Matewu 3:4 - Bhiblia Yo Sawuleka

⁴ Ene Johani a ti ambate tinguwo to mahwa ngu madhowo a makamelu, e sunga libhande la didhowo txiwununi. Sakudya sakwe i ti humbi ni wulombe wa txitinga.

Matewu 3:4 Referans Kwoze

2 Vafumeli 1:8

Se vona va to kha vona: I ti wamwamna wo ambala madhowo, a di sungile libhandi la didhowo txiwununi kwakwe. Mfumeli a to xamula ku khene: I Elija, wa Tisibha.

Levhi 11:22

Ka sona mi nga dya siya: Humbi ngu tixaka ta yona, txizombela ngu tixaka ta yona, nyenza ngu tixaka ta yona, ni tshera ngu tixaka ta yona.

Marku 1:6

Johani a ti ambate didhowo da dikamelu, e ti sunga txiwunu ngu libhande la didhowo, a txi dya humbi ni wulombe wa txitinga.

Matewu 11:8

Se nji txani mi nga ya txi wona kani? M'thu wo ambala tinguwo totshura ngutu kani? Aniko ava va ambalako tinguwo totshura ngutu va zumba tinyumbani ka vafumeli.

Zakariya 13:4

Se ka ditshiku donedo, ku na maheka tito, vaprofeti ve theleka tingana, mmwani ni mmwani ngu mhaka ya txiwoniso txakwe, a txi ngadi e profeta, kambe kha va na mbi ngadi ve ambala dijasi da matoya, kasiku ve mana kuhemba.

Luka 1:17

A na thangela masoni ka Mkoma ngu moya ni mtamo wo fana ni wa Elija; a na wuyisa timbilu ta vaveleki ti ta manana ni ta vanana vawe; a na wuyisa vaeyisi ka wuzivi wa valulami, kasiku e lulamisela Mkoma ngamu yi yi hanelako ene.”

Malakiya 4:5

Wonani taku ani ni na mi rumela Mprofeti Elija, na ku si se hoka ditshiku da hombe do thisa da Mkoma.

Mtuletelo 11:3

Aniko ni na ninga mtamo ka tifakazi tangu ta timbidi kasiku ti txi profeta, ti di ambate masaka, mndani ka 1.260 wa masiku.”

Matewu 11:18

“Nguko a tile Johani, asi dyi, asi seli, va txi kha vona: ‘Ana ni madhimoni.’

Dhewuteronome 32:13

A va kwelisile mimango ya mafu, a txi va dyisa mihando ya txitinga. Ni ku va dyisa wulombe wa dirigwini, ni mtona a kuhuma ngu mu ka dirigwi do banga,

Isaya 20:2

Mkoma a to womba-womba ka mbimo yoneyo, ngu txisofu txa Isaya, mwana Amoni, a txi khene: Tsula u ya txhatxha syambalo sa mkhwasi txiwununi kwako, u thavisa tikathula mikondoni kwako. A to maha toneto, e tsimbila-tsimbila i di tximbwiri, na asi nga ni tikathula.