Masalmo 34:13 - Bhiblia Yo Sawuleka

¹³ Ngu kota yeto, hambana ni kuruketela: Txisofu txako txi nga thuke txi womba makuhu.

Masalmo 34:13 Referans Kwoze

Masalmo 141:3

Mkoma, veka muwoneleli wa txisofu txangu ni mxayisi ha txikeni ka txisofu txangu.

Mavingu 21:23

Awule a xayisako txisofu txakwe ni lidimi lakwe, wa vhikela dihika dakwe ka sikarato.

1 Pedro 2:22

Ene kha maha txionho, ni txisofu txakwe kha txa womba makuhu.

Jakobe 1:26

Ngako, m'thu a txi pimisa ti to dikholwa, kambe a si ñoli lidimi lakwe, a txi ti kanganyisa apune, a na ti zive ti to wukholwa wakwe, kha wu vhuni txilo.

Vakolosa 3:9

Mi nga hembelaneni, nguko mi xivite m'thu wa kale ni hanyelo yakwe;

Jakobe 1:19

Ti ziveni tiya, vanathu vo randeka; m'thu wuhi ni wuhi a na kuluvete kuengisa, a txi swela kuwomba, a txi swela kuhenya.

Jakobe 3:2

Nguko, hotshethu ha onha sikhati so tala. Awule asi onhiko amu ka kuwombawomba, ngu ditshuri i m'thu wo hetiseka, awu a sikotako kuvekela matomu wotshe mmidi wakwe.

Mavingu 13:3

Awule a veketako txisofu txakwe, a xayisa moya wakwe, aniko m'thu wa siwombawomba wa ti xanisa.

Mavingu 12:22

Txisofu txo womba-womba makuhu, njinyenyeko ka Mkoma, aniko avale va tsimbilako ngu kuthembeka va mtsakisa.

Mavingu 12:19

Mapswi a ditshuri ma na zumba yotshe mbimo, aniko mawombawombelo a makuhu, nga mbimo ya yidotho.

Masalmo 39:1

Ani ni to khani: Ni na xayisa tinzila tangu, kasi ku ni si onhi ngu lidimi langu; ni na xayisa txisofu txangu ngu matomu mbimo yile m'bihi a ku masoni kwangu.

1 Pedro 2:1

Ngu toneto, lekani wotshe wubihi, makuhu, wuxengeteli, livengo, ni totshe tixaka ta siruko,

Mavingu 18:21

Kufa ni kuhanya si mtamoni ka lidimi; se awule a li dhundako a na dya mihando ya lona.

Mavingu 19:9

Fakazi ya makuhu kha yi na mbi huluka kutsayiswa; se ni wule a wombawombako makuhu, a na lova.

Masalmo 55:11

Mndani ka didhoropa kumaneka wubihi; magondoni ka dona kha ku gwiti kuxanisana ni kuxengetelana.

Isaya 63:8

Nguko Mkoma a ti ti khene: Kha ditshuri, vona i vathu vangu, vanana va va na kwa mbi womba makuhu. Ngu toneto, ene a to va Muhanyisi wawe.

Mavingu 12:7

Vaonhi va na kanganyiswa, kambe va na fuviswa, aniko nyumba ya vo lulama yi na tsana.

Jobe 15:13

Moya wako wu tshuralela Txizimu ngu kutxani, se u leka mapswi o ngeto me huma ngu mkanani kwako kani?

Amosi 5:14

Lavani wunene i si nga wubihi, ti to mi hanya, koneho Mkoma, Txizimu txa Mabutho a Tiyimbi, a na va ni nanu, nga ku mi wombako.