Ngu konaho a to vinzwa hahatshi mwamilambo wa hombe, mnyoka wa kale, awule wu dhanwako ku i Dhiyabhulosi mwendo Sathani, mxengeteli wa dotshe ditiko; a vinzilwe ha mafuni, ene ni tingelozi takwe.
Ava va ku hafuhi ni nzila, ahawa dipswi di nga phaywa kona, ngu vale va ku, ngako va di di pfite, Sathani e kuluveta a txi ta kwawe, a ta va tekela dipswi di di nga phaywa timbiluni kwawe.
Ngako m'thu a txi engisa dipswi da Mfumo, asi di engisisi, kuta m'bihi e ta fukula asile si nga ti phayilwe mbiluni kwakwe; awuwa njifananiso txa mbewu ya kuwela ha nzila.
“Mphayi a humile kuya phaya; ku ti ngako a txi phaya, timbewu timwani ti to wela ha nzila, ti txi kandetelwa ngu vathu, se sinyana sa txitimwi si ti jokotela totshe.
Ava va ku ha marigwini, ngu va va nga engisa dipswi, ve di amukela ngu kutsaka, kambe ve pwata mikoloti, va txi tumela ngu mbimoanyana; se ngu mbimo ya txiduko, va rereka.