Matewu 5:16 - Bhiblia Yo Sawuleka

¹⁶ Ngu toneto, kwanu ku na woninge masoni ka vathu, kasiku, ngako va txi wona mithumo yanu ya yinene, va na dhumisa Tate wanu a ku nzumani.”

Matewu 5:16 Referans Kwoze

1 Pedro 2:12

Wutomi wanu hagari ka va va si kholwiko, wu nave wa wunene ngutu, kasi ku ngako va txi mi lumbeta, kuva mi di vabihi, vona va na yi ziva mithumo yanu ya yinene, se ve dhumisa Txizimu ka ditshiku da kuta ka txona.

Titosi 2:7

Thanga awe u va txikombiso txa mithumo ya yinene, u si vi ni txisolo, u va wa kuthutha amu ka kugondisa ditshuri;

Johani 15:8

Tate wangu a na dhumiswa, ngako mi txi veleka mihando yo tala, mi maha vagondiswa vangu.”

Vaefesu 5:8

Kale mi ti hanyela mtemani, aniko mi hindukile mi maha liwoningo ngu ka Mkoma. Tsimbilani kha kwati, nga ti mi ku vanana va liwoningo.

1 Pedro 3:16

Mi fanete kumaha tiya ngu mbilu ya kululama, kasiku, hambi ka tile va wombako kubiha ngu nganu, ve thelwa tingana, avale va wombako kubiha ngu dihanyo danu ka Kristu.

1 Pedro 4:14

Ngako mi txi xaniswa ngu ditina da Kristu, mi katekile, nguko moya wa kupfaliswa, Moya wa Txizimu, wu zumbile hagari kwanu.

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Isaya 58:8

Sekoko liwoningo lako li na huma kufana ni wuronga, se kukalamuka kwako ku na mila ngu kukuluveta, ni kululama kwako ku na thangela masoni kwako, se wudhumo wa Mkoma wu na va msana kwako.

Titosi 3:14

Votshe va ka kwathu va fanete kugonda kukhutalela mithumo ya yinene, kasi kuvhuna amu si pwatekako ngutu, va si mahi sifule so mbi veka mihando.

1 Timoti 6:18

Va na mahe wunene, va nave vanyatithombe ngu mithumo, va nave ni wuha, ve ziva kuabana ni vamwani.

2 Vakorinto 9:13

Ngako va txi wona mthumo wuwa wu kombisako wunene wanu, vona va na dhumisa Txizimu ngu mhaka ya kuengisa kwanu ka timhaka ta Evhangeli ya Kristu. Kambe vona va na dhumisa Txizimu ngu msengo wa wunene awu anu mi va vhunako ngu wona, i si nga vona vokha, aniko ni votshe vathu.

Vaefesu 2:10

Nguko athu hi mthumo wa kuhuma manzani ka Txizimu txi nga hi va nga ngu ka Kristu Jesu ngu mhaka ya mithumo ya yinene yi Txizimu txi nga hi sikela ngu kale, kasiku hi yi maha.

Vahebheru 10:24

Ahi laveni tinzila to vhunana, hi txi tsaniselana amu ka lirando ni ka mithumo ya yinene.

Mavingu 4:18

Aniko nzila ya vo lulama yi fana ni kuwoninga ka wuronga, ku woningako kambe ni kambe diza di hetiseka kutxa.

1 Pedro 4:11

Awu a wombawombako, a na womba-wombe ngu kulondisa dipswi da Txizimu. Awu a thumako a na thume madingano ni txyavelo txi a nga hiwa ngu Txizimu, kasiku, Txizimu txi pfaliswa ka sotshe somaha, ngu Jesu Kristu, i ku ene a lumbwako ngu kupfaliswa, ni mtamo, ngu ha ku si gwitiko. Amen!

1 Vatesalonika 2:12

Ngu toneto, nanathu hi nga ti mi gondisa tona, ni ku mi tsanisa, ni kukhongotela mmweyo ni mmweyo wanu, kasiku mi tsimbila ngu fanelo masoni ka Txizimu, atxi txi nga mi dhanela ka mfumo wa txona ni kupfaliswa ka txona.

1 Pedro 3:1

Nananu vavasikati vo tekwa, ti vekeni hahatshi ka vamna vanu, kasiku, ngako vamwani vavamna va si engisi dipswi, ve mana kudhanwa ngu mtamo wa mahanyelo a vasikati vawe, i si nga ngu dona dipswi,

Mithumo 9:36

Didhoropani ka Jopa, ku ti ni wamsikati wa mgondiswa, awu a nga ti dhanwa ku i Tabhita, atiya ngu Txigriki ti txhamusako ku Dhorkasi. Ene a ti taletwe ngu mithumo ya wumbilu ni wuha.

1 Timoti 5:25

Kufana ni toneto, mithumo ya yinene ya ti wonekisa; hambi yile hi si yi woniko kha yi sikoti kuzumba kusisalani.

Matewu 5:45

Ngako mi txi maha tiya, mi na va vanana va Tate wanu a ku nzumani; nguko nene wa humisela ditambo vavanene ni vo biha, ni kumaha ti to nzuma yi txi nela vo lulama ni vo mbi lulama.

Titosi 2:14

Ene a ti ningete ngu mhaka yathu, kufela ku hi tirula ka wotshe wubihi, kasiku ene e ti basisela ngamu yi yi no va i di yakwe, ayi yi khutalako amu ka mithumo ya yinene.

1 Timoti 5:10

Ta laveka ti to e ziwa ngu mithumo yakwe ya yinene; kufana ni kuwunja vanana ngu nzila ya yinene, kuamukela vapfhumba, kukuwula mikondo ya vasawuleki, kuvhuna ava va xanisekako, ni kutiningetela ka yotshe mithumo ya yinene.

1 Timoti 2:10

aniko kuleka eto, va na ti bombise ngu mithumo ya yinene, nga vavasikati va i ku makholwa.

Vagalatiya 1:24

Se vona va ti dhumisa Txizimu ngu kota yangu.

Isaya 61:3

ni kurumete ka votshe vale va dilako Siyoni, kasi ku va sanzeka m'bhoti wukhaloni ka dikhuma, ni ku va tota mafura a kutsaka wukhaloni ka kudila, ni ku va ambeka wudhumo hahanze ka moya wo xupheka, kasi kuve dhanwa ku mindonga ya kululama, yi nga phaywa ngu Mkoma, kasi ku e mana kudhumiswa.

Titosi 3:4

Kambe mbimo yi wunene ni lirando la Txizimu Muhanyisi wathu si nga ti wonekisa ka vathu, txona Txizimu txi hi ponisile,

1 Vakorinto 14:25

makungo a mbilu yakwe, ma na humeleliswa ha kubasani, se a na namisa mbanza, e khozela Txizimu, e womba a txi khene: Kha ditshuri Txizimu txiho hagari kwanu.

Luka 11:2

Jesu a to va xamula a txi khene: “Mbimo yi mi khongelako, indani khanu: ‘Tata, ditina dako di na sawulwe, wu nate kwathu mfumo wako,

Matewu 9:8

Mabutho a vathu, ngako ma txi wona tiya ma to telwa ngu kuthava, me dhumisa Txizimu atxiya txi nga ninga vathu mtamo wo maha eto.

Matewu 23:5

Totshe ti va ti mahako, va ti mahela kasi kuwonwa ngu vathu. Ngu toneto, va dhunda kusunga ha mbanza mwendo mawokoni kwawe titxinda ta kuanama, ku di bhatwe mapswi a mlayo mndani ka tona ni kulaphisa titxinda ta tinguwo tawe.

Matewu 6:16

“Ngako mi txi ti tona sakudya, mi nga kombiseni kuthuvika khoheni, nga vaxengeteli, ava va thuvikako khoheni kwawe, kasiku va na woneka ka vathu ti to va ti tonile sakudya. Kha ditshuri na mi gela ti to va amukete ditshungulo dawe.

Matewu 23:9

Ha mafuni hawa, m'thu mi nga mu dhaneni ku i tate wanu, nguko Tate wanu mmweyo, awule a ku nzumani.

Matewu 6:9

“Ngu konaho, anu mi na khongelisa tiya: Tata wathu, u ku nzumani, ditina dako di na sawulwe,

Eksodha 34:35

Vanana va ka Israyeli va woni khohe ya Mosi yi txi phatima, se ene a to engeta a txi ti fenengeta khohe ngu nguwo, kala kuza a txi wulela kambe kasiku a txi ya womba-womba nayo Mkoma.