Masalmo 72:12 - Bhiblia Yo Sawuleka

¹² Ene a na hulukisa txisiwana txi txi m'dhanako ni txikulungu txi txi ku si nga ni m'vhuni.

Masalmo 72:12 Referans Kwoze

Jobe 29:12

nguko ani ni ti ti txhatxhisa txikulungu, txi nga ti ti dila, ni vale vo felwa ngu vaveleki, ve pwata wa ku va xayisa.

Masalmo 102:17

ene a na engisa mkombelo wa txikulungu kha na mbi tsukula mikombelo ya txona.

Vahebheru 7:25

Ngu kota yeto, ene wa sikota kuhanyisa, ka mbimo yihi ni yihi, votshe vale va tshuketelako ngu ngene ka Txizimu, nguko ene wa hanya yotshe mbimo kufela ku va kombelela.

Ekleziyaste 4:1

Msana keto, ni to engeta ni wona sotshe sixaniso si si mahekako hahatshi ka ditambo; se ni to wona mirongo ya vale va xaniswako, ni ya vale va pwatako mthaveleli; kambe mtamo wu ti ti ka didhawa da vaxanisi vawe; aniko vona va si nga ni mthaveleli ni wammweyo.

Masalmo 10:17

Mkoma, engisa mikombelo ya sisiwana; si mbuwetele u txi si amukela.

2 Vakorinto 8:9

Ma wu ziva wunene wa Mkoma wathu Jesu Kristu. Ene hambiko i ku nyamne wa sotshe, a ti mahile txisiwana, kasiku anu mi txi mana sotshe ngu mhaka ya wusiwana wakwe.

Luka 4:18

“Moya wa Mkoma wu txitimwi kwangu, nguko Ene a ni totile, kasiku ni ya huwelela mahungu amanene ka sisiwana, a ni rumete kuya nuwela mhaka ya kuthukunyulwa ka va vo sungwa, ni ka mabhofu kuningwa kutshumela me wona, kuya thusa ava va xaniswako,

Isaya 41:17

Vaxaniseki ni vale vo pwata va lava mati, kambe kha ma ngaho, se tidimi tawe ta oma ngu ditora; aniko ani Mkoma, ni na va engisa, ani Txizimu txa ka Israyeli kha ni na mbi va leka.

Masalmo 72:4

Mfumeli a na vhikele sisiwana sa ditiko; e vhuna sisiwana ni kuganyatela vaxanisi!

Luka 7:22

Se Jesu a to va xamula a txi khene: “Tsulani mi ya gela Johani ati mi nga ti wona ni ti mi nga tipfa; mabhofu ma wona, silima sa tsimbila, va tshekela va basiswa, maphanzeve ma engisa, vafi va wuswa, sisiwana sa txhumayelwa Evhangeli.

Masalmo 102:20

kasiku engisa kuvilela ka tikhumbi ni kuhulukisa avale va nga abaniselwa kufa.

1 Samuwele 22:2

Se votshe vathu vale va nga ti ti xaniseka, ni votshe vathu vale va nga ti ni minandu, ni votshe vathu vale va nga ti ni moya wo biha, va to sengeletana kwakwe, se ene e va mthangeli wawe; vale a nga ti na vo i ti vo dingana 400 wa vavamna.

2 Samuwele 14:16

Nguko mfumeli a na engisa, kasiku hulukisa txithumi txakwe txa txisikati, manzani ka m'thu wule a lavako ku ni lovisa kumweko ni mwanana wangu, ka thomba ya Txizimu.

Jobe 36:15

Txizimu txa txhatxhisa wo xaniseka kuxanisekani kwakwe, txa ti pfalisa tinzeveni ka vo xaniseka.

Masalmo 55:17

Ni minova, ni mixo, ni dhina ni na khongela; ni na kwangula, se ene a na engisa dipswi dangu.

Mavingu 29:7

M'thu wo lulama wa ziva kuxaniseka ka sisiwana, kambe muonhi kha nga ni mhaka nito.