Masalmo 101:5 - Bhiblia Yo Sawuleka

⁵ Awu a lengako ni kusingeta mmwani m'thu, ni na mfuvisa ngu nyahele; kha ni na mbi timisela wa kutiguleta ni kutikukumukisa!

Masalmo 101:5 Referans Kwoze

Masalmo 18:27

Awe wa hulukisa avale va ti vekako hahatshi kambe wa wisa hahatshi avale va ti guletako.

Masalmo 15:3

awule asi lumbetiko mkwawe ngu lidimi lakwe ni wu asi mahiko to biha ka mmwani, asi bhumisiko phungo yo biha mwakelani wakwe;

Mavingu 30:13

Ku ni liveleko lo ti wona li ti gulekile, ni timboni ta kona ti kombako txitimwi.

Masalmo 50:20

U womba-womba kubiha ngu mwananu; wa bhumisa phungo ya kubiha mwanana wa mame wako!

Titosi 2:3

Vavasikati va masungukati ni vona va fanela kuhanya ngu nzila yi yi hanelako vathu vo sawuleka; va nga mahe valumbeti kumbe ku ti maha tikhumbi ta kusela ko pindisa;

1 Vakorinto 5:11

Ati ni nga mi bhalela, ni ti lava ku khani mi nga sengeleni ni wule a wombako ti to i mwananu, na kasi i m'gelezi, i mfeleli, i mkhozeli wa sa walo: Mruketeli, didevi, mwendo dikhokhokho. Avava, hambi kudya mi nga dyeni navo.

Luka 18:14

“Na mi gela ku khani awuwa ngene a nga tshumela e tsula m'tini kwakwe, a di basisilwe, ani wule mmwani mahala, nguko awuwa a ti guletako, a na vekwa hahatshi, ani wu a ti vekako hahatshi, a na guletwa.”

Dhaniyeli 4:37

Se konkuwa koko, ani Nebhukodhonosori, na bonga, na guleta ni kudhumisa Mfumeli wa nzumani; nguko mithumo yakwe yotshe di ditshuri, ni tinzila takwe do lulama, kambe wa sikota kuveka hahatshi a vale va tikulisako.

Mavingu 20:19

M'thu wo tolovela malengo, wa humisa txihunja; ngu toneto, u nga ti patanise ni m'thu wo lalata.

Ezekhiyele 22:9

Hagari kwako ku ni vavamna va sipoyilo, kasi kutheketa mnoha; kambe va dyete txitimwi ka mimango yako, ni kumahetela wukanganyisi hagari kwako.

Isaya 2:11

Maso a vathu vo ti kulisa ma na pfhupeliswa, ni kutikulisa ka vavamna ku na vekwa hahatshi, Mkoma ngene dwe a no dhumiswa ka ditshiku donado.

Mavingu 25:23

Moya wa wuphemba wa tisa nzuma yina, se lidimi lo kanganyisa, li thuvikisa khohe.

Mavingu 10:18

Awule a sisako livengo wa hemba ngu txisofu, ni wule a lumbetako njiphukuphuku.

Masalmo 138:6

Hambiko Mkoma a ku txitimwi ngutu, wa pfisisa awu i ku txisiwana; aniko ka m'thu wo ti guleta a m'ziva a di kule.

1 Samuwele 2:3

Mi nga andiseni mapswi o tikulisa, ni mapswi o ti guleta ma nga hume sisofuni kwanu; nguko Mkoma, Njizimu txa wutxhari, ene wa veka mithumo yathu ha txikaloni.

Levhi 19:16

U nga phaye livengo hagari ka va ka kwanu; u nga mangalele mwakelani wako, eza e mana phango. Ani ngani Mkoma!

Eksodha 23:1

“U nga hangalase timhaka ta makuhu; u nga tshangane ni vathu vo biha, u nga mahe wufakazi wa makuhu.

Eksodha 20:16

U nga lumbete mwakelani wako ngu wufakazi wa makuhu.

1 Timoti 3:11

Vavasikati ni vona, kulaveka i di vo ti ñola, vo thembeka ka totshe tinzila.

Mavingu 21:4

Kuwona ko tikulisa, ni mbilu yo ti guleta, njionho txa wo biha.