yangu, ni dianza dako di va ni nani, ni ku ni vhikela ka sikarato! Se Txizimu txi to mninga ati a nga kombela.

2 Makronika 32:27

Ezekhiya a di ni thomba yayingi ni wudhumo wa hombe; va to aka wukhalo wo veka ka wona nzalama ni silivhela ni marigwi a lisima, ni makha ni sivhikelo, ni sotshe si asi lavako.

2 Makronika 32:29

A to ti akela madhoropa e ti lavela ni tinvuta ni tihomu ta tingi ngutu, nguko Txizimu txi mningile thomba yayingi ngutu.

Masalmo 127:2

Kha ti mi vhuni txilo kuphindula ni mixo ngutu, mi txi pila mi txi thuma kala hagari ka wusiku, kufela kudya mihando ya mnyuko wanu, na kasi Txizimu, ka vale txi va randako, txa va ninga soneso, hambi va di otete.