Matewu 7:15 - Bhiblia Yo Sawuleka

¹⁵ “Ti woneleni ka vaprofeti va makuhu, va tako kwanu va di ambate madhowo a tinvuta, kasi timbiluni kwawe maxolwa ma vhandamulako.

Matewu 7:15 Referans Kwoze

1 Johani 4:1

Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko.

Matewu 24:11

Va na humelela vaprofeti vavangi va makuhu, ava va no timeta vathu votala.

Vakolosa 2:8

Ti woneleni kasiku ni wammweyo asi mi mahi tikhumbi ngu mawombelo a marindi a wutxhari wa vathu, ngu kulondetela siheno sa vathu ni mtumbuluko wa mafu, i si nga ngu Mlayo wa Kristu.

Mtuletelo 19:20

Kambe txikalani txi to ñolwa kumweko ni mprofeti wa makuhu, awu, ngu kuthumela txikalani, a nga ti mahile sixamaliso so kanganyisa ngu sona vale va nga amukela txixambanyo txa txikalani, ve khozela txithombe txa txona: Txikalani ni mprofeti wa makuhu va to rinzwa, va txi hanya, digovani ka mndilo, wu turako ngu txivavula.

Judha 1:4

Nguku ku txholovete vathu vokari hagari kwathu, ava ku nga bhalwa ngu kale ti to va na abaniswa, vathu va kwa mbi thava Txizimu, va hindulako kateko ya Txizimu txathu, ve yi maha txivhikelo txa wubhemba wawe, ve lamba kukholwa ka wu i ku ene ekha M'gondisi ni Mkoma wathu, Jesu Kristu.

Mika 3:11

Vathangeli vawe va wila mahungu ngu kuxawa, se vaphaxeli vawe va gondisa ngu kulava txokari, vaprofeti vawe va huta ngu kulava male; kambe va ngadi va txi khigela ka Mkoma, va txi kha vona: Ina kha ngaho Mkoma hagari kwathu kani? Kha hi na mbi telwa ngu to biha ni tatimweto.

2 Pedro 3:17

Ngu toneto, anu vo randeka, ngako mi nga songolela ku tiziva, ti woneleni, kasiku mi si thuki nanu mi txi humiswa ka likholo lanu lo tsana, ngu kuxengwa ngu vathu vo biha va va si khataliko ngu txilo.

Luka 6:26

Dikhombo danu, ngako vathu votshe va txi mi dhumisa. Ngu toneto, vatate vawe va nga txi mahisa tona ka vaprofeti va makuhu.”

2 Timoti 3:13

Kasi vathu va tshofu ni vaxengeteli, vona va na ya masoni ngu kumaha wubihi, va txi kanganyisa vamwani ni ku ti kanganyisa vapune.

2 Timoti 4:3

Nguko yi nata mbimo yi vathu va no mbi dhunda kuengisa gondo ya yinene, aniko, madingano ni mixuvo yawe ni kulava kutsakisa tinzeve tawe, ti nyakatelwako, va na ti lavela mtengo wa vagondisi.

Vafilipiya 3:2

Ti woneleni ka timbwa, ti woneleni ka vamahi va to biha, ti woneleni ka va wukwera wa makuhu.

Vaefesu 4:14

Kasiku hi si swi hi maha vanana va va pengiswako ngu mavimbi, ve pepulwa ngu timoya ta gondo ya kukanganyisa ka vathu, ni marindi awe ma hi timetako.

Vagalatiya 2:4

mhaka yiya yi wusilwe ngu va va ti wombako ku mbanathu, na kasi makuhu; evo va ti ko txholovela hagari kwathu ngu kukanganyisa, kasi kumbwingamela kuwona wuthuseki wathu, awu wu tako ngu ka Kristu Jesu, kufela kuve tshumela ve hi wuleta wukhumbini.

Luka 12:15

Se a txi khene kwawe: “Ti woneleni ta tinene ka hanyelo ya timbiti, nguko hambi m'thu a di taletwe ngu thomba, wutomi wakwe kha wu tsaniswi ngu si a ku naso.”

Ezekhiyele 22:27

Vathangeli vawe hagari ka dona, va fana ni maxolwa ale ma ñolako sihari, kasi kutheketa mnoha, va txi khundumusa mihefemulo, va txi felela.

Mtuletelo 16:13

Konako, ni to wona ku txi huma ngu ka mwamilambo, ni mkanani ka txikalani ni mkanani ka mprofeti wa makuhu, mimoya yiraru ya nzambwa nga makhele;

Vaefesu 5:6

M'thu a nga thuke e mi kanganyisa ngu mapswi o mbi vhuna txilo, nguko simaha siya si dhana kuhenya ka Txizimu.

Mithumo 13:40

Ngu konaho, ti woneleni kasiku ti si mi humeleli ati ti nga wombwa ngu vaprofeti, tito:

Johani 10:12

Mthumeli wa male, awu i ku si nga m'dyisi, awu tinvuta ti si mu lumbiko, ngako a txi wona dixolwa di txi ta, a leka tinvuta, a txi tutuma, se dixolwa di txi honyola tinvuta, di txi ti hangalasa.

Matewu 16:11

Kha mi ti mani ngu txani ti to kha ni wombawombi ngu mapawu, aku ni nga khani: ‘Ti woneleni ka mtshumbelo wa Vafarisi ni wa Vasadhusi’ kani?”

Matewu 16:6

Jesu a to va gela a txi khene: “Tulani maso, mi ti wonela ka mtshumbelo wa Vafarisi ni wa vasadhusi.”

Matewu 10:17

Ti woneleni ka vathu, nguko va na mi mangalela ha banza, va na mi kwapa masinagogani kwawe,

Zakariya 13:4

Se ka ditshiku donedo, ku na maheka tito, vaprofeti ve theleka tingana, mmwani ni mmwani ngu mhaka ya txiwoniso txakwe, a txi ngadi e profeta, kambe kha va na mbi ngadi ve ambala dijasi da matoya, kasiku ve mana kuhemba.

Ezekhiyele 22:25

Kukanetisana ka vaprofeti vako kuho hagari ka dona, kufana ni gonyamo yi bhongako, yi txi ñola txihari; va honyolako tithomba ni simwani somaha, ve engetela tinoni hagari ka dona.

Ezekhiyele 13:22

Nguko mi pandisile mbilu ya wo lulama ngu wukanyisi wanu, na ani ni sa mpandisekisa, kambe mi tsanisile manza a wa kubiha, kasi ku asi humi ka nzila yakwe yo biha a txi hanyiswa,

Ezekhiyele 13:16

vaprofeti va Israyeli va profetako ngu Jerusalema, na va txi wona txiwoniso txa kuthutha, na ku si nga ni kuthutha, kuwomba Mkoma Txizimu.

Jeremiya 29:32

Ngu konaho Mkoma a khene: Ani ni na tsayisa Semaya wa Nehelama ni vanana vakwe; kha na mbi va ni m'thu wo zumba hagari ka vathu vava, kambe kha na mbi wona makatekwa ni no mahela vathu vangu, kuwomba Mkoma, nguko a wombawombile to wukela Mkoma.

Jeremiya 29:21

Mkoma wa Mabutho a Tiyimbi, Txizimu txa Israyeli, a khene xungetano ngu Ahabi, mwana Kolaya, ni Zedhekiya, mwana Maaseya, ava va mi profetelako makuhu ditinani kwangu: Wona, ni na va ningela manzani ka Nebhukodhonosori, mfumeli wa Bhabhilona; ene a na va daya masoni kwanu.

Mtuletelo 17:6

Se ni to wona ti to wamsikati a ti levile ngu mnoha wa vasawuleki ni mnoha wa tifakazi ta Jesu. Ngako ni txi mu wona ni to tala ngu kuxamala ngutu.

Mithumo 13:6

Ngako va di tshawunyetile txotshe txitondolo ve hoka Pafo, koneyo va to ya mana Mujudha wokari, i nga ti msalamusi ni mprofeti wa makuhu, awu a nga ti dhanwa ku i Bhari-Jesu.

1 Vafumeli 13:18

Ene a m'gete ku khene: Nani ni mprofeti kufana ni nawe, se ngelozi yi to ni angula ngu dipswi da Mkoma, yi txi kha yona: Mmahe e tshumela ni nawe mi tsula m'tini kwako, kasi ku eya dya dipawu, ni kusela mati (kambe a to mu hembete).

Dhaniyeli 11:34

Se ngako va txi wa va na mana kuvhunwa ka kudotho, aniko votala va na patana navo ngu wukanganyisi.

Matewu 7:14

Nguko txike txi songile, ni nzila ya kona yi khwete, ayi yi yisako wutomini, kambe mbadotho va yi manako.”

Mtuletelo 20:10

Dhiyabhulosi wu a nga ti va xengetela a to vinzwa txizivani ka mndilo ni txivavula, amu se txi nga ti ti kona txikalani ni mprofeti wa makuhu. Va na zumba ve dyiswa mihumbo wusiku ni mitshikari, ngu hawa ku si gumiko.