Masalmo 1:3 - Bhiblia Yo Sawuleka

³ A fana ni mndonga wu wu nga phawa mabambe ka lidhonga la mati, awu wu ningako mihando ya wona ngu mbimo ya kona, awu mazokoro a wona ma si wuniko totshe ti a ti mahako ta bhindula.

Masalmo 1:3 Referans Kwoze

Jeremiya 17:8

Nguko a na fana ni mndonga wu wu nga phawa hafuhi ni mati, awuwa mitwi ya wona yi navako kala matini. Hambi kuva ni lisani kha wu thavi, aniko mazokoro a wona mo simama me nyuka. Kha wu karateki hambi i di dilembe do mbawa mati, hambi kuleka kuveleka mihando.

Ezekhiyele 47:12

Se hafuhi ni txinambwana, likasani ka kona, ka didhawa dimwedo ni dimwani, ku na mila totshe tixaka ta mindonga yo ninga mihando yo dingana kudyiwa; mazokoro a yona kha ma na mbi mora, hambi kuluzeka mihando ya kona; ngu mitxima ya kona yi na veleka mihando ya yiphya, nguko mati a kona ma huma ngu ko sawuleka; se mihando ya kona yi na maha yo dyiwa, aniko dizokoro da kona mrende.

Masalmo 92:14

Hambi yi di kumbile mindonga yile ya veleka mihando yi zumba yi di nonile ni kuhanya,

Johani 15:6

Wuhi ni wuhi asi zumbiko kwangu, a na tshotshwa hahanze, a txi oma kufana ni didhavi. Madhavi o ngeto, ma rolelwa ma txi rinzwa ha mndiloni, ma txi hiswa.

Ezekhiyele 19:10

Israyeli i ku mame wako a ti ti nga m'vhinya, wu nga phaywa hafuhi ni mati; wu tata madhavi ngu mihando, ngu mhaka ya kutalelwa ngu mati.

Genesisi 39:23

Mxayisi wa mkora a ti si karateki ngu txilo, totshe ti ti manzani ka Josefa, nguko Mkoma a ti ti kumweko nayo, a txi katekisa mithumo yotshe yile a nga ti yi maha.

Mtuletelo 22:2

Hagari ka mtendela wa didhoropa ni mabambe ka mnambo, ngu khe ni khe, ku ni mndonga wa wutomi, awu wu ningako mihando digumi ni kambidi ngu dilembe, ngu kuveleka mtxima ni mtxima: Mazokoro a wona ma thuma kuhanyisa mifumo.

Ezekhiyele 17:8

M'vhinya wuwa wu phayilwe ka mafu amanene, madhawani ka mati amangi, kasi ku ma txi thunga madhavi, ni kuninga mihando, wu maha m'vhinya wa wunene.

Matewu 13:6

Aniko mbimo yi ditambo di nga huma, mbewu yi to hya ngu lisani, yi oma, nguko yi si nga ni mikuluti.

2 Makronika 31:21

Ka wotshe mthumo wu a nga wu khata wa Nyumba ya Txizimu, ni wa mlayo, wa sileleto, kasi ku a txi lava Txizimu txakwe ngu mbilu yakwe yotshe, a to kateka.

Genesisi 39:3

Nyamne wakwe a to khata ku ti wona ti to Mkoma a ti ti kumweko ni Josefa, ni ti to wa mninga mathomo ka totshe ti a ti mahako.

Masalmo 128:2

U na dya mihando ya manza ako, u na kateka, se totshe tako ti na tsimbila kwati.

Isaya 3:10

Gelani va vo lulama ti to va katekile, nguko va na dya mihando ya mithumo yawe.

Isaya 44:4

Va na mila hagari ka mwasi, kufana ni siphutu hafuhi ni sinambwana sa mati.

Jobe 14:9

mndongewo wu txi na pfa mati, wu na thunga, ku na thunga mazokoro nga wo ngadi kuphawa.

Matewu 21:34

Mbimo yi ku nga hoka nyango ya kuelula, a to ruma sithumi sakwe ka vadimi kasi kuya amukela mitxelo yakwe.

Matewu 21:19

Se a to wona mkuwu hafuhi ni nzila, a txi wu tshuketela, aniko kha mana txilo ka wona, hahanze ka mazokoro. Konaho, a to womba, a txi khene: “Yi nge ngadi yi velekwa mihando kwako!” Se kunukunuko mkuwu wu so oma.

Judha 1:12

vathu vava ngu vona i ku sikhuvekiso mibusoni kwanu ka lirando; vadya va si na tingana, ve ti dyisa vapune, va fana ni marefu o mbi na mati, ma pengapengiswako ngu moya; mindonga ya wuxika yi si velekiko mihando, mindonga yi nga fa kumbidi yi txi dulwa ni mikoloti ya yona;

Isaya 27:11

Mbimo yile madhavi a kona ma no oma, ma na funywa; vavasikati va nata ma dhivela, nguko vathu vava, hi nga vathu vo pfisisa; ngu toneto, wule a nga m'va nga kha na mbi mpfela wusiwana, ni wule a nga muwumba, kha na mbi va mahela wumbilu.

Matewu 21:41

Vona va to angula va txi kha vona: “A na va fuvisa vathuvo vo biha, senikoko a na ningela thembwe ya mivhinya ka vamwani vadimi, ava va na ku mu wuyisela mihando yakwe ngu nyango yi yi lavekako.”

1 Makronika 22:11

Konkuwa koko, mwanangu, Mkoma a nave ni nawe, se pfala, u aka Nyumba ya Mkoma, Txizimu txako, nga tile ene a nga wombisa tona kwako.

Masalmo 129:8

kuwalo mpindi wa nzila a ku khene: “Makatekwa a Mkoma ma nave txitimwi kwanu! Athu ha mi katekisa ngu ditina da Mkoma!”

2 Makronika 32:23

Vathu vavangi va to tisa simaha Jerusalema, ku ta ninga Mkoma, ni simaha sa lisima ngutu ve ta ninga Ezekhiya, mfumeli wa va ka Judha, kukhukhela koneho a to guleka masoni ka matiko otshe.

Mitengo 24:6

Ngu nga sinambwana ma nga nava, yi txi nga mweto ha tikasani ka lidhonga, kufana ni mbhangani yo phawa ngu Mkoma, yi txi nga mikedhari yi ku hafuhi ni mati!

Dhewuteronome 28:8

Mkoma a na ruma ti to makatekwa ma txi simama kwako, amu sizendani kwako ni ka yotshe mithumo ya manza ako; kambe a na kukatekisa ka ditiko dile a no kuninga.

2 Vafumeli 18:7

Ngu konaho, Mkoma a ti ti ni nene, ni hayi ha a nga txi maneka kona, a txi tsimbila ngu kutiwonela; a to lwisa mfumeli wa Asiriya kha mthumela.

1 Makronika 22:13

Sekoko u na pfala, ngako u txo xayisa sileleto ni sirumo si Mkoma, a nga leleta ka Mosi madingano ni Israyeli; tsana, uva ni mtamo, kambe u nga thave, hambi kuguma mtamo.

Jobe 22:28

U txi ti emisela ka mhaka yokari, txi na va mtsanisi wako, se liwoningo li na phatima amu ka tinzila tako.

Masalmo 92:15

kasi kukombisa ti to Mkoma a lulamile. Ngene txiwindi txangu txa wuthavelo, kwakwe kuwalo kukanganyisa.

Isaya 58:11

Se Mkoma a na ku thangela yotshe mbimo, e khurisa muhefemulo wako ka makhalo a txihala, kambe a na tsanisa marambu ako; se u na fana ni thembwe yo theletelwa mati, ni ku nga txisima txi mati a txona ma si phwiko.

Ezekhiyele 31:5

Ngu mhaka yeto, wu to lapha ngutu kupinda yotshe mindonga ya txitinga, se madhavi a kona ma to dhimba, ni tindonga ta kona, ngu kutala ka mati.