Matewu 26:70 - Bhiblia Yo Sawuleka

⁷⁰ Aniko ene a kanetile masoni ka votshe, a txi khene: “Kha ni tizivi eto u wombako.”

Matewu 26:70 Referans Kwoze

1 Vakorinto 10:12

Ina, ngu toneto, awule a pimisako ti to a emekile, a na ti wonele kasiku asi wi.

Mtuletelo 21:8

Kambe ka va va dizowa, vo mbi kholwa, vo dhunda manyala, va dayi va vathu, magelegele, va matiloti ni votshe va lumbeti, vakhozeli va si i ku si nga Txizimu, ni ka votshe va makuhu, txyavelo txawe ngu kuvinzwa txizivani ka mndilo wo tura ngu txivavula, i ku lona lifo la wumbidi.”

Varoma 11:20

Ngu txona; ma phatutwe ngu ku ambi kholwa; se awe u tsani ngu mhaka ya kukholwa, u nga ti kulise, aniko thava!

Matewu 26:58

Pedro a ti mu londisela a di kule kala kuhoka digumani ka mphaxeli wa hombe. Se a di hokile hafuhi, a to wulela e khalahatsha kumweko ni sithumi, kasi kuwona magwito a totshe timhaka.

Matewu 26:56

Sekoko totshe tiya, ti mahekile kasi kutatiseka Mibhalo ya vaprofeti.” Ngu konaho votshe vagondiswa, va to mleka, ve thava.

Matewu 26:51

Mmweyo wa vale va nga ti kumweko ni Jesu, a to swomola ditxhari dakwe e peka txithumi txa mphaxeli wa hombe, e txi wila nzeve.

Jeremiya 17:9

Se mbilu mkanganyisi kupinda sotshe silo, yi sinile; i mani a no yi ziva kani?

Isaya 57:11

Se u thava mani mwendo kudhudhumela, aha koza u hemba u si ni alakanyi, mwendo ku ni veka mbiluni kwako kani? Ina hi nga mhaka ya kule ni nga malala kukhukhela kale, se u si ni thavi kani?

Mavingu 29:25

Dijowa da m'thu di na riya milawu, kambe awule a thembako ka Mkoma, a na vekwa ka wukhalo wo guleka.

Mavingu 29:23

Kutikulisa ka m'thu ku na m'dayisisa, kambe awule a ku ni moya wo ti veka hahatshi, a na mana kudhundeka.

Mavingu 28:26

Awule a thembako ta mbilu yakwe apune, hi nga wa txilo, kambe wule a tsimbilako ngu kutxhariha, a na huluka.

Matewu 26:69

Ka yoneyo mbimo, Pedro a ti khalahatshile hahanze, digumani. Se mmweyo wa txithumi txa wamsikati a to tshuketa hafuhi kwakwe, a txi khene: “Anawe u ti kumweko ni Jesu wa Galileya.”

Matewu 26:71

Se a di khukhile ha txikeni, a to wonwa ngu tximwani txithumi txa wamsikati, awu a nga gela ava va nga ti ti ho konaho, a txi khene: “Awuwa nene a ti kumweko ni Jesu wa Nazareta.”

Luka 22:57

Kambe Pedro a to kaneta, a txi khene: “He wamsikati, ani eyo kha ni mu zivi.”