Marku 10:52 - Bhiblia Yo Sawuleka

⁵² Jesu a to mu gela a txi khene: “Tsula, likholo lako li ku hanyisile.” Konaho, a to tshumela e mana kuwona, se e mlondisa nzilani.

Marku 10:52 Referans Kwoze

Matewu 9:22

Jesu a txi tshembereka e mu wona, a to khene kwakwe: “Tsanisa mbilu, mwanangu, likholo lako li ku hanyisile.” Se wamsikati a to hanyiswa ka malwati akwe ka yona yile mbimo.

Luka 7:50

Aniko ene a to gela wu wamsikati, a txi khene: “Likholo lako li ku hanyisile; tsula ngu kudikha.”

Marku 8:25

Se a to engeta e sanzeka manza ka maso a dibhofu, se dona di to wona ta tinene, se di hanyiswa, di sikota kuwona sotshe kwati.

Marku 5:34

“Mwanangu, likholo lako li ku hanyisile, tsula ngu kuthutha, thuseka ka malwati ako.”

Johani 9:32

Kha hi zivi ku tipfa ti to nombwe wokari a tute maso m'thu wo velekwa i di dibhofu.

Matewu 15:28

Sekoko Jesu a to mxamula a txi khene: “Wamsikati, kukholwa kwako nga hombe! Ti na maheke nga ti u ti lavisako tona.” Se kukhukhela ka yona yile mbimo, mwanana wakwe wa muhorana a to kalamuka.

Mithumo 26:18

Kasi kuya tula maso awe ni ku va humisa mtemani, ve wuya livaningoni, ni ku va humisa nfumoni ka Sathani, ve wuya ka Txizimu, kasiku ve amukela divalelo ya sionho, ni kuavelwa thomba kumweko ni vasawuleki ngu kukholwa ditinani kwangu.’ ”

Marku 1:31

Sekoko ene a to tshuketa a txi mñola ngu diwoko a txi mu wusa; txindeyandeya txi to mu leka, se ene e khata ku va thumela.

Matewu 21:14

Va to tshuketela kwakwe, kona Dithepeleni mule, mabhofu ni silima sa minenge, se ene a txi va hanyisa.

Matewu 12:22

“Sekoko, va to neha kwakwe m'thu wa madhimoni, i nga ti dibhofu ni txiduma. Ene a to mu hanyisa, se awu wa txiduma e khata kuwombawomba ni kuwona.”

Johani 9:39

Konaho Jesu a to womba a txi khene: “Ani ni tete ku ta lamula ha ditikoni, kufela ku ava va si woniko ve mana kuwona, ani vale va wonako ve maha mabhofu.”

Matewu 11:5

Mabhofu ma wona; sidiya sa tsimbila; vatshekela va basiswa; maphanzeve ma engisa; vakufa va wuswa ve hanya; sisiwana sa txhumayelwa Evhangeli.

Isaya 35:5

Sekoko maso a mabhofu ma na tulwa, ni tinzeve ta maphanzeve ti na tuleka.

Masalmo 146:8

Mkoma wa tula maso a mabhofu; Mkoma wa wusa vale va thidhelako Mkoma wa randa vo lulama.

Masalmo 33:9

Nguko a to womba, se sotshe si maheka; a to ruma, se sotshe si humelela.

Luka 9:48

“Wuhi ni wuhi a amukelako tximwananana txiya ngu ditina dangu, wa ni amukela; se awu a ni amukelako, a amukela wu a nga ni ruma. Nguko awu i ku wam'dotho hagari kwanu motshenu, ngene i ku wa hombe.”

Matewu 8:3

Sekoko Jesu a to nawuluta dianza dakwe a txi mu gwesa, a txi khene: “Na ti lava, basiswa awe.” Kunukunuko a to basiswa ka tshekela yakwe.