Masalmo 42:4 - Bhiblia Yo Sawuleka

⁴ Moya wangu wa dhudhumela, ngako ni txi alakanya, mbimo yi ni nga ti longoloka ni vale va nga ti ya Nyumbani ka Mkoma va txi peka mikulungwani ya kutsaka ni kubonga, ni kugiringa ka vathu va kutsaka.

Masalmo 42:4 Referans Kwoze

Isaya 30:29

Ku nava ni ndando hagari kwanu, kufana ni wusiku wu ku mahwako m'buso wo sawuleka; ni kutsaka ka mbilu, ko fana ni ku humako mbimo ku yi ku vetwako tshodi, kasi ku ta mmangoni ka Mkoma, ka dirigwi da ka Israyeli.

Masalmo 122:1

Ni tsakile mbimo yi va nga kha vona kwangu: “A hi yeni Nyumbani ka Mkoma!”

Masalmo 62:8

Votshe va na themba txona Txizimu yotshe mbimo va txi txi dhumisa ngu yotshe mbilu! Txizimu mbuthavelo wathu!

Nahume 1:15

Wonani mikondo txitimwi ka mimango ya wu a tisako mahungu a maphya, ya wu a huwelelako kudikha! Maha mibuso yako, awe Judha, hetisa sixambanyo sako, nguko m'bihi kha na mbi ngadi kambe a txi pinda ngu kwako; ene a na loviswa do gwita.

Masalmo 100:4

Wulelani dithepeleni kwakwe mi txi bonga; wulelani siluveloni kwakwe, na mi txi embelela; mu dhumiseni mi bonga ditina dakwe!

Masalmo 55:14

awule ni sengelako nayo amu ka milayo yo tsakisa, awule ni nga ti longoloka nayo ngu kutsaka ni ya Dithepeleni ka Txizimu!

Luka 16:25

Abrahamu a xamute a txi khene: ‘Mwanangu, alakanya ti to awe u amukete mathomo ako kuhanyani kwako, aniko Lazaro ene a amukete sixaniso; se konkuwa ene wa mana kuruliswa mbilu, aniko awe wa mana sixaniso.

Sidilo 2:19

Wuka, u peka nyandayeyo, u dila kukhatani ka sigava sa mikombelo ya wusiku, tshakunuta sotshe si si ku mbiluni kwako. U txi si humisa kubasani, masoni ka nyamne wa sotshe. Guleta mawoko ako kwakwe, u txi phaxela vanana vako, ava vafako ngu nzala sidingeni ka otshe magondo.

Jobe 29:2

A! Ngu nga ku na mana mahanyelo a mitxima yile yi nga pinda, ku nga masiku ale Txizimu txi nga ti ti ni xayisa!

2 Makronika 7:10

Ngu ditshiku da magumi mambidi ni masiku mararu, ka mtxima wa wutxhanu ni wumbidi, mfumeli Solomoni a to hangalasa vathu, se va to tsula matendani kwawe, va di tsakile ngutu ta tinene, ngu mahaka ya totshe ta tinene tile Mkoma a nga mahela txithumi txakwe Dhavhidha, ni Solomoni, ni vathu vakwe va Israyeli.

Rute 1:21

Ni tsute ni di taletwe, aniko Mkoma a ni wuyisa ni si nga ni txilo! Ngu kutxani koko mi no ni dhana ku Nowemi kani? Na kuve Mkoma a ni tshuralete, awu wa Mtamo-wotshe a ni xanisile ngutu.”

Dhewuteronome 16:11

Se u na tsaka masoni ka Mkoma, Txizimu txako, awe ni mwanana wako wa mfana ni wa dihorana, ni khumbi yako ya wamwamna ni ya wamsikati, ni Mulevhi wule a hanyako didhoropani kwako, ni mluveli, ni wo felwa ngu vaveleki, ni noni, avale va hanyako kumweko ni nawe, mi na ya tsakela ka wukhalo wu wu nga sawulwa ngu Mkoma, Txizimu txako, kasi ku ditina dakwe di txi zumba kona.

Sidilo 4:1

Hi nga wona ati nzalama yi nga khurumbelisa tona, yi luzeketwe ngu kudikha ka yona! Marigwi a wukhalo wo sawuleka, ma hangalasilwe kotshe mabhudhulani.

2 Vafumeli 18:30

Kambe ni kudotho Ezekhiya kha na mbi mi maha mi themba ka Mkoma, a txi khene: Ngu ditshuri Mkoma a na hi hulukisa, kambe didhoropa diya kha di na mbi ningelwa manzani ka mfumeli wa Asiriya.

2 Vafumeli 18:32

Kala mbimo yile ni nota mi heleketa ka ditiko do fana ni danu, ditiko da fulaho ni vhinya, ditiko da dipawu ni mindonga ya mihando, ditiko da miolivha, da mtona ni wulombe; se mi na hanyiseto kha mi na mbi fa; mi nga mu engiseni Ezekhiya, nguko wa mi kujetela a txi khene: Mkoma a na hi txhatxhisa.

Masalmo 79:10

Nguko vamatiko va na wotisa va txi kha vona: “Txizimu txako txi hani kani?” Va kombe vathuvo, masoni kwathu, kuphotela ka mnoha wa vathu vako, awu wu nga theketwa!

Masalmo 80:6

U hi mahile tikhumbi ti mifumo ya vaakelani yi bangelanako ngu tona, u lekile valala vathu va txi hi ruketela.

Masalmo 102:10

ngu mhaka ya kuhenya kwako ni kutsukula kwako; u ni guletile, ngu msana u txi ni tshotsha.

Masalmo 115:2

Nguko, vamatiko va nga simama ve wotisa, va txi kha vona: “Txi hani Txizimu txanu kani?”

Masalmo 122:8

Ngu lirando ka vanathu ni vangana vangu, ni na khani: “Kudikha ku nave ni nawe!”

Ezekhiyele 46:10

Se mthangeli a na wulela ni vathu mbimo yile va wulelako, e huma kumweko navo mbimo yile va humako.

Joyeli 2:17

Va na dile vaphaxeli, va thumelako Mkoma, hagari ka m'hubhe ni txiluvelo, va ne kha vona: Tsetsa vathu vako, awe Mkoma, kambe u nga ningele thomba yako tinganani, kasi ku matiko ma txi yi xakela: Nguko kutxani va no kha vona ka vathu: Txi hayi Txizimu txawe, kani?