Masalmo 51:11 - Bhiblia Yo Sawuleka

¹¹ U nga ni rethele kule ni nawe, u nga ni tekele moya wako wo sawuleka!

Masalmo 51:11 Referans Kwoze

Vaefesu 4:30

mi nga henyiseni Moya wo Sawuleka wa Txizimu, awu mi nga vekelwa ngu wona txixambanyo txa kukomba ti to mi lumba Txizimu ka ditshiku diya txona txi nota mi tirula ngu dona ka magwito.

2 Vafumeli 13:23

Sekoko Mkoma a to va pfela wumbilu, e va xanisekela, a to va rendekela ngu mhaka ya kuranda txitumelelano txakwe ni Abrahama, ni Isaake ni Jakobe; kha lava ku va khundumusa, kambe kha va tsotsha kule ni nene.

Varoma 8:9

Kambe anu kha mi fumwi ngu mmidi, aniko mi fumwa ngu Moya, ngako ngu ditshuri Moya wa Txizimu wu di zumbile mndani kwanu. Aniko awule a ku si nga ni Moya wa Kristu kha lumbi ene.

Genesisi 6:3

Sekoko, Mkoma a to khene: “Moya wangu kha wu na mbi zumba yotshe mbimo ka m'thu, nguko m'thu i nyama, ni masiku akwe kha ma na mbi pinda 120 wa malembe.”

Johani 14:26

Kambe Mthaveleli, i ku Moya wo Sawuleka, awu Tate a no mi rumela ngu ditina dangu, ene a nata mi gondisa sotshe simaha ni ku mi alakanyisa totshe ti ni khalako ku mi gela.”

Luka 11:13

Ngu toneto, eko hambi anu, mi ku vabihi, mi zivako kuha sa sinene vanana vanu, ngutu-ngutu Tate wa nzumani a na pindisa ngutu kuninga Moya wakwe wo Sawuleka, ka vale va mkombelako!”

Masalmo 71:18

Se konkuwa, ni nga kumba ni basa misisi, awe Txizimu, u nga ni leke, nguko ni ngadi ni txi na xawutela ka liveleko liya ni ka va va nota, wukoma wako ni mtamo wako.

1 Samuwele 16:14

Se Moya wa Mkoma wu to khukha ka Sawule e sala a txi xaniswa ngu moya wo biha, wutako ngu ka Mkoma.

1 Samuwele 10:10

Se mbimo yile va nga hoka mmangoni, mtxawa wa vaprofeti wu to huma u va hingeta; aniko Moya wa Txizimu wu to wulela kwakwe, se e profeta hagari kwawe.

Valamuli 16:20

Se Dhalila a to khene: “Ayiwee! Vafilista ndiva va kutelako Samusoni.” Se a to vhumuka ngu wukoheni kwakwe, a txi khene: “Ni na huma kambe ni konkuwa, ni ti hulukisa, kufana ni simwani sikhati.” Nguko ene a ti si ti zivi ti to Mkoma se a khukhile kwakwe.

2 Vatesalonika 1:9

Txitsayiso txawe ku nava kulova ko mbi guma, kha va na mbi ka nga yi wona khohe ya Mkoma, hambi kuphatima ka wukoma wakwe,

Masalmo 71:9

U nga ni tshotshe, kukumbani kwangu; u nga ni leke, ngako ni di gumile mtamo.

2 Vafumeli 24:20

Se ti mahisile tiya ngu mhaka ya txiviti txa Mkoma txitimwi ka Jerusalema ni ka Judha, eza e va nyenya masoni kwakwe; se Zedhekiya a to wukela mfumeli wa Bhabhilona.

2 Samuwele 7:15

Kambe wunene wangu wu na mbi khukha kwakwe, ku nga kule ni nga wu thavisa ka Sawule, awule ni nga mthavisa masoni kwako.

Valamuli 15:14

Se ngako a di hokile Leki, Vafilista va to m'hingeta, va txi giya ngu litsako; aniko Moya wa Mkoma wu to ta kwakwe ngu mtamo, se majoke ale va nga ti msungile ngu ona mawoko, ma to nyivilika nga tihinza ta linyu ti nga hiswa, se ni sifundo sa majoke si to thukunyuka mawokoni kwakwe, si txi wa.

Jeremiya 7:15

Ni na mi tutumisa masoni kwangu, ngako ni hinganako ni ti tutumisile tindiyanu totshe, lihunzu lotshe la ka Israyeli.

Masalmo 43:2

Awe ngawe Txizimu, mlweli wangu! Ngu kutxani u txi ni rethela kule kani? Ngu kutxani ni zumbako kuxanisekani, ni tsotsorolwa ngu mlala kani?

Genesisi 4:14

Wa ni tutumisa nyamsi ka ditiko diya; ni kurumetwa kusisala kule ni khohe yako, ni na tsimbila ni txi thava-thava ni kupepeseka ha mafuni, ni wu a no khata ku ni mana, a na ni daya.”

Varoma 1:4

aniko ngu ka Moya wo Sawuleka, a kombisilwe ti to i Mwanana wa Txizimu, ngu kuwuka kwakwe ngu ka vakufa, ene Jesu Kristu Mkoma wathu.

2 Vafumeli 23:27

Se Mkoma a to khene: Kambe Judha ni na mthavisa masoni kwangu, ku nga kule ni nga thavisa Israyeli, ni na tsukula didhoropa diya da Jerusalema ni ngadi sawula, kumweko ni nyumba yile ni nga khani: Di nava konemo ditina dangu.

Valamuli 13:25

Se Moya wa Mkoma wu to khata ku muhumela a di digoveloni ka Dhani, hagari ka Zora ni Exitawoli.