Luka 19:29 - Bhiblia Yo Sawuleka

²⁹ Mbimo yi va nga txi lava kuhoka Bhetfage ni Bhetaniya, hafuhi ka mmango wa Miolivha, Jesu a to rumela vambidi ka vagondiswa vakwe, a txi va gela ku khene:

Luka 19:29 Referans Kwoze

Matewu 21:17

Msana keto, a to khukha a txi va siya, e huma didhoropani e tsula Bhetaniya, ahawa a nga ya otela kona.

Mithumo 1:12

Sekoko va to khukha ka mmango, wu dhanwako ku mbwa Miolivha, awu wu ku hafuhi ni Jerusalema, mnava wa kudingana nzila ya ditshiku da Sabbata, se ve tshumelela Jerusalema.

Zakariya 14:4

Se ka ditshiku donedo, Mkoma a na ema txitimwi ka mmango wa miolivha, yi yi ku hafuhi ni Jerusalema, ngu didhawa da wutxani; se mmango wa miolivha wu na abaneka ngu hagari, ngu wutxani, ni mswa-ditambo, kambe ku nava ni mkova wa hombe ngutu; hafu ya mimango yi na tshuketa wuphemba, se yimwani hafu yi na tshuketa wulambwe.

Luka 24:50

Msana keto, a va tekile a txi va yisa hafuhi ni Bhetaniya, a txi guleta manza a txi va katekisa.

Luka 22:39

Konaho ene a to huma e tsula mmangoni ka Miolivha, ngu tolovelo yakwe. Se vagondiswa ve mu londisa.

Luka 21:37

Ni mitshikari, Jesu a ti zumba a txi gondisa Dithepeleni, kambe ni wusiku a ti huma eya zumba mmangoni, awu wu dhanwako ku mbwa Olivheti.

Luka 19:37

Se ngako a txi relela kuya dithekani ka mmango wa Miolivha, otshe mabutho a vagondiswa, ma ti ti dhumisa Txizimu ngu kutsaka, ngu dipswi do pfala, ngu mhaka ya sixamaliso si va nga si wona. Va txi kha vona:

Luka 19:30

“Tsulani ka m'ti wule wu ku masoni: Mbimo yi mi no wulela, mi na ya mana tximbongolana txi di sungilwe, atxi txi sinziko kugadhwa ngu m'thu. Txi thukunyuleni mi wuya natxo hawa.