Matewu 1:22 - Bhiblia Yo Sawuleka

²² Totshe tiya ti mahekile kasi kutatiseka atile Mkoma a nga womba ngu mprofeti, a txi khene:

Matewu 1:22 Referans Kwoze

Luka 24:44

Se a txi va gela ku khene: “Ngu ona mapswi awa ni nga mi gela, ni di ngadi ni nanu: ‘Ta ku khani ti ni fanelo ya kutatiseka totshe ti ti nga bhalelwa ani dibhukuni ka Mlayo wa Mosi ni ka Vaprofeti ni mu ka Masalmo.’ ”

Matewu 2:23

eya aka ka didhoropa di di dhanwako ku i Nazareta ahawa a nga ya zumba kona, kasi kutatiseka ati ti nga wombwa ngu vaprofeti va txi kha vona: “A na dhanwa ku i Munazareta.”

1 Vafumeli 8:15

A txi khene: A na dhumiswe Mkoma, Txizimu txa ka Israyeli, a nga womba ngu txisofu txakwe ka tate wangu Dhavhidha, ni kumaha ngu dianza dakwe a txi khene:

Mithumo 3:18

Kambe Txizimu, ngu nzila yo nga tiya, txi lavile kutatisa ati txi nga songolela ku ti womba ngu txisofu txa votshe vaprofeti, atiya taku: Kristu a fanete kuxaniseka.

1 Vafumeli 8:24

u nga maha ni txithumi txako, i ku tate wangu Dhavhidha, a ti u nga m'gela; nguko ngu txisofu txako u wombile, ngu dianza dako u mahile, nga ha ti wonekako ka diya ditshiku.

Johani 18:9

Ti mahekile tiya kasi kutatiseka dipswi di Jesu a ngadi womba, a txi khene: “Ka vale u nga ni ninga, awalo ni wammweyo ni nga mwalalelwa ngene.”

Matewu 13:35

kasi kutatiseka ati ti nga wombwa ngu mprofeti, a nga khene: “Ni na tula txisofu txangu ni womba-womba ngu sidinganiso; ni nuwela timhaka ti ti nga ti sisilwe kukhukhela kumahwani ka ditiko.”

Ezra 1:1

Ka dilembe do khata da Siro, mfumeli wa Persiya (kuva di txi na tatiseka dipswi da Mkoma ngu txisofu txa Jeremiya), Mkoma a to wusa moya wa Siro, mfumeli wa Persiya, a nga kwangula ka dotshe ditiko dakwe, kumweko ni kubhala, a txi khene:

Johani 17:12

Ni di ngadi navo ha mafuni, ni ti va xayisa ditinani kwako. Ni va xayisile ava u nga ni ninga; se kha ku nga ho ni wammweyo a nga lova, i si nga ene mwanana wa kulova, kufela ku Mibhalo yi tatiseka.

Johani 15:25

kasi ku dipswi di, di nga bhalwa Mlayoni kwawe, di txi tatiseka, adi di ku: ‘Va ni vengete walo.’ ”

Johani 10:35

Amu ka Mlayo va dhanwa ku i sizimu ava dipswi da Txizimu di nga rumelwa kwawe; se awalo wu a sikotako kufuvisa Mibhalo.

Matewu 13:21

kambe ene apune kha na mikoloti, kha tsana: Ngako ku txi ta kupandiseka mwendo kuxaniseka ngu mhaka ya dipswi, wa kuluveta e rereka.

Matewu 12:17

Kasi kutatiseka ati Txizimu txi nga womba ngu mprofeti Isaya, txi txi kha txona:

Matewu 2:15

A ti ya zumba koneyo kala efa Herodha, kasi kutatiseka ati Mkoma a nga womba ngu txisofu txa mprofeti, a nga khene: “Ni dhani Mwanana wangu e huma ngu Egipta.”

Matewu 8:17

Kasi kutatiseka ati ti nga wombwa ngu mprofeti Isaya, a txi khene: “Ene a tekile sikarato sathu, a txi rwala ni malwati athu.”

Matewu 5:17

“Mi nga alakanyeni ti to ni tete ku ta fuvisa Mlayo wa Mosi mwendo gondo ya vaprofeti. Kha na tela ku ta fuvisa, aniko ni tete ku ta tatisa.

Luka 21:22

nguko masikuyo masiku a kupharela, kasiku totshe ti ti nga bhalwa ti hetiseka.

Mtuletelo 17:17

Nguko Txizimu txi si ningile mbilu ya kumaha makungo a txona, ngu mapimo mamwani: Kuningela wukoma wa digelegele ka txikalani, kala kuza mapswi a Txizimu me hetiseka.

Varoma 1:2

ayi Txizimu txi nga ti yi thembisile kale, ngu vaprofeti va txona, mu ka Mibhalo yo Sawuleka;