Luka 21:8 - Bhiblia Yo Sawuleka

⁸ Ene a xamute a txi khene: “Ti woneleni, mi si tumeli kukanganyiswa, nguko vavangi va nata ngu ditina dangu, va txi kha vona: ‘Ani ngani’, mwendo kambe ku kha vona: ‘Mbimo se yi hafuhi!’ Mi nga va londeteleni.

Luka 21:8 Referans Kwoze

1 Johani 4:1

Vorandeka, mi nga kholweni ka yotshe mimoya, aniko, wonisisani mimoya kasi kuziva ti to mwendo nja Txizimu, nguko mbavangi vaprofeti va makuhu va nga hangalaka ni ditiko.

2 Vatesalonika 2:3

Mi nga thuke mi txi kanganyiswa ni ka kudhoto ngu m'thu, nguko ku sinzi kumaha eto, kuthanga ku na vaho kutshumelela msana, ni kuwoneka ka m'thu wa txionho, mwanana wa kulova,

Vaefesu 5:6

M'thu a nga thuke e mi kanganyisa ngu mapswi o mbi vhuna txilo, nguko simaha siya si dhana kuhenya ka Txizimu.

Matewu 24:11

Va na humelela vaprofeti vavangi va makuhu, ava va no timeta vathu votala.

2 Timoti 3:13

Kasi vathu va tshofu ni vaxengeteli, vona va na ya masoni ngu kumaha wubihi, va txi kanganyisa vamwani ni ku ti kanganyisa vapune.

Jeremiya 29:8

Nguko Mkoma wa Mabutho a Tiyimbi, Txizimu txa ka Israyeli, a khene: Mi nga lundumisweni ngu vaprofeti vanu, ava va ku hagari kwanu, ni vahuteteli vanu, mi nga dhuke mi txi engisa miloro yawe.

2 Johani 1:7

Nguko va hangalakile ni ditiko vaxengeteli vavangi, ava va si fakaziko ti to Jesu Kristu a tile ngu didhawa da nyama. M'thu wo ngeto, ngene mxengeteli ni mkaneti wa Kristu.

Luka 17:23

Va na kha vona kwanu: ‘Wonani, ndiyo hawa’ mwendo ku: ‘Wonani, ndiyole haleya’; aniko mi nga tsuleni, mi nga va londeteni.

Mtuletelo 12:9

Ngu konaho a to vinzwa hahatshi mwamilambo wa hombe, mnyoka wa kale, awule wu dhanwako ku i Dhiyabhulosi mwendo Sathani, mxengeteli wa dotshe ditiko; a vinzilwe ha mafuni, ene ni tingelozi takwe.

Matewu 4:17

Kukhukhela ka txonetxo txikhati, Jesu a to khata kutxhumayela a txi khene: “Hundulukani, nguko Mfumo wa nzumani wu hokile.”

Mtuletelo 1:3

A katekile awule a gondako ni vale va engisako dipswi da txiprofeto txiya, ngako va txi vekisa ati ti nga bhalwa, nguko mbimo yi hafuhi.

Johani 8:24

Ngu toneto, ni nga mi gela ni txi khani: ‘Mi na fela sionhoni kwanu’, nguko, ngako mi si kholwi ti to ‘Ngani wuwa’, mi na fela sionhoni kwanu.”

Johani 5:43

Ni tile ngu ditina da Tate wangu, aniko kha mi ni amukeli. Ngako a txi ta mmwani ngu ditina dakwe, mi na mu amukela.

Matewu 3:2

a txi khene: “Hundulukani, nguko wu hafuhi Mfumo wa nzumani.”

Luka 21:7

Vona va to mu wotisa va txi kha vona: “M'gondisi, ti na maheka ditshiku muni toneto kani? Njikombiso muni txi no woneka, kasi kuzivisa ti to eto ti lava kuhumelela kani?”

Luka 21:9

Mbimo yi mi engisako va txi womba ngu tiyimbi ni mazunga, mi nga telweni ngu dizowa: Ti fanete kuthanga toneto ti txi humelela, kambe magwito a totshe kha ma na mbi woneka kunukunuko.”

Johani 8:28

Jesu a to va gela a txi khene: “Mbimo yi mi no guleta Mwanana wa M'thu, ngu konaho mi no tiziva ti to ‘Ngani Wuwa’, ni ti to kha ni thumi txilo ngu txangu nokha, aniko ni womba ti ni nga gondiswa ngu Tate.

1 Vakorinto 6:9

Ina kha mi tizivi ti to sidambu kha si na mbi dya thomba ya mfumo wa Txizimu kani? Mi nga ti kanganyiseni. Sindakamilayo, ni vakhozeli va sizimu sa walo, vagelezi,