Masalmo 34:14 - Bhiblia Yo Sawuleka

¹⁴ Hambuka ka wubihi, u txi maha ti i ku ta tinene; lava kudikha ngu kutimisela.

Masalmo 34:14 Referans Kwoze

Masalmo 37:27

Thava wubihi, u txi maha ati i ku ta tinene, se u na hanya kala kupinduka.

Vahebheru 12:14

Zumbani ngu kudikha ni votshe, mi lava wusawuleki; nguko, hahanze ka wona, awalo wu a sikotako kuwona Mkoma.

1 Pedro 3:11

A na vayilele wubihi, e maha wunene: A na lave kuthutha, e kusimamela.

3 Johani 1:11

Wo randeka, u nga etsetele wubihi, aniko etsetela wunene. Awu a mahako wunene, a lumba Txizimu; awu a mahako wubihi, kha txi wona Txizimu.

Mavingu 3:7

U nga ti wone u di txharihile upune; thava Mkoma, kambe hambana ni kubiha.

Varoma 12:18

Zamani kumaha ti mi ti kotako ngu didhawa danu, kasi ku mi hanya ngu kuthutha ni votshe vathu.

Varoma 12:9

Lirando li nga ve ni kuxengetela, vengani to biha, mi txi namarela ka ti i ku ta tinene.

Varoma 14:19

Ngu konaho, he xoteni kumaha ati ti vangako kudikha ni ti ti hi akako amu ka likholo.

2 Vakorinto 13:11

Magwito ka totshe, vanathu, zumbani mi di tsakile, khutalani ngu kumaha wunene, tsanisanani mi txi va ni kualakanya kumweko, mi txi hanya ngu kudikha. Txizimu txa lirando ni txa kudikha txi na va ni nanu.

1 Vatesalonika 4:11

Khutalani ngu kuhanya ngu kuthutha, mi ti karata ngu kuthuma ka ti ti mi lumbako, mi thuma ngu manza anu, nga ti hi nga mi layisa tona.

Titosi 2:14

Ene a ti ningete ngu mhaka yathu, kufela ku hi tirula ka wotshe wubihi, kasiku ene e ti basisela ngamu yi yi no va i di yakwe, ayi yi khutalako amu ka mithumo ya yinene.

Varoma 14:17

Nguko Mfumo wa Txizimu hi nga kudya ni kusela; aniko ngu kululama, ni kudikha, ni kutsaka ngu ka Moya wo Sawuleka.

Mavingu 8:13

Kuthava Mkoma ngu venga wubihi; na venga kutikulisa ni mahanyelo o biha, ni nzila ya walo, ni txisofu txo ruketela.

Jobe 28:28

Aniko txi to kha txona ka m'thu: Wona taku txithavo ka Mkoma, ngu txona i ku wutxhari, se ni kuhambana ni wubihi, ngu kona i ku wuzivi.

Matewu 5:9

Va katekile ava va thumelako kudikha, nguko va na dhanwa ku mbanana va Txizimu!

2 Timoti 2:19

Hambi keto, makhato o tsana ma nga vekwa ngu Txizimu ma ngadi zumbisekile, ma nyathetwe txitambu txa dipswi diya di ku: “Mkoma wa va ziva ava va mlumbako.” Ni tiya kambe taku: “Wuhi ni wuhi a fakazako ngu ditina da Mkoma a na hambane ni wubihi.”

Mavingu 13:14

Gondo ya txhari, njisima txa wutomi, txo vayilelisa m'thu ka milawu ya lifo.

Masalmo 120:7

Ani ni dikhile, ngu kuva ni womba-womba, vona se va mndani ka yimbi!

Vagalatiya 6:10

Ngu konaho, he maheni wunene ka votshe vathu, na hi di ngadi ni mbimo, ngutu-ngutu ka makholwa kulothu.

Vahebheru 13:16

Mi nga divaleni kumaha ta tinene, mi txi abana ni vakwanu asi mi ku naso, nguko atiya ngu tona timhamba ti ti tsakisako Txizimu.

Mithumo 10:38

ti to Txizimu txi totile ngu Moya wo Sawuleka ni kutsanisa Jesu wa Nazareta; awu a nga tsimbila a txi maha ta tinene, e hanyisa votshe vale va nga ti xaniswa ngu Sathani, nguko Txizimu txi ti ni nene.

Masalmo 39:2

Ni malate ni si wombi txilo, kha na womba dipswi ni da dimwedo. Aniko kupandiseka kwangu ku to engeteleka;

Mavingu 4:24

Vayilelisa txisofu txako ka mapswi o xanisa, u tsulisa kule ni nawe wubihi wa txisofuni.