Matewu 20:8 - Bhiblia Yo Sawuleka

⁸ Na ku txi khata kumaha minova, nyamne wa thembwe ya mivhinya, a to gela mxayisi wa tithomba takwe a txi khene: ‘Dhana sithumi u txi si holela nthumo wa sona, aniko u na khata ngu vale vo gwitisa, kala u txi ya gwitisa ngu vale vo khata.’

Matewu 20:8 Referans Kwoze

Dhewuteronome 24:15

U na mninga hakhelo yakwe ka ditshiku donedo, di sanzi kuswa ditambo, nguko ene njisiwana, a themba yona hakeloyo: A nga dila ka Mkoma ngu mhaka yako, se awe u txi mana mnandu.

1 Pedro 4:10

Kota vaxayisi vavanene va tikateko ta Txizimu, mmwani ni mmwani kwanu a na vhune vakwawe ngu txiningo txi a nga hiwa.

Vahebheru 9:28

ngu toneto, Kristu a ti ningete kumweko basi, kufela kufuvisa sionho sa vathu vavangi. A na woneka da wumbidi, i si nga ngu mhaka ya txionho, aniko ngu mhaka ya ku ta hanyisa avale va m'verelako.

Titosi 1:7

Mthangeli wa dibanza a fanete kuva a si nga ni txisolo, ngako i ku muwoneleli wa Txizimu; kulaveka i si nga wo tikulisa, a si nga ni txihenyisani, i si nga disela, i si nga muwusi wa mazunga, a si nga ni timbiti ta dibhindu do mbi lulama.

2 Vakorinto 5:10

Nguko hotshethu hi na ya ema hi txi thethiswa masoni ka Kristu, kasiku mmwani ni mmwani a txi amukela atxile txi m'fanelako, madingano ni wunene mwendo wubihi wu a nga wu maha, a di ngadi a txi hanya wutomi wa mmidi.

Luka 12:42

Mkoma a xamute a txi khene: “Ngu wuhi muwoneleti wo thembeka ni kutxhariha, awu Mkoma a no mu veka masoni ka sithumi, kasiku e avela sakudya ngu mbimo yi yi lavekako kani?

Luka 10:7

Zumbani ka yoneyo nyumba, dyanani mi txi sela asi va ku naso, nguko txithumi txi ni fanelo ya muholo wa txona. Mi nga tsimbileni ka nyumba ni nyumba.

Luka 8:3

Jowana, msikati wa Kuza, nduna ya Herodha; ni Suzana ni vamwani vavasikati, va nga ti ti va vhuna ngu silo sawe.

Matewu 25:31

“Mbimo yi a nota Mwanana wa M'thu ni wudhumo wakwe, kumweko ni tingelozi takwe, ene a nata khalahatsha ha txikhaloni kwakwe ka wukoma.

Matewu 25:19

Se msana ka mbimo ya hombe, a to wuya nyamne wa vale va sithumi e va kombela dibhindu da mithumo yawe.

Levhi 19:13

U nga xuphe mkwanu kambe u nga mpele sakwe; muholo wa mthumo wu a thumako u nga zumbe nawo manzani kwako, kala ditshiku da mangwana.

Genesisi 43:19

Ngu mhaka yeto, va to tshuketa hafuhi ka mxayisi wa nyumba ya Josefa, va txi ya womba-womba nayo ha txikeni ka nyumba.

Genesisi 15:2

Sekoko Abramu a xamute, a txi khene: “Awe Mkoma Txizimu, u na ni ninga txani kani? Nguko ni konkuwa kha ninzi kuva ni mwanana, se awu a no dya thomba yangu i Eliyezeri wa Dhamasku.”

Matewu 20:7

Vona va to mu xamula va txi kha vona: ‘Nguko kha ha tholwa ngu m'thu.’ Se ene a nje khene: ‘Tsulani na nanu thembweni kwangu ka mivhinya.’

Matewu 20:9

Ngako va di bwakile va va nga tholwa ngu txikhati txa wugumi ni tximwetxo, va to amukela male ya didhenari, m'thu ni m'thu.

Rute 2:6

Se dijaha dile di nga ti vekilwe kuthangela vaeluli, di to xamula di txi kha dona: Adiya ndihorana da ka Mowabhi, di nga wuya ni Nowemi ngu ditikoni ka Mowabhi.