Luka 22:3 - Bhiblia Yo Sawuleka

³ Se Sathani a to wulela mbiluni ka Judha, awu a dhanwako ku i Iskariyoti, i nga ti mmweyo wa vale va Digumi ni Vambidi.

Luka 22:3 Referans Kwoze

Johani 13:2

Se hagari ka kulalela, ngako Sathani a nga ti wulete mapimoni ka Judha Iskariyoti, mwanana wa Simoni, kufela ku ene e ningela Jesu;

Johani 13:18

“Kha ni wombi ngu nganu motshe; na va ziva ava ni nga va sawula. Aniko ta laveka ti to Mibhalo yi tatiseka, ayi yi kha yona: ‘Awu a dyako mndiwo ni nani, a ni wukete a txi ni ganyata ngu txizenende txakwe.’

Mithumo 5:3

Aniko Pedro a txi khene kwakwe: “Ananiya, u mlekisile kutxani Sathani e fuma mbilu yako kani? U hembete Moya wo Sawuleka, u txi ti hungulela male ya thembwe ngu phuho.

Luka 22:21

Hambi keto, wonani, dianza da wule a ni ningelako, di ni nani ha mezani.

Masalmo 41:9

Hambi mndoni wangu, awu ni nga ti m'themba, awu ni nga ti dya nayo mbiyani kumweko, se konkuwa a ni wukete a txi ni ganyata ngu txizenende txakwe.

Johani 12:6

Ene a wombisile eto, i si nga ngu kuthela kota ngu sikulungu, aniko nguko i nga ti dikhamba da kupa asi si nga txi vekwa msavani, nguko i ti ene, i nga ti mñoli wa wona.

Luka 6:16

ni Judha mwana Jakobe, ni Judha Iskariyoti, awu a nga ningela Jesu.

Matewu 26:23

Ene a to va xamula a txi khene: “Awu a betako dianza mbiyani kumweko ni nani, ngeneyo a na ku ni ningela.

Matewu 4:10

Se Jesu a to khene: “Khukha Sathani! Ti bhatwe tito: ‘U na khizamela Mkoma Txizimu txako, ngene ekha u no m'khozela.’ ”

Matewu 10:4

Simoni wa Mukanana ni Judha Iskariyoti, awu a nga ningela Jesu.