Masalmo 91:15 - Bhiblia Yo Sawuleka

¹⁵ Ene a na ni dhana, se ani ni na mxamula; ngako a di kuxanisekani, ni na va kumweko nayo; ni na m'hulukisa, ni mpfalisa.

Masalmo 91:15 Referans Kwoze

Jeremiya 33:3

Kwangula kwangu ni na kuxamula, ni na kukomba silo sa hombe, u si si ziviko.

Isaya 65:24

Se ku na maheka ti to ni va xamula, va sanzi kupeka huwa; va txi ngadi ve womba-womba ni na va engisa.

Masalmo 50:15

Ni dhane, mbimo yi u ku ha kuxuphekani; ani ni na kuhulukisa, se awe u na ni dhumisa.”

Masalmo 138:7

Ngako ni txi tsimbila hagari ka kuxaniseka awe wa ni hanyisa; u na nawuluta dianza dako u ni vhikela ka txiviti txa valala vangu se dianza dako da txinene di na ni hanyisa.

Johani 12:26

Ngako m'thu a txi lava ku ni thumela, a na ni londise, se ahawa ani ni ku kona, nene wule a ni thumelako a na va a di konaho. Se ngako m'thu a txi ni thumela, Tate wangu a na mu dhumisa.”

1 Samuwele 2:30

Ngu kumaha keto, Mkoma Txizimu txa Israyeli, a khene: Ngu ditshuri ani ni wombile ti taku, nyumba yako ni nyumba ya tate wako, ti na tsimbila masoni kwangu kala kupinduka; aniko konkuwa, kuwomba Mkoma,: Timhaketo ti nave kule ni nani! Nguko ni na thava avale va ni thavako, kambe avale va ni eyisako va na wiswa tingana.

Masalmo 10:17

Mkoma, engisa mikombelo ya sisiwana; si mbuwetele u txi si amukela.

Isaya 41:10

u nga thave, nguko ani ni ni nawe; u nga gume mtamo, nguko ani ni Txizimu txako; na kutsanisa, kambe na kuvhuna, na kuseketela ngu dianza dangu da txinene da kululama.

Vahebheru 5:7

Kristu ka masiku awa a nga ti hanya wutomi wa mmidi, a mahile mikombelo, ngu kupeka tihuwa ni kudila mirongo, a txi khozela ka wule a nga ti sikota ku m'hulukisa ka lifo, se a txi tumelelwa ngu mhaka ya kuengisa kwakwe.

Masalmo 23:4

Hambi ni txo tsimbila mkovani ka mtsudi wa lifo, nga ni si thavi txilo, nguko awe, Mkoma, u ni nani. Nguko ndonga yako ni mtxheketelo wako, sa ni tsanisa.

1 Pedro 1:21

Ngu mhaka yakwe, ma kholwa ka Txizimu, atxi i ku txona txi nga mu wusa ka vafi, txi mninga wudhumo, kasi ku likholo lanu ni kuverela kwanu, mi si veka ka Txizimu.

Matewu 28:20

mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo, kala kugumani ka mafu.”

1 Pedro 5:4

Se mbimo yi a nota humelela M'dyisi wa Hombe, mi nata amukela m'bhoti wo phatima wa kupfaliswa, awu wu si onhekiko.

Johani 16:32

Wonani, ya ta mbimo, ni konkuwa yi hokile, ayi mi no hangalaka, mmwani ni mmwani e teka nzila yakwe, mi txi ni siya ni di nokha; kambe kha ni nga nokha, nguko Tate a ni nani.

Masalmo 37:40

Mkoma wa va vhuna ni ku va hulukisa; ene wa va vhikela ka vabihi, a txi va hanyisa, nguko vona va themba ene.

1 Pedro 3:22

wu a nga kwela nzumani, eya zumba txineneni ka Txizimu, ahawa a nga ningwa kufuma tingelozi, vathangeli ni mitamo.

2 Timoti 4:17

Aniko Mkoma a ni emete, a txi ni tsanisa, kasiku dipswi di txi txhumayelwa ngu ngani, ngu kuhetiseka, ti to di txi mana kuengiswa ngu votshe vamatiko. Ani ni hulukisilwe ka txisofu txa ngonyamo.

Mtuletelo 3:21

Ka wu a xulako ni na mninga kateko yo khalahatsha kumweko ni nani ha txikhaloni kwangu ka wukoma, kufana ni nani ni nga xula, se ni nga khalahatsha kumweko ni Tate wangu ha txikhaloni kwakwe ka wukoma.

Isaya 58:9

Sekoko u na dila, kambe Mkoma a na kuxamula; u na peka huwa, se ene a na khene: “Ngani wuwa hawa.” Eto ti na maheka ngako u txi thavisa hagari kwako dikange, u leka kuxungametela ngu litiho, ni kuwombawomba ka manyala;

Johani 12:43

nguko va randile kudhumiswa ngu vathu, kupinda kudhumiswa ngu Txizimu.

Johani 5:44

Mi nga kholwisa kutxani, anu mi dhumisanako ngu txanu, mi si laviko wudhumo wu wu tako ngu ka Txizimu txi i ku tximwetxo dwe.

Jobe 12:4

Ani ni txisekiso ka vangana vangu; ani na dhana Txizimu, se txona txa ni xamula; wamnene ni wo lulama vo maha sisekiso.

Masalmo 18:15

Ku to woneka hahatshi ka linene makhato a mafu ma txi vhunungulwa, mbimo yi di nga pfala dipswi dako do thisa, Mkoma, ni m'hefemulo wa tithonvu tako.

Jobe 5:19

Ka mtxhanu wa makhati a kuxaniseka txi na kutxhatxhisa, da wutxhanu ni mambidi wubihi kha wu na mbi kugwesa.

Zakariya 13:9

Se ni na pindisa dile da wuraru ngu ha ka mndilo, ni txi di sawulekisa, ku nga tile yi nga sawulekisa tona silivhela, kambe ni na di duka ku nga ti yi dukiswako tona nzalama, dona di na dhumisa ditina dangu, se ani ni na di engisa; ni na khani: Mbathu vangu; se dona di na kha dona: Mkoma, Njizimu txangu.