Luka 6:38 - Bhiblia Yo Sawuleka

³⁸ Hanani vamwani, kasiku na nanu mi na hiwa. Ha tikhanani kwanu ku na thelwa mpimo wa wunene, wo zindetwa, wu txi khusungelwa, wo tala wu txi thekela; nguko mpimo wu mi no pimela vamwani, ngu wonewo nanu mi no pimelwa ngu wona.”

Luka 6:38 Referans Kwoze

Dhewuteronome 15:10

M'ninge ngu kutxhatxheka, ni mbilu yako yi nga kanakane, nguko ngu mhaka ya toneto, Mkoma, Txizimu txako, a na kukatekisa, ka yotshe mithumo yako, ni yotshe mithumo ya manza ako.

Marku 4:24

A to engeta a txi khene kwawe: “Riyani tinzeve ka ti mi ti engisako. Mpimo wu mi pimelako vamwani ngu wona, na nanu mi na pimelwa ngu wona ngu Txizimu, se mi na engetelwa.

Matewu 7:2

Nguko mi na lamulwa nga ti mi lamulisako tona vamwani; ni mpimo wu mi pimako ngu wona vamwani, mi na pimwa ngu wona nanu.

Mavingu 22:9

Awule a ku ni mawonelo amanene a na katekiswa, nguko waha sisiwana dipawu dakwe.

Mavingu 19:17

Awule a ningako ka txisiwana o lombisa ka Mkoma, se ene a na tshumetelwa dibhindu da kona.

Mavingu 10:22

Txikatekiso txa Mkoma ngu txona txi ningako thomba ka m'thu, kambe ene kha na kuengetela txilo.

Matewu 10:42

Ani wule a ningako ka mmweyo wa vale vavadotho, hambi i di muhindo wumwewo wa mati o titila, ngu mhaka ya kuva i di mgondiswa wangu, kha ditshuri na mi gela ti to kha na mbi luzekelwa ngu ditshungulo dakwe.”

Luka 6:30

Awu a kombelako, mu he, aniko u nga vile awule a ku tekelako txako.

Jakobe 2:13

Nguko kulamulwa kha ku na mbi va ni wumbilu, ka wule a ku si nga ni wumbilu; aniko wumbilu wa humelela kulamulani.

Jobe 42:11

Sekoko va to ta kwakwe votshe vanawe va txiwamna ni va txisikati, ni votshe vale va nga ti ti m'ziva ngu kale, va txi ta dya nayo dipawu m'tini kwakwe, va txi mtsetsa ni ku mthavelela, ka wotshe wubihi wule Mkoma a nga ti ti mrumete; se mmweyo ni mmweyo wawe, a to mninga male, ni tiphera ta nzalama.

Masalmo 79:12

Mkoma, va tsayise ka mtxhanu ni kambidi vaakelani vathu ngu mhaka ya sionho si va nga ku mahela.

Esteri 9:25

Aniko ahale yi nga hoka mhaka ka mfumeli, a to rumela ngu mapapilo ti to txikungo txo biha txa Hamani, txo wukela Vajudha, txi wela ha msungo kwakwe; ngu koneho, va to mtxikita, ene ni vanana vakwe, ha phandeni kumweko.

Valamuli 1:7

Sekoko, Adhoni-Bhezeki a to khene: Mtxhanu wa magumi ni mambidi a vafumeli, va nga ti wiletwe titiho ta vanyagotwe, ta manzani ni ta mikondoni, va ti ti rolela maruru hahatshi ka meza yangu; ngu kumaha keto, Txizimu txi ni tshumetete madingano ni ti ni nga va mahela. Se va to tsula nayo Jerusalema, eyo a nga ya fela kona.

Esteri 7:10

Hamani koko va to mtxikita ka phande yile ene a nga ti yi longisete Mordhekayi. Sekoko kuhenya ka mfumeli ku to boxa.

Jeremiya 32:18

Ngawe u nga mahela wumbilu magumi a mazana, u tshumeta wubihi wa vatate tikhanani ka vanana vawe msana kwawe; u wa hombe, Txizimu Nyamitamo, ditina dako u Mkoma wa Mabutho a Tiyimbi.

Eksodha 21:24

diso ngu diso, dikwasa ngu dikwasa, mkondo ngu mkondo,

2 Samuwele 19:36

Txithumi txako txi na txhatuka ka kudotho Jordhani kumweko ni mfumeli; ana ni bongela txani mfumeli ngu mabongelo awa kani?