Masalmo 18:27 - Bhiblia Yo Sawuleka

²⁷ Awe wa hulukisa avale va ti vekako hahatshi kambe wa wisa hahatshi avale va ti guletako.

Masalmo 18:27 Referans Kwoze

Jakobe 2:5

Engisani, vanathu vo randeka: Ina kasi Txizimu kha txa langa vathu va sisiwana ditikoni muwa, kufela kuve maha vanyatithombe mu ka likholo, ni vadyi va thomba ya Mfumo wu txona Txizimu txi nga wu thembisa ka vale va txi randako, kani?

Isaya 66:2

Nguko dianza dangu di mahile sotshe simaho siya, se sotshe simaha siya si to mahwa, kuwomba Mkoma; aniko wonani awu ni no muwona: Ka txisiwana, ni wule wo xaniseka moyani, kambe a dhudhumelako masoni ka dipswi dangu.

Isaya 57:15

Nguko a womba tona eto Nyatxitimwi, wa Kuthaviseka, a zumbako kupindukani, eyo ditina dakwe i ku Kusawuleka: Ni zumba ka wukhalo wo guleka ni kusawuleka, kumweko ni kuxaniseka, ni kukarateka moyani, kasi kuwusa moya wa vale vo karateka, ni kuwusa timbilu ta vaxaniseki.

Masalmo 101:5

Awu a lengako ni kusingeta mmwani m'thu, ni na mfuvisa ngu nyahele; kha ni na mbi timisela wa kutiguleta ni kutikukumukisa!

2 Samuwele 22:28

Se awe wa txhatxhisa vathu va va xanisekako, aniko maso ako ma wukela vale va ti guletako, kambe awe wa va wisa hahatshi.

2 Vakorinto 8:9

Ma wu ziva wunene wa Mkoma wathu Jesu Kristu. Ene hambiko i ku nyamne wa sotshe, a ti mahile txisiwana, kasiku anu mi txi mana sotshe ngu mhaka ya wusiwana wakwe.

Masalmo 9:18

Kambe awu i ku txisiwana kha na mbi divalwa yotshe mbimo, ni kuthemba kwakwe kha ku na mbi luza ka yotshe mbimo.

Isaya 10:12

Ngu kumaha keto, mbimo yile Mkoma a no heta wotshe mthumo wakwe mmangoni ka Siyoni, kona Jerusalema, sekoko ni na tsayisa mihando ya mfumeli wa Asiriya, ngu mhaka ya kutikulisa ka mbilu yakwe, ni kutiguleta masoni kwakwe.

Isaya 3:9

Tikhohe tawe ta va kona; va andisa sionho sawe, kufana ni Sodhoma; kha va si baramisi. Dikhombo ka mihefemulo yawe! Nguko vo ti mahela kubiha vona vapune.

Mavingu 30:12

Ku ni liveleko li ti wonako li di sawulekile, na kuve kha li zivi ka nga kuwulwa kubihani ka lona.

Masalmo 40:17

Mkoma, ni xayise, ani ni ku txikulungu txo mpwata-ni-wangu! Awe ngawe m'vhuni wangu ni m'hulukisi wangu; u nga swele, Txizimu txangu!

Masalmo 34:19

Vathu vo lulama va dukwa ngu sixaniso so tala, aniko Mkoma wa va hulukisa ka sotshe.

Masalmo 34:6

Ngako txisiwana txi txi dhana Mkoma, ene wa txi xamula, kambe wa txi hulukisa ka sotshe sixaniso.

Masalmo 17:13

Khukha u txi ema, Mkoma! Va hinge u txi va dikha hahatshi! Ni hulukise ngu ditxhari dako, ka vathu va kubiha;

Masalmo 17:10

Va bangisile mbilu yawe ngu mafura va womba-womba ngu kutikulisa.

Masalmo 10:4

Kutikulisani kwakwe m'thu wo biha kha khatali ngu Mkoma, a khene: “Txizimu kha txi mahi txilo ngu kuhenya ka txona.” Ene a pimisa tito; Txizimu kha txi nga ho.

Luka 18:14

“Na mi gela ku khani awuwa ngene a nga tshumela e tsula m'tini kwakwe, a di basisilwe, ani wule mmwani mahala, nguko awuwa a ti guletako, a na vekwa hahatshi, ani wu a ti vekako hahatshi, a na guletwa.”

Hoseya 4:6

Vathu vangu va lovisilwe, ngu kule va nga pwata wuzivi; nguko awe u lambile wuzivi, se nani na kulamba, kasiku u si mahi mphaxeli masoni kwangu; akule u nga divala mlayo wa Txizimu txako, nanani ni na divala vanana vako.