Masalmo 39:6 - Bhiblia Yo Sawuleka

⁶ Ene wa pinda kufana ni mtsudi! Kha ti vhuni txilo kusengeletela tithomba, na asi ti zivi ti to ti na sala ni mani.

Masalmo 39:6 Referans Kwoze

Ekleziyaste 2:26

Nguko Txizimu txa ninga wutxhari, ni wuzivi, ni litsako ka m'thu wule i ku mnene masoni ka txona; aniko ka muonhi txi mninga mthumo, kasi ku e sengeletela ni kuwungeletela, se e ninga wule a nga maha ta tinene masoni ka Txizimu. Eto ni tona mbukanganyisi, ni kuxaniseka ka moya.

Jakobe 4:14

Anu, ni ka kudotho kha mi tizivi ti ti no maheka mangwana! Wutomi wanu nji txani, kani? Nguko anu mi hunguva yi yi humelelako mbimwanyana, yi txi hangalaka.

1 Vakorinto 7:31

ani va va londolako sa mafu awa, va ne nga kha va si thumisi, nguko mazumbelo a ditiko diya ma guma.

Ekleziyaste 12:13

Ka totshe ti u nga tipfa, magwito a tona ngu awa: Thava Txizimu, u xayisa milayo ya txona; nguko ayiya ngu yona fanelo ya votshe vathu.

Ekleziyaste 5:14

Nguko tona tithomba eto, ti mwalala ngu dikhombo dokari; se ngako a di ni mwanana, kha ku sali txilo manzani kwakwe.

1 Pedro 5:7

Vekani ka Txizimu kotshe kukarateka kwanu, nguko txona txa mi khatalela.

Luka 12:29

Kambe anu mi nga vileleni ngu si mi no dya ni si mi no sela, mi nga kanakaneni;

Isaya 55:2

Mi xakelela txani male ka sile i singako sakudya kani? Ni mihando ya mthumo wanu, ka sile si si khurisiko kani? Ni engiseni kha kwati, mi nadya so tshamba, ni mihefemulo yanu yi na tsaka ngu so nona.

Ekleziyaste 12:8

Wukanganyisi wa wukanganyisi, kuwomba M'gondisi, sotshe mbukanganyisi.

Ekleziyaste 2:8

Ni to ti sengeletela silivhela, ni nzalama, ni tithomba ta vafumeli ni ta matiko a hombe; ni ti lavete vaembeleli va txiwamna ni va txisikati, ni ku ti tsakisa ngu vanana va vathu, ni siya so embelela ngu sona sa totshe tixaka.

Ekleziyaste 1:14

Ni to wonisisa yotshe mithumo yi yi mahwako hahatshi ka ditambo, se ni wona ti to totshe mbukanganyisi, ni kuxaniseka ka moya.

Mavingu 13:22

M'thu wa wunene, a siyela thomba vanana va vanana vakwe, aniko thomba ya muonhi yi ningelwa ka wo lulama.

Masalmo 127:2

Kha ti mi vhuni txilo kuphindula ni mixo ngutu, mi txi pila mi txi thuma kala hagari ka wusiku, kufela kudya mihando ya mnyuko wanu, na kasi Txizimu, ka vale txi va randako, txa va ninga soneso, hambi va di otete.

1 Pedro 1:24

Nguko, m'thu wuhi ni wuhi a fana ni mwasi, kupfaliswa kwakwe kotshe, kufana ni txiluva txa mwasi, mwasi wa oma, se txiluva txi mora,

Jakobe 5:3

Kubhirela kuwa kufakaza likungo lanu, akuwa ku no dya nyama yanu nga mndilo. Mi sengeletile tithomba ka masiku o gwitisa.

Mavingu 27:24

Nguko tithomba hi nga ta kwa mbi gwita; ina m'bhoti wu ndi na pindukela ka liveleko ni liveleko kani?

Mavingu 23:5

Ina u nga dhuka u ronokela sa kuva i si nga sa txilo kani? Nguko eso si na ti mahela tibhapi si purumela nzumani kufana ni digama.

Jobe 7:7

Alakanya taku wutomi wangu wu fana ni moya; maso angu kha ma na mbi ngadi me wona wunene.

Jobe 7:16

Wutomi wangu na wu nyenya, nguko kha ni na mbi hanya kala kupinduka; khukha kwangu nguko, masiku angu mbukanganyisi.

Jobe 14:1

M'thu wo velekwa ngu wamsikati masiku akwe madotho, kambe ma tate ngu sikarto.

Masalmo 89:48

Ina waho m'thu wo mbi fa kani? I mani a no sikota kuhuluka ka mtamo wa lifo kani?

Masalmo 144:4

M'thu a fana ni wukanganyisi; masiku akwe ma fana ni mtsudi wu wu pindako.

Ekleziyaste 11:10

Thavisa koko kukarateka ka mbilu yako, u hambana ni kuxaniseka ka nyamani kwako, nguko wanana, ni wujaha mbukanganyisi.

Luka 12:26

Se ngako mi tandwako ngu tximaha txa txidotho, mi vilelela txani simwani kani?