Matewu 27:1 - Bhiblia Yo Sawuleka

¹ Ngako di di txite, votshe vaphaxeli va hombe ni madhota a ditiko, va to tshangana ve maha txikungo txa kulenga Jesu, kasiku ve m'daya.

Matewu 27:1 Referans Kwoze

Marku 15:1

Ni mixo, vaphaxeli va hombe va to tshangana ve maha txikungo kumweko ni madhota ni vabhali ni dotshe Dibanza. Sekoko, va di sungile Jesu, va to mteka ve tsula veya mningela ka Pilato.

Johani 18:28

Msana keto, va to teka Jesu ve khukha nayo m'tini ka Kayifasi kuya thethiswa, ve mu heleketa nyumbani ka wukoma. I ti mixo. Vona kha va wulela nyumbani mule ka wukoma ngu kuthava kutinyenyezisa, kasi va txi na mana kudya Pasika.

Luka 22:66

Mbimo yi di nga txa, di to sengeletana dibanza da madhota a ditiko, vaphaxeli va hombe ni vabhali, ava va nga mteka va txi mu yisa Wulamuleloni kwawe.

Mika 2:1

Dikhombo ka vale va ku va di otete ve pimisa to hambana, ni kuluka makungo o biha; ve ti maha ngu kugwimba ka wuronga, nguko si mtamoni ka manza awe!

Masalmo 2:2

Vafumeli va mafu va wukile, vakoma va maha txikungo hagari kwawe txa kuwukela Mkoma Txizimu, ni kuwukela Mkoma wule txona txi nga msawula.

Matewu 23:13

“Mi na ni dikhombo, anu vabhali ni nanu Vafarisi, vaxengeteli! Nguko ma tsivela vathu kuwulela Mfumoni ka nzumani, kha mi wuleli anu, kambe kha mi tuleli vale va lavako kuwulela.

Mithumo 5:21

Ku ti ngako va di engisile toneto, va to wulela Dithepeleni ni mabimbi-kutxa, ve gondisa kona. Kambe mphaxeli wa hombe ni va va nga ti nayo, ngako va txi hoka, va to ramba dibanza ni madhota otshe a vanana va ka Israyeli, se ve rumela vathu mkorani kuya teka vapostoli,

1 Samuwele 19:11

Kambe Sawule a to rumela mitumi yi ya m'tini ka Dhavhidha ya kuya mwonelela, ni ku m'daya ni mixo; e yo Mikali msikati wakwe, a to zivisa Dhavhidha, a txi khene: Ngako u si hulukisi wutomi wako wusiku wuwa, mangwana va nata kudaya.

Valamuli 16:2

Se vathu va Gaza va to ziviswa ti taku: “Samusoni a wulete muwa.” Va to tsula koko veya mrandela, ni ku m'zingela wusiku wotshe, ha txikeni ka didhoropa; ngu kumaha keto wotshe wusiku va to thutha, na va txi kha vona: “Hi na rinzela kala di txi txa; se ngu kona hi no m'daya.”

Masalmo 31:13

Ni engisile va txi womba-womba kubiha ngu ngani; ni taletwe ngu dizowa, nguko valala vangu va ni rambete txikungo, va lava ku ni daya.

Masalmo 71:10

Valala vangu va womba-womba ngu ku ni wukela; avale va lavako ku ni daya va langana txikungo,

Luka 13:1

Ka txoneto txikhati va to humelela vathu va va nga mu xawutela mhaka ya va Galileya, avava Pilato a nga patanisela mnoha wawe kumweko ni mnoha wa timhamba ti va nga txi phaxa ngu tona.