Marku 8:13 - Bhiblia Yo Sawuleka

¹³ Se e va leka, a txi engeta e wulela ngalavani, a txi ya mtxhatuko.

Marku 8:13 Referans Kwoze

Mithumo 18:6

Kambe ngako a txi wona kukaneta kwawe, ni kuruka kwawe, Paulo a to zuza tinguwo takwe, a txi khene kwawe: “Mnoha wanu wu nave txitimwi ka misungo yanu. I di ani ni basile: Kukhukhela konkuwa ni na tsula ka vamatiko.”

Johani 12:36

Ngako mi di ngadi ni liwoningo, kholwani ka liwoningo, mi na phinduka mi va vanana va liwoningo.” Msana ka kuwomba timhaka tiya, Jesu a to khukha kwawe, eya sisala.

Johani 8:21

Jesu a to tshumela a txi va gela ku khene: “Ani na tsula, se mi na ni lava, aniko mi na fela txionhoni kwanu. Amu ni yako kona, anu kha mi na kusikota kuta.”

Luka 8:37

Se vathu votshe va ditiko da Vagerasa va to kombela Jesu ti to e khukha ditikoni kwawe, nguko va ti ni kuthava ka hombe. Se Jesu a to wulela ngalavani e tshumela.

Matewu 15:14

Va lekeni! Mabhofu ma thangelelako mabhofu-kulowe; se ngako dibhofu di txi ñoleta lisole dimwani dibhofu, votshe va na wela diphalani ngu wumbidi wawe.”

Matewu 7:6

“Mi nga thukeni mi ninga timbwa silo si si nga sawulwa, hambi kutshotsha tidhayimana tanu ka tikhumba, kasiku ti si ti kandeteli ngu mikondo, ti mi wukela, ti txi mi vhandamulela ngu makwasa.”

Hoseya 9:12

Hambi va txi ta wunja vanana vawe, ani ni na va tekela, ku si sali m'thu ni wammweyo; nguko dikhombo kwawe, ngako kambe vona va txi ni leka!

Hoseya 4:17

Efrayime a ningetwe ka sithombe; mlekeni.

Jeremiya 23:33

Ngako vathu vava, mwendo mprofeti, mwendo mphaxeli, va txi ku wotisa, va txi kha vona: Ngu wuhi mrwalo wa Mkoma kani? Sekoko u na va xamula, u txi khawe: Nganu mrwalo wa kona! Ni na mi ginyalata, kuwomba Mkoma.

Masalmo 81:12

Ngu toneto, ni va lekile ve maha kuranda kwawe ni kulondetela minavelo yawe.

Marku 8:12

Se e hefemuteka moyani kwakwe, a txi khene: “Liveleko liya, li kombelela txani txikombiso kani? Kha ditshuri na mi gela ku khani: Liveleko liya kha li na mbi ningwa txikombiso!”

Marku 8:14

Kambe vagondiswa va ti divate kuteka mapawu, va ti kova ni dipawu dimwedo ngalavani dwe.

Mithumo 27:2

Ku ti ngako hi di wulete ka txitimela txa kuta ngu Adramita, ayi yi nga ti txhatukela kuya phuho ya Aziya, hi to ñola nzila hi tsula. Hi ti ni Aristarkusi wa Tesalonika, didhoropa da Makedhoniya.