Masalmo 68:8 - Bhiblia Yo Sawuleka

⁸ mafu ma to dekadeka, se mati me wa ngu nzumani, ngu mhaka ya kuva txi diho Txizimu txa Sinayi, ngukuva a diho Mkoma, Txizimu txa Israyeli.

Masalmo 68:8 Referans Kwoze

Eksodha 19:18

Mmango wotshe wa Sinayi wu to tuvika, nguko Mkoma a ti relete e maneka txitimwi ka wona, ngu hagari ka mdhikila wa mndilo. Wutshi wu wu nga ti tuvika wu txi guleka, i ti ku nga wa dibivi se mmango wotshe wu to dekadeka ngu mtamo.

Eksodha 19:16

Kutxani ka ditshiku da wuraru, ku to maheka singwalangwanda ni tinyangafula ni direfu da mtima di to fenengeta mmango, se kudhuma ka mtamo ka mpundu ku to pfala ngutu. Dibutho da vathu di nga ti wugoveloni di to dhudhumela.

Vahebheru 12:26

Ene wu dipswi dakwe di nga zinginisa mafu, konkuwa a huwelela a txi khene: “Ni na tshumela ni txi zinginisa kambe, i si nga mafu dwe, aniko ni yona nzuma na yi zinginisa.”

Isaya 45:3

Se ni na kuninga tithomba tile ti nga siswa, ni tile ti nga fenengetwa, kasi ku u na tiziva tito, ani ngani Mkoma, Txizimu txa ka Israyeli, ni ku dhanako ngu ditina dako.

Masalmo 77:18

Kudhuma ka singwalangwanda sako ku to pfala txitimwi kukeluka ka nzuma ku to woningeta ditiko dotshe; mafu ma to dekadeka ma txi dhudhumela.

Masalmo 68:35

Txizimu txa thaviseka txiluveloni ka txona ko sawuleka, Txizimu txa ka Israyeli txi ningako mtamo ni wukoma ka vathu va txona! Txi na dhumiswe Txizimu!

Masalmo 41:13

A na dhumiswe Mkoma, Txizimu txa ka Israyeli, konkuwa ni yotshe mbimo! Ti na maheke! Amen ni amen!

Isaya 64:3

Mbimo yile u nga ti ti maha timhaka to thisa, ti hi nga ti sa ti verela, u ti ti txhika, se mimango yi ti ti zinginika masoni kwako.

Masalmo 114:7

Awe mafu, dhudhumela masoni ka Mkoma, masoni ka Txizimu txa Jakobe,

Mtuletelo 11:19

Dithepele da Txizimu di ku nzumani di to tuleka, se wu txi woneka dibhokiso da txitumelelano Dithepeleni ka txona. Se ku to woneka kukeluka ka nzuma, mapswi, singwalangwanda, kutsekatseka ka mafu ni txingulu txa hombe txa maralala.

Habhakuki 3:13

Awe u humile kuya hulukisa vathu vako, kuya hulukisa msawuleki wako; awe u gangile msungo wa nyumba ya wo biha, u fumbula makhato a nyumba kala magwito. (Selahi)

Isaya 64:1

O! I ti ku wo bhanda nzuma u txhika! I tiku mimango yo zinginika masoni kwako!

Eksodha 13:18

Konako, Txizimu, txi mahile ti to vathu va txi tenderuka ngu nzila ya txiwula hafuhi ni lineneni lo Bhilivila; kambe vanana va ka Israyeli va humile ngu ditikoni ka Egipta va di xomile.

Valamuli 4:14

Sekoko Dhebhora a to khene ka Bharake: Ti lulamisele nguko nyamsi ngu dona ditshiku di Mkoma a no ningela Sisera manzani kwako. Ina Mkoma hi nga ene a thangelako masoni kwako kani? Konaho Bharake a to relela ngu mangoni ka Tabhori ni 10.000 wa vavamna.