Matewu 17:5 - Bhiblia Yo Sawuleka

⁵ Ene a di ngadi a txi womba tiya, ku to humelela direfu do woninga, di nga va fenengeta, se direfuni mule ku to pfala dipswi, di di nga womba tiya: “Awuwa i Mwanana wangu wo randeka ngutu, awu ni tsakiswako ngutu ngu ngene. Mu engiseni!”

Matewu 17:5 Referans Kwoze

Matewu 3:17

Sekoko, kupfala dipswi da kuta ngu nzumani, di txi kha dona: “Awuwa i Mwanana wangu wo randeka, awu ni tsakiswako ngutu ngu ngene.”

Matewu 12:18

“Atxiya ngu txona Txithumi txangu, ni nga txi sawula, i ku txo randeka kwangu, atxiya mbilu yangu yi txi tsakelako. Ni na veka Moya wangu txitimwi kwakwe, a na txhumayela kulamula kwangu ko lulama ka otshe matiko.

Marku 9:7

Sekoko, ku to humelela direfu, adi di nga ta va fenengeta ngu mtsudi wa dona, se ngu ka dona ku to pfala dipswi di txi kha dona: “Awuwa i Mwanana wangu ni mu randako. Mu engiseni!”

Dhewuteronome 18:15

“Mkoma, Txizimu txako, a na ku humisela mprofeti wo fana ni nani, hagari ka va ka kwanu; awule mi no fanela ku mu engisa”;

Johani 3:35

Tate wa randa Mwanana, a vekile sotshe manzani kwakwe.

Marku 1:11

Ku to huma dipswi da kuta ngu nzumani, di txi kha dona: “Awe u Mwanana wangu wo randeka ngutu, awu ni mu tsakelako.”

Mtuletelo 1:7

Ndiyo wata a di txitimwi ka marefu. Maso a votshe vathu ma na mu wona, hambi vona va va nga m'daya ngu ditxhari: Totshe tihunzu ta ha mafuni ti na dila ngu ku mu wona. Ina! Amen!

Luka 3:22

Se Moya wo Sawuleka wu to txhika txitimwi kwakwe ngu txifaniso txa txituvane. Se dipswi da kuta ngu nzumani di to pfala, di txi kha dona: “Awe u Mwanana wangu wo randeka ngutu; ni vekile kwako kotshe kutsaka kwangu.”

Isaya 42:1

Wonani Txithumi Txangu, txi ni txi seketelako, Msawulwa wangu, awule moya wangu wu mtsakelako; Ni vekile Moya wangu txitimwi kwakwe; a na humisa kululama hagari ka vamatiko.

Vahebheru 5:9

Msana ka kuva a di tatisile tifanelo takwe, a mahile txisima txa wutomi wo mbi guma ka votshelele vale va mu engisako.

Dhewuteronome 18:19

Se ngako ku txi maneka m'thu wo mbi engisa mapswi anu, aawa ma no huwelelwa ngu mprofeti ditinani kwangu, ani nipune ni na m'dhana e ta ti xamulela.

Mithumo 7:37

I ngadi ene Mosi awu a nga womba ka vanana va ka Israyeli, a txi khene: Txizimu txi na wusa hagari ka vananu mprofeti wo nga ani.

Johani 5:37

Nene Tate wu a nga ni ruma, a mahile wufakazi ngu ngani. Anu txima kha mi zivi kupfa dipswi dakwe, hambi ni kuwona txiemo txakwe ni ditshiku ni da dimwedo.

Vakolosa 1:13

Ene a hi ponisile ka txidema, a txi hi rurisa hi txi ya mfumoni ka Mwanana wakwe wo randeka,

Vaefesu 1:6

kasi ku hi txi pfalisa Txizimu ngu wudhumo wa tikateko ta txona, hi nga ningwa ngu Mwanana wa txona wo randeka.

Johani 3:16

Nguko Txizimu txi kombile lirando ka vathu, ahawa txi nga za txi ningela Mwanana wa txona wa Mmweyo ekha, kufela ku, votshe va va no kholwa kwakwe, va si lovi, aniko va na mana wutomi wo mbi guma.

Isaya 42:21

Mkoma a ti ti tsaka ngu ngene, ngu kuranda ka kululama kwakwe; a mkulisile ngu mlayo, e mmaha wo dhundeka.

Dhewuteronome 5:22

Aawa ngu ona mapswi a Mkoma a nga huwelela, ngu dipswi do guleka, ka wotshe msengeletano wanu, txitimwi ka mmango, a di hagari ka mndilo, ni direfu, ni txidema. A to womba-womba ngu dipswi da hombe, a si engeteli txilo; a to bhala timhaka tiya, aha ka sileti simbidi sa marigwi, a txi si ningela kwangu.

Eksodha 19:19

Kudhuma ka mpundu ku to maneka ku txi kula ngutu. Mosi a ti ti womba-womba ni dipswi da Nyatxitimwi di ti mxamula.

Mithumo 1:9

A di wombile timhaka tiya, a to guleka na va txi mu wona, se direfu di mu tsivela, va si swi va txi mu wona.

Masalmo 81:7

Kuxanisekani kwako, u ni dhani ni ta kuhanyisa; ni ku angute, ni di direfuni ka txingwalangwanda, awe u nga ni duka matini ka Meribha.

Jobe 38:1

Msana ka tiya, Mkoma a to xamula ka Jobe, ngu mu ka txihuhuri, a txi khene:

Matewu 17:6

Mbimo yi va nga engisa mapswi awa, vagondiswa va to wa hahatshi ngu timbanza, va txi telwa ngu dizowa da hombe ngutu.

Mtuletelo 14:14

Msana keto, ni to wona tiya: Ku ti ni direfu do basa, se txitimwi ka direfu ku ti khalahatshile m'thu wokari, wo fana ni Mwanana wa M'thu, a di ni m'bhoti wa nzalama ha msungo, se manzani kwakwe, a ti ni sikela yo lotwa.