Masalmo 91:16 - Bhiblia Yo Sawuleka

¹⁶ Ni na mninga kuhanya masiku amangi, kambe ni na mkomba kuhanyisa kwangu.”

Masalmo 91:16 Referans Kwoze

Mavingu 3:2

Nguko milayo yi na engetela masiku ako, kambe yi na kuengetela malembe a kuhanya ni kuthutha.

Mavingu 3:16

Kuengetelwa ka masiku ku ka dianza da txinene da wutxhari; ka da txibhabha kumaneka tithomba ni kudhundeka.

Masalmo 21:4

Ene a kombete wutomi, se awe u mningile, wutomi wo lapha, wo fungala, wo mbi na magwito.

Masalmo 50:23

Awule a ni mahelako mphaxo wa kubonga, ni na m'guleta; ni wule a tsimbilako ngu nzila yangu, ni na mkomba kuhanyisa ka Txizimu.”

Dhewuteronome 6:2

Ngu toneto, thava Mkoma, Txizimu txako, kambe vekisa yotshe milayo yakwe, ni sirumo si nyamsi ni ku leletako, awe ni vanana vako, ni mtukulu wako, otshe masiku a kuhanya kwako, kasi ku masiku ako ma na anda.

Jobe 5:26

U na tshotshwa dithithani u ti kumbile, nga kule kusengeletwako tinyanda ta fulaho ngu mbimo ya kona.

Luka 2:30

Nguko maso angu se ma wonile kuhanyisa kwako;

Mavingu 22:4

Hakhelo ya kutinamisa ni kuthava Mkoma, ndithomba, ni wudhundo, ni wutomi.

Isaya 45:17

Aniko Israyeli wa hanyiswa ngu Mkoma, ngu kuhanyisa ka kwa mbi guma; ngu mhaka yeto kha mi na mbi wiswa tingana, hambi kukanganyiswa kala kupinduka.

Masalmo 16:11

U na ni komba nzila ya wutomi; masoni kwako ku tate litsako; ka dianza dako da txinene, ku ni kuzumbiseka ko mbi gwita.

Genesisi 25:8

Abrahamu a to ningela muhefemulo wakwe, a fite a di kumbile ngutu, i di txikhovana, a to ya tshangana ni va ka kwawe.

Luka 3:6

Votshe vathu va na wona kuhanyisa ka Txizimu.”

Mavingu 10:27

Kuthava Mkoma ka engetela masiku, aniko malembe a vo biha ma na komiswa.