Masalmo 77:2 - Bhiblia Yo Sawuleka

² Mbimo ya sikarato, na kombela ka Mkoma; ni wusiku, na guleta manza angu ni txi khongela, ni si karali; moya wangu kha wu mani thavelelo.

Masalmo 77:2 Referans Kwoze

Masalmo 50:15

Ni dhane, mbimo yi u ku ha kuxuphekani; ani ni na kuhulukisa, se awe u na ni dhumisa.”

Genesisi 37:35

Vanana vakwe votshe vamajaha ni vamahorana va to ya mkhongotela, aniko ene a to lamba kukhongotelwa, a txi khene: “Ahim-him ni na dila ni txi relela ka mwanana wangu, kufani.” Jakobe tate wawe, a to msaluka.

Isaya 26:9

Ngu muhefemulo wangu ni ku lavile ni wusiku, se ngu moya wangu wu ku mndani kwangu, ni na phindula ni kulava, nguko, ku di ni wululami wako ha mafuni, vaaki va ha mafuni va gonda wululamo.

Isaya 26:16

Mkoma va ku endete kuxanisekani kwawe; mbimo yile txitsayiso txako txi ngata txitimwi kwawe, va to tshakunuta mkombelo wawe wa txihunja.

Vahebheru 5:7

Kristu ka masiku awa a nga ti hanya wutomi wa mmidi, a mahile mikombelo, ngu kupeka tihuwa ni kudila mirongo, a txi khozela ka wule a nga ti sikota ku m'hulukisa ka lifo, se a txi tumelelwa ngu mhaka ya kuengisa kwakwe.

Hoseya 5:13

Ngako Efrayime a di woni malwati akwe ni Judha txilonda txakwe, Efrayime a to kweletela eya Asiriya, se e rumela mtumi ka mfumeli Jerebhi; Kambe ene kha na mbi sikota ku mi kalamukisa ni kuholisa silonda sanu.

Jeremiya 31:15

Mkoma a khene: Huwa ya pfala aniya Rama, ya xomulo ni kudila ka txiviti, i Rakeli a dilelako vanana vakwe wa lamba kuthavelelwa nguko vanana kha va nga ngadi ho.

Johani 11:31

Se Vajudha vale va nga ti tshanganile m'tini kwakwe Mariya, ku tela ku ta mu thavelela, mbimo yi va nga wona Mariya kukhukha ngu kukuluveta, a txi huma, va to mu londeta, va txi pimisa ti to a ya diyivani, kuya dilela kona ndiyakwe.

Hoseya 6:1

Ngonani, hi tshumelela ka Mkoma, nguko ene a hi phatulete, se a na hi kalamukisa; a hi lematile, aniko a na sungelela silonda sathu.

Mavingu 18:14

Kutsaka ka mbilu ya m'thu, ku na kalamukisa malwati akwe, aniko i mani a nga wusako mbilu yo pandiseka kani?

Masalmo 86:7

Ngako ni txi pfa kupandiseka, ni dila kwako, na ni txi themba tito, u na xamula mkombelo wangu.

Masalmo 63:6

Mbimo yi ni nga otela na kukhumbula; ngako ni di wukile, na kualakanya ngutu,

Masalmo 18:6

Kupandisekani kwangu ni dhani Mkoma, ni kombete txivhuno ka Txizimu txangu. Txi di Nyumbani ka txona txi engisile dipswi dangu, huwa yangu yi hokile tinzeveni ka txona.

Jobe 11:13

Ngako awe u di lulamisete mbilu yako, nawuluta manza ako kwakwe;

2 Makronika 6:28

Ku txi maneka nzala ditikoni, ku txi humelela mitungu, ni kuyha ka timbewu mwendo sijhingara ka siyalo, ni tihumbi, mipungu, mbimo yi mlala wako a tsivako sike sako, mwendo kumaneka ka mitungu yokari hambi malwati,

Genesisi 32:28

Sekoko ene a to khene: “Khu na mbiswa u txi dhanwa to u Jakobe, aniko u na dhanwa ku u Israyeli, nguko u lwite ni Txizimu ni vathu, kambe u xute.”

Masalmo 55:17

Ni minova, ni mixo, ni dhina ni na khongela; ni na kwangula, se ene a na engisa dipswi dangu.