Masalmo 118:27 - Bhiblia Yo Sawuleka

²⁷ Mkoma ngene i ku Txizimu, ene ngene a hi woningako! Khatani kumaha mibuso, mi txi longoloka mi di ñote matshanzu, kala kuhoka txiluveloni.

Masalmo 118:27 Referans Kwoze

Johani 8:12

Jesu a to tshumela a txi womba-womba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.”

Masalmo 18:28

Mkoma, awe u liwoningo langu, awe, Txizimu txangu ngawe u woningako mtema wangu.

1 Pedro 2:9

Ngu toneto, anu mi liveleko lo sawuleka, vaphaxeli va wukoma, mfumo wo sawuleka, vathu va va lumbako Txizimu, kasiku mi na tsimbila mi txi rurutela mithumo ya kuxamalisa ya Txizimu, atxi txi nga mi humisa txidemani, txi mi wuyisa liwoningoni ka txona ko xamalisa;

Isaya 60:1

Wuka, woninga, nguko liwoningo lako lata, ni wudhumo wa Mkoma wa humelela txitimwi kwako.

Isaya 9:2

Vathu va va nga ti tsimbila txidemani, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.

Esteri 8:16

Se ka Vajudha kuho kuwonekela, ni kutsaka, ni wudhumo, ni wudhundo.

Masalmo 37:6

Ene a na wonekelisa kululama kwako ni fanelo yako kufana ni ditambo di woningako ni mitshikari.

1 Vafumeli 18:39

Aha dibutho di nga ti wona tiya, di towa ngu tikhohe ta dona di txi kha dona: Mkoma ngene dwe i ku Txizimu! Mkoma ngene dwe i ku Txizimu!

Malakiya 4:2

Aniko kwanu anu mi thavako ditina dangu, ku na huma ditambo da wululamo, se wuhulukisi wu na va hahatshi ka tibhapi ta dona; kambe mi na huma mi txi ndaka-ndaka ku nga marole hahanze ka txibala.

1 Vafumeli 18:21

Sekoko, Elija a to tshuketa hafuhi ka votshe vathu a txi khene: Mi na khwita hagari ka mipimiso yimbidi kala yihi mbimo kani? Ngako Mkoma i di Txizimu mlondiseleni; ni loku i di Bhahali, mlondiseleni. Hambi keto, vathu kha va mxamula txilo.

Eksodha 38:2

Ka makhona a mune a mahile titxheho; ti nga ti patani ni txiluvelo; se e bhama ngu koporo.

Eksodha 27:2

Amu ka mune wa makhona u na wumba mune wa titshulu, ati ti no ñolana ni txiluvelo, ti txi maha txiwumbeko tximwetxo, u txi bhama ngu koporo.

Vahebheru 13:15

Ngu ngene ahi ningeleni yotshe mbimo mhamba yo dhumisa Txizimu, ti ti wombako m'hando wa txisofu txi txi fakazako ditina dakwe.

1 Makronika 29:21

Se ka ditshiku dimwani va to maha timhamba ka Mkoma, ve ningela miphaxo ya kuhiswa, ka Mkoma: Ngu 1.000 wa marole, ni 1.000 wa tihamba, ni 1.000 wa sivuntana, ni sa kusela sa kona, ni timhamba to tala ka dotshe ditiko da ka Israyeli.

Mika 7:9

Ni na xaniswa ngu kuhenya ka Mkoma, nguko ni mu onhete, kala kuza e lamula mhaka yangu, e ni mahela madingano angu, ene a na ni wuyisa kuwonekelani, se ani ni na wona kululama kwakwe.