Marku 10:47 - Bhiblia Yo Sawuleka

⁴⁷ ngako a di engisile ti to awule a pindako i Jesu wa Nazareta, a to khata kukwangula a txi khene: “Jesu Mwanana wa Dhavhidha, hinga ni mahela wumbilu.”

Marku 10:47 Referans Kwoze

Marku 1:24

“Nji txani u ku natxo ni nathu, Jesu wa Nazareta kani? U tela ku ta hi lovisa kani? Ani na kuziva ti to ngawe mani: U Msawuleki wa Txizimu.”

Mtuletelo 22:16

Ani Jesu, ni rumete Ngelozi yangu, kasi ku mi fakazela timhaka tiya ti lumbako mabanza: “Ani ni diphasikela da liveleko la Dhavhidha, ni nyeleti yi phatimako hale mixo.”

Matewu 9:27

Ngako Jesu a di khukhile konaho, mabhofu mambidi ma to mlondisa, ma txi kwangula ma txi khene: “Mwanana wa Dhavhidha, hi pfele wusiwana!”

Johani 7:52

Vona va to mu xamula va txi kha vona: “Kasi nawe u huma Galileya kani? Xola, u na wona ti to kha ku na mprofeti wu a tako ngu Galileya.”

Matewu 26:71

Se a di khukhile ha txikeni, a to wonwa ngu tximwani txithumi txa wamsikati, awu a nga gela ava va nga ti ti ho konaho, a txi khene: “Awuwa nene a ti kumweko ni Jesu wa Nazareta.”

Matewu 15:22

Se mmweyo wamsikati, wa mu Kanana, a nga ti tile ngu Kanana, a to kwangula a txi khene: “Mkoma Mwana Dhavhidha, ni pfele wusiwana. Mwanana wangu wa txihoranana wa xupheka ngutu ngu madhimoni.”

Mithumo 6:14

nguko athu hi muengisile, a txi khene: “Jesu wa Nazareta a na fuvisa Wukhalo wuwa e txitxa ni mahanyelo awa hi nga ningwa ngu Mosi.”

Johani 19:19

Pilato a to bhala m'bhalo, veya wu nameketa txitimwi ka txihambano. Ku ti bhatwe tito: “Jesu wa Nazareta, mfumeli wa Vajudha.”

Johani 7:41

Vamwani va txi kha vona: “Awuwa i Mesiya.” Aniko vamwani va ti ti kha vona: “Ina Mesiya a nga huma ngu Galileya kani?

Johani 1:46

Nathaniyele a txi khene kwakwe: “Ina txilo txa txinene txi nga huma ngu Nazareta kani?” Filipi a txi khene kwakwe: “Ngono u ta ti wona.”

Luka 4:16

Ene a to tsula Nazareta, ahawa a nga kulela kona, se ngu toloveto yakwe, a to wulela disinagogani ngu ditshiku da Sabbata, se a txi khukha a txi ema kasi kugonda dibhuku.

Matewu 21:11

Dibutho di txi angula, di txi kha dona: “Awuwa i Jesu, mprofeti wa Nazareta ka Galileya.”

Matewu 21:9

Dibutho dile da vathu va nga ti thangela masoni kwakwe, ni vale va nga ti londetela ngu msana, va ti ti embelela va txi kha vona: “Hozana ka Mwanana wa Dhavhidha! A na dhumiswe awu a tako ngu ditina da Mkoma! Hozana txitimwi nzumani!”

Matewu 20:30

Konako mabhofu mambidi ma nga ti khalahatshile hafuhi ni nzila, mbimo yi ma nga engisa ti to Jesu wa pinda, ma to khata kukwangula ma txi kha ona: “Mkoma Mwana Dhavhidha, hi pfele wusiwana!”

Matewu 12:23

Dibutho dotshe di to xamala di txi kha dona: “Ina awu hi nga ene Mwanana wa Dhavhidha kani?”

Matewu 2:23

eya aka ka didhoropa di di dhanwako ku i Nazareta ahawa a nga ya zumba kona, kasi kutatiseka ati ti nga wombwa ngu vaprofeti va txi kha vona: “A na dhanwa ku i Munazareta.”

Matewu 1:1

Dibhuku da liveleko la Jesu Kristu, Mwanana wa Dhavhidha, Mwanana wa Abrahamu.

Isaya 11:1

Nguko ku na mila dikhukhu ditshinani ka Jese, ni ka mitwi yakwe ku na mila didhavi di veleka mihando.