34 Vadyisi va mtxhambi, ngako va txi wona ti ti nga humelela, va to tutuma veya zivisa mhaka yiya didhoropani ni tithembweni.
Vadyisi va tikhumba va to tutuma veya zivisa vathu va didhoropani ni va thembweni, se vona ve huma veya wona ti ti nga humelela.
Ngako vona va txi tsula, vamwani vawoneleti va to ya didhoropani, va txi ya zivisa vaphaxeli va hombe totshe ti ti nga humelela.
Vadyisi va tikhumba va to tutuma ve tsula m'tini veya xawutela totshe, ngutu-ngutu atiya ti nga humelela ka va va nga ti ni madhimoni.
Se madhimoni ma to huma ka m'thu wule, me wulela tikhumbani, se mtxhambi wa tikhumba wu to tutuma wu ya ti vinza lineneni, wu mbembemela konamo.
Se vathu va to huma veya wona ti ti nga humelela. Ku ti ngako va txi hoka ka Jesu, va to mana m'thu wuwa madhimoni ma nga huma kwakwe, a di khalahatshile minengeni ka Jesu, a di ambate, a di ni kupima ka kunene, se ve thava ngutu.