Masalmo 33:11 - Bhiblia Yo Sawuleka

¹¹ Aniko makungo a Mkoma ma zumba mbimo yotshe; mipimiso ya mbilu yakwe ya simama ka liveleko ni liveleko.

Masalmo 33:11 Referans Kwoze

Mavingu 19:21

Mbiluni ka m'thu ku ni timhaka tatingi, aniko txileleto txa Mkoma txi na zumba yotshe mbimo.

Isaya 46:10

ni zivisa magwito kukhukhela makhatoni, ni kukhukhela kale ngutu atile ti sanziko kumaheka; ni ku khani: “Makungo angu ma na tsana, se ni na maha kotshe kuranda kwangu”;

Jobe 23:13

Se ngako Txizimu txi txi wukela wokari, sekoko i mania waku a nga txi jikisa kani? Ati ti lawako ngu moya wa txona, txi na maha toneto.

Jeremiya 29:11

Nguko na tiziva ti ni xuvako tona ngu nganu, kuwomba Mkoma: Maalakanyo a kuthutha, na i si nga a dikhombo, ti taku ni verela masiku matako.

Sidilo 3:37

I mani wule a nga wombako ti txi maheka kani? Ngako i si nga Mkoma a wombako kani?

Isaya 14:24

Mkoma wa Mabutho a Tiyimbi a xambanyile, a txi khene: Ati ni nga ti pimisa ti na mahisa toneto; se ati ni nga womba ti na mahekisa toneto.

Isaya 14:27

Nguko Mkoma wa Mabutho a Tiyimbi a tsanisile; i mani koko a no kaneta kani? Se a guletile diwoko dakwe; i mani koko a ngadi tshumetelako msana kani?

Dhaniyeli 4:37

Se konkuwa koko, ani Nebhukodhonosori, na bonga, na guleta ni kudhumisa Mfumeli wa nzumani; nguko mithumo yakwe yotshe di ditshuri, ni tinzila takwe do lulama, kambe wa sikota kuveka hahatshi a vale va tikulisako.

Vaefesu 1:11

Ngu ngene Kristu kambe, Txizimu nathu txi hi mahile vadyi va thomba ya Txona, nga ti txi nga ti wonisa tona txona txi kotako totshe ngu mtamo wa kuranda ka txona,

Masalmo 92:5

Mkoma, mithumo yako nja hombe ngutu, mapimo ako ma etile ngutu!

Mika 4:12

Aniko kha va ma zivi mapimiselo a Mkoma, kambe kha va pfisisi kukawuka kwakwe, nguko a va sengeletile ku nga mafaka a mu txizendani.

Mithumo 15:18

Awu a nga zivisa simaha siya kukhukhela ka timbimo ta kale.’ ”

2 Vafumeli 19:25

Ina u nga va u sa tipfa taku ngu kale ni ti mahile toneto, niku kukhukhela masiku a kale ni si vangile kani? Sekoko konkuwa ni ku tisile, kuva u ta khozisa madhoropa a mtamo me maha situletule sa siwula.

Ekleziyaste 3:14

Ani na tiziva to sotshe si Txizimu txi si mahako, si na simama kala kupinduka; kha ku dingani kuengetelwa txilo, hambi kuthaviswa txilo. Se eto Txizimu txi mahela ti to ku va ni txithavo masoni ka txona.