Luka 23:22 - Bhiblia Yo Sawuleka

²² Sekoko Pilato a to va angula ka wuraru, a txi khene: “Kasi njionho muni a nga txi maha Ene kani? Kha na mana txilo kwakwe, txi sikotako ku mu abanisela kufa. Ngu kota yeto, ni na mu thukunyula e tsula, msana ka ku mu tsayisa.”

Luka 23:22 Referans Kwoze

Luka 23:14

a txi khene kwawe: “Mi tisile m'thu wuwa masoni kwangu, mi txi khanu Ene i mkujeteli wa vathu. Ni mu wotisile masoni kwanu, kambe kha na mana txionho ni txa tximwetxo ka sile mi mu mangalelako ngu sona.

1 Pedro 3:18

Kha ditshuri, Kristu nene a fite ka kumweko ngu mhaka ya sionho sanu, ene i ku wo lulama, a txi fela vale vo mbi lulama, kasi ku mi yisa ka Txizimu. A fite ngu ka mmidi, aniko a hanyisilwe ngu ka moya.

1 Pedro 1:19

aniko, mi tirutwe ngu mnoha wa lisima wa Kristu, wu wu fanako ni wa Txinvutana txo mbi na wulima mwendo txibawa;

Luka 23:20

Pilato a tshumete kambe a txi va angula ngu kulava kuthukunyula Jesu.

Luka 23:16

Ngu toneto, ni na mu thukunyula e tsula, msana ka ku mu tsayisa.”

Luka 23:4

Konako Pilato a to gela vaphaxeli va hombe ni dibutho, a txi khene: “Ani kha ni mani mnandu ka m'thu wuwa.”

Luka 23:21

Kambe vona va txi kwangula va txi kha vona: “Mu bethele! Mu bethele!”

Luka 23:23

Aniko vona va txi tamarisa ngu mapswi a kumaha diguwa, va txi kombela ti to a na bethelwe ha txihambanoni, kambe diguwa dawe di to xula.