Masalmo 115:4 - Bhiblia Yo Sawuleka

⁴ Sizimu sa vamatiko i silivhela ni nzalama, sithombe so khandwa ngu manza awe:

Masalmo 115:4 Referans Kwoze

Dhewuteronome 4:28

Koneyo mi na ya khozela sizimu so mahwa ngu manza a vathu, sa mapulango ni sa marigwi, si si woniko mwendo kuengisa, kudya mwendo kupfa kubhumula.

Isaya 44:10

I mani a wumbako txizimu, e tshula txithombe txo vatwa, txa kwa mbi vhuna txilo kani?

Mithumo 19:26

kambe ma ti wona ni ku tiengisa va txi womba ti taku Paulo wuwa wa kujetela vathu, votala, i si nga Efesu muwa dwe, aniko a lavile kueneta dotshe ditiko da Aziya, a txi va hambukisa ngu ku va gela ku khene sizimu si si mahwako ngu manza athu, hi nga sizimu sa txilo.

Isaya 37:19

Kambe va rinzile ha mndiloni sizimu sa ona; nguko i si nga sizimu, aniko i ti mithumo ya manza a vathu, yo mahwa ngu mapulango ni marigwi; ngu mhaka yeto, va si khundumusete.

Mithumo 19:35

Sekoko ngu kugwitisa, mabhalani a to malata dibutho, a txi khene: “I mani m'thu wu a si tiziviko ti to didhoropa da Efesu, ngu dona di xayisako dithepele da Wahombe Artemi, ni txithombe txakwe, txi nga wa ngu nzumani, kani?

Hoseya 8:6

Nguko edo ngu dona dirole do mahwa ngu Israyeli; mtshuli a ngadi maha, hi nga Txizimu. Aniko dirole da Samariya di na funyetelwa di maha sihwika.

Masalmo 97:7

Va na wiswa tingana votshe vale va khozelako sithombe, votshe vale va ti guletako ngu sizimu so mbi vhuna txilo; ni sotshe sizimu si na khizamele Mkoma Txizimu!

Isaya 44:20

Adya dikhuma; mbilu yakwe ya wukanganyisi yi m'hambukisile, aha ko kha na kuhulukisa wutomi wakwe, hambi kuwomba ku khene: Ina kha ku nga ni makuhu ka dianza dangu da txinene kani?

Isaya 42:17

Va na tshumelela msana se va na wa tingana avale va thembako sithombe so vatwa, va ku kha vona ka sithombe so wumbwa: Anu mi sizimu sathu.

2 Vafumeli 19:18

Va tshotshile sizimu sawe mndiloni, ngako i nga si nga sizimu sa txilo, aniko i ti mithumo ya manza ya vathu, nzithombe so mahwa ngu mapulango ni marigwi; ngu mhaka yeto, va si khundumusete.

1 Vafumeli 18:26

Se va to teka dirole dile va nga ningwa, ve di lulamisela; se va to khongela ditinani ka Bhahali, kukhukhela ni mixo kala ni hagari ka mitshikari, va txi kha vona: Awe Bhahali, hi xamule! Aniko kha ka pfala dipswi, hambi ni wo xamula; na va txi ndaka-ndaka txitimwi ka txiluvelo txile txi nga ti mahilwe.

1 Vafumeli 18:29

Se ku to maheka a ti to ku di pindile hagari ka mitshikari, va to profeta, kala kuza mphaxo wa sakudya wu txi ningelwa; hambiketo kha ka pfala dipswi hambi xamulo, ni kwa mbi khatala ngu txilo.

2 Makronika 32:19

Va to womba-womba ngu Txizimu txa Jerusalema, nga ti va wombawombisako tona ngu sizimu sa vathu va ditiko, so mahwa ngu manza a vathu.

Isaya 44:9

Votshe vathumi va sithombe so vatwa, kha va vhuni txilo, ni simaha sawe sile va tsakako ngu sona, hi nga sa txilo; tifakazi tawe tipune kha ti woni txilo, kambe kha ti pimisi, kala kuza vona ve kanganyiswa.

Dhaniyeli 3:5

Ngako mi txipfa diguwa da mpundu, ni da msengele, ni da dikhombela, ni da ngoma, ni da fineti, ni da tshodi, ni da totshe tixaka ta sivetaveta, mi na khizama mi khozela txithombe txa nzalama, txile mfumeli Nebhukodhonosori a nga txi emisa.

Dhaniyeli 5:23

Kambe u ti kulisile masoni ka Mkoma wa nzumani, nguko siya sa Nyumbani ka Mkoma si wuyisilwe masoni kwako, se awe, ni vahombe vako, ni vasikati vako, ni sigango sako, mi sete vhinya ngu sona; Hahanze keto, u to khozela sizimu sa silivhela, ni nzalama, sa koporo, sa tisimbi, sa tiphande, ni sa marigwi, si si woniko, si si engisako, si si zivako; aniko Txizimu txi wutomi wako, ni tinzila tako totshe, si ku manzani ka txona, khwa txi dhumisa.