Masalmo 92:14 - Bhiblia Yo Sawuleka

¹⁴ Hambi yi di kumbile mindonga yile ya veleka mihando yi zumba yi di nonile ni kuhanya,

Masalmo 92:14 Referans Kwoze

Isaya 46:4

Se kala mi txi kumba, ni na va ani wammweyo, ni na mi gula kala mi huma tinvi; ani ni mi vangile, kambe ni na mi gula, ni mi tisa, ni ku mi xayisa.

Masalmo 71:18

Se konkuwa, ni nga kumba ni basa misisi, awe Txizimu, u nga ni leke, nguko ni ngadi ni txi na xawutela ka liveleko liya ni ka va va nota, wukoma wako ni mtamo wako.

Jeremiya 17:8

Nguko a na fana ni mndonga wu wu nga phawa hafuhi ni mati, awuwa mitwi ya wona yi navako kala matini. Hambi kuva ni lisani kha wu thavi, aniko mazokoro a wona mo simama me nyuka. Kha wu karateki hambi i di dilembe do mbawa mati, hambi kuleka kuveleka mihando.

Vafilipiya 1:11

mi txi pfunelwa ngu mihando yo lulama, yi tako ngu ka Jesu Kristu, kasiku Txizimu txi pfaliswa ni kudhumiswa.

Masalmo 1:3

A fana ni mndonga wu wu nga phawa mabambe ka lidhonga la mati, awu wu ningako mihando ya wona ngu mbimo ya kona, awu mazokoro a wona ma si wuniko totshe ti a ti mahako ta bhindula.

Jobe 17:9

Se awule wo lulama a na londisa nzila yakwe a di tsani, ni wu wa manza o sawuleka, mtamo wakwe wu na engetelwa.

Matewu 3:10

Kambe ndzanga yi vekilwe ha mikolotini ka mindonga. Ngu toneto, mndonga wuhi ni wuhi wu si velekiko mihando ya yinene, wu na gangwa wu tshotshwa ha mndiloni.

Mavingu 4:18

Aniko nzila ya vo lulama yi fana ni kuwoninga ka wuronga, ku woningako kambe ni kambe diza di hetiseka kutxa.

Ezekhiyele 47:12

Se hafuhi ni txinambwana, likasani ka kona, ka didhawa dimwedo ni dimwani, ku na mila totshe tixaka ta mindonga yo ninga mihando yo dingana kudyiwa; mazokoro a yona kha ma na mbi mora, hambi kuluzeka mihando ya kona; ngu mitxima ya kona yi na veleka mihando ya yiphya, nguko mati a kona ma huma ngu ko sawuleka; se mihando ya kona yi na maha yo dyiwa, aniko dizokoro da kona mrende.

Judha 1:12

vathu vava ngu vona i ku sikhuvekiso mibusoni kwanu ka lirando; vadya va si na tingana, ve ti dyisa vapune, va fana ni marefu o mbi na mati, ma pengapengiswako ngu moya; mindonga ya wuxika yi si velekiko mihando, mindonga yi nga fa kumbidi yi txi dulwa ni mikoloti ya yona;