Malakiya 2:7 - Bhiblia Yo Sawuleka

⁷ Nguko txisofu txa mphaxeli txi na xayisa wuzivi, se va na mana mlayo ka txisofu txakwe, nguko ene i Ngelozi ya Mkoma wa Mabutho a Tiyimbi.

Malakiya 2:7 Referans Kwoze

Levhi 10:11

mi txi sikota kugondisa va ka Israyeli ti to ve vekisa milayo yi Mkoma a nga va ninga, ngu txisofu txa Mosi.

Dhewuteronome 21:5

Sekoko vaphaxeli, i ku vanana va Levhi, va na tshuketa hafuhi, nguko ngu vona va nga sawulwa ngu Mkoma, Txizimu txako, kasi kuve maha mthumo wakwe, ni kukatekisa ngu ditina da Mkoma, kambe sisofu sawe ngu sona si fanelako kulamula ni kurulisa otshe maguwa a kuhenyisana ni a kupekana.

2 Vakorinto 5:20

Athu hi sirumwa sa Kristu, Txizimu ngu txona txi mi layako ngu ngathu. Ngu toneto, ha mi khongotela ngu ditina da Kristu: Kombelani divalelo ka Txizimu.

1 Vatesalonika 4:8

Ngu toneto, awu a nyenyako gondo yiya, kha nyenyi m'thu, aniko a nyenya Txizimu, txona txi ka ditshuri, txi mi ningako Moya wa txona wo Sawuleka.

Mithumo 16:17

Se a to londeta Paulo ni nathu, na a txi kwangula, a txi khene: “Vathu vava mbathumeli va Txizimu Nyatxitimwi; vona va mi zivisa nzila ya kuhanyisa.”

Ezra 7:10

Nguko Ezra a ti ti vekisete mbiluni kwakwe, kulava Mlayo wa Mkoma, kasi ku wu londeta, ni kugondisa kona Israyeli, sileleto sa kona, ni madingano a kona.

2 Makronika 30:22

Ezekhiya a to womba-womba ka votshe va ka levhi ava va ku ni wutxhari wa wunene wo ziva Mkoma; se vathu votshe ve busa mtxhanu wa masiku ni mambidi, va ningela mningelo wa kudikha va txi dhumisa Mkoma Txizimu txa vatate vawe.

Johani 20:21

Ene a to engeta a txi khene: “Kudikha ku nave nanu! Nga ti Tate a nga ni ruma, nanani na mi ruma.”

Johani 13:20

Ngu ditshuri, ngu ditshuri, na mi gela ku khani: Awule a amukelako wuhi ni wuhi ni no mruma, a amukela ani nipune; awule a ni amukelako, a amukela awu a nga ni ruma.”

Malakiya 3:1

Wonani taku, ni mi rumela ngelozi yangu, ayi yi no ni lulamisela nzila, se msana keto, Mkoma wule anu mi mlavako, a nata ngu kukuluveta dithepeleni kwakwe, Ngelozi ya txitumelelano, ayile anu mi yi verelako; wonani taku yata, kuwomba Mkoma wa Mabutho a Tiyimbi.

Hagayi 1:13

Sekoko Hagayi txirumwa txa Mkoma, a to womba-womba ka vathu, mandingano ni mhaka ya Mkoma, a txi khene: Ani ni na ni nanu, kuwomba Mkoma.

Jeremiya 18:18

Sekoko va to kha vona: “Ngonani hi ta maha txikungo txo wukela Jeremiya; nguko vaphaxeli kha va na mbi tandeka ku hi ninga m'layo, hambi txhari ku hi ninga wusungukati, hambi vaprofeti ku hi ninga dipswi. Ngonani hi na ya muhika ngu tidimi tathu, hi si khataleli timhaka takwe.”

Jeremiya 15:19

Ngu konaho, Mkoma a khene: Ngako u txi tshumelela kwangu ni na ku wuyisa ti taku u txi maha mlondeteli wangu. Ni kungako u txi tisa sa lisima, u leka si so biha, awe u na va txisofu txangu. Vona va na tshumelela kwako, aniko awe khu na mbi tshumelela kwawe.

Isaya 44:26

ngani ni tsanisako dipswi da txithumi txakwe, kambe na tatisa makungo a sirumwa sakwe, ni wombako ka Jerusalema, ni txi khani: Ku na akwa kwako, se ka madhoropa a ka Judha ni khani: Mi na aketwa, ni ti to ani ni na wusa marumbi anu;

Dhewuteronome 24:8

Ti wonele ka mtungu wa tshekela, u txi engisa kwati, ni kumaha totshe tifanelo ti va no mi leleta tona.

Vagalatiya 4:14

Kambe anu kha ma komba ku ni nyenya mwendo ku ni vengela, hambiko malwati angu i nga ti txiduko kwanu; aniko mi ni amukete kota mtumi wa Txizimu, kota nga Jesu Kristu apune.

Isaya 42:19

I mani i ku dibhofu, i si nga txithumi txangu, mwendo diphazeve kufana ni txirumwa txangu, atxi ni txi rumako kani? Niku i mani i ku dibhofu kufana ni wule a randekako, i ku dibhofu kufana ni txithumi txa Mkoma kani?

Mitengo 27:21

Se a na vekwa masoni ka Eleyazari, mphaxeli wu ni no mtisa ka Urime, masoni ka Mkoma; nga ti a nga womba, va na huma; ni ku nga ti a nga ti womba ve wulela, ene ni votshe vanana va ka Israyeli, ni wosthe msengeletano.

1 Samuwele 2:17

Ngu kumaha keto, txionho txa majaha awa i ti ti txa hombe ngutu masoni ka Mkoma, nguko vathu va ti eyisa mningelo wa Mkoma.

2 Makronika 31:4

A to ruma vathu, vahanyi va Jerusalema kuningela txyavelo ka vaphaxeli ni Valevhi kasiku ve mana mtamo wo khatalela Mlayo wa Mkoma.

Ezra 7:25

Se awe Ezra, madingano ni wuzivi wa Txizimu txako, wu ku manzani kwako, veka vatsimbitisi ni vale va no lamula votshe vathu va ku mtxhatuko ka mnambo, ka vale va zivako milayo ya Txizimu txako, mi gondisa ni vale va si yi ziviko.

Mavingu 5:2

kasi ku u na xayisa siziviso sangu, ni txisofu txako txi vekete wuzivi.

Jeremiya 2:8

Vaphaxeli kha va nga wotisa, va txi kha vona: Ahani Mkoma kani? Ni vañoli va mlayo kha va nga ni ziva. Vathangeli va to ni tshuralela. Ni vaprofeti va profetile ngu Bhahali. Ve londeta sa kwa mbi vhuna txilo.

Ezekhiyele 7:26

Dikhombo di na londetwa ngu dikhombo, se huwa yi na dhana yimwani huwa; sekoko va na lava txiwoniso ngu ka mprofeti, kambe mlayo wa mphaxeli wu na lova, ni silayelo sa madhota.

Dhaniyeli 11:33

Se titxhari hagari ka vathu ti na gondisa votala; hambi keto, va na wiswa ngu ditxhari, ni mndilo, ni wukhumbi, ni kupa, mndani ka masiku o tala.

Hoseya 4:6

Vathu vangu va lovisilwe, ngu kule va nga pwata wuzivi; nguko awe u lambile wuzivi, se nani na kulamba, kasiku u si mahi mphaxeli masoni kwangu; akule u nga divala mlayo wa Txizimu txako, nanani ni na divala vanana vako.

Zefaniya 3:4

Vaprofeti va dona mba kutikulisa, kambe kha va nga ni txithavo; vaphaxeli va dona va txhipisile wukhalo wo sawuleka, va txi ndaka mlayo.

2 Vafumeli 16:11

Se mphaxeli Uriya a to aka txiluvelo, madingano ni tile mfumeli Akazi a ngadi leletete a di Dhamasku; mphaxeli Uriya a to maha eto na a sanzi kuwuya mfumeli Akazi ngu Dhamasku.

2 Vafumeli 16:16

Se mphaxeli Uriya, a to maha totshe nga tontile a nga leletiswa tona ngu mfumeli Akazi.

Ekleziyaste 5:5

I txhuko kwa mbi xambanya, kupinda kuxambanya u si gwiti u maha.

Ezekhiyele 22:26

Vaphaxeli va dona va ndaka mlayo wangu, kambe va nyenyezisela siya sangu so sawuleka; hagari ka wo sawuleka ni wo nyenyeza kha ku nga ni kuhambana, hambi kuhambana ka wo sawuleka ni wa kwa mbi sawuleka; amu ka Masabbata angu, va pfhumisa maso awe, se ngu kumaha keto na nyenyeziswa hagari kwawe.

Zakariya 7:3

va to gela vaphaxeli vale va nga ti ti Nyumbani ka Mkoma wa Mabutho a Tiyimbi, ni ka vaprofeti, va txi kha vona: Ina ni na dila ka mtxima wa wutxhanu, ni ti tona, nga tile ni tolovelako kumaha, ka malembe amangi kani?