Masalmo 78:10 - Bhiblia Yo Sawuleka

¹⁰ kha va xonipha txitumelelano txawe ni Txizimu kambe va lambile kuvekisa mlayo wa txona;

Masalmo 78:10 Referans Kwoze

Dhewuteronome 31:20

Nguko mbimo yi ni no va hokisa ka ditiko dile di khulungako masi ni wulombe, adile ni nga thembisa ngu txixambanyo, ka vatate vawe, vona va na dya va txi khura, va na ena, kambe va na tshumelela ka simwani sizimu, va txi si khozela, va txi ni nyenya va txi hambunyeta txitumelelano txangu.

Dhewuteronome 31:16

Se Mkoma a wombile ka Mosi a txi khene: Wona, u hafuhi ni kutsula u txi ya humula kumweko ni vatate vako; se vathu vava, va na khukha va txi ya maha wugango ni simwani sizimu sa ditiko dile u lavako kuwulela ka dona. Vona va na ni leka va txi ndaka mlayo wa txitumelelano, txi ni nga txi sunga navo.

Jeremiya 31:32

Hi nga txitumelelano txo fana ni txi ni nga maha ni vatate vawe, ka ditshiku dile ni nga va ñola ngu dianza, kasi ku va humisa ngu ditikoni ka Egipta, se vona va txipisile txitumelelano txangu, hambiko ani ni ngadi va thembisile, kuwomba Mkoma.

Eksodha 16:28

Sekoko Mkoma a to khene ka Mosi: “Mi na lamba kuvekisa sirumo sangu ni mithetho yangu kala mbimo muni kani?

Nehemiya 9:17

Se va to lamba ku kuengisa, va si khumbuli sixamaliso sako sile u nga va mahela, ve ti nemelisa kuthumani kwawe, se ngu wuhurupha wawe va to ti sawulela mthangeli, kasi ku e va thangela ve tshumelela wukhumbini kwawe; kambe awe u Txizimu txi txi divalelako, txo pfela ni wumbilu, txi swelako kuhenya, txo tala ngu wunene, se awe khwa va leka;

Ezekhiyele 20:21

Aniko vanana va ni wukete, kha va tsimbila ngu sileleto sangu, kambe kha va xayisa milayo yangu, saku m'thu a txi si londeta, a na hanya ngu sona; vona va nyetisete Masabbata angu; ngu mhaka ya eto ni nga khani ni na theketa txiviti txangu txitimwi kwawe, kasi kukombisa kuhenya kwangu amu txiwulani.