Luka 15:30 - Bhiblia Yo Sawuleka

³⁰ Aniko a wuyile mwanana wu wako, a nga xakela suma sako ni magelegele, se ene u m'dayete dirole do nona!’

Luka 15:30 Referans Kwoze

Mavingu 29:3

M'thu wule a randako wutxhari, a tsakisa tate wakwe, kambe mngana wa magelegele, wa xakela thomba.

Luka 18:11

Mfarisi a di emile, a txi khongelisa tiya khanani kwakwe: ‘Txizimu, na ku bonga, nguko kha ni fanani ni vamwani vathu, i ku makhamba, sidambu, ni vamahi va wugango; kambe hambi mkhupisi wuwa kha ni fanani nayo.

Luka 15:32

Ti ni fanelo kubusa, hi txi tsaka nguko mnanda wu wako a ti fite, e tshumela a txi hanya; a ti mwalate, e tshumela a txi manwa!’ ”

Eksodha 32:11

Mosi a to khongela ka Mkoma, Txizimu txakwe, a txi khene: “Mkoma, ngu kutxani kuhenya kwako ku txi tura u txi wukela vathu vako, avale u nga va humisa ditikoni ka Egipta, ngu mtamo wa hombe ni dianza do tsana kani?

Eksodha 32:7

Sekoko Mkoma a to khene ka Mosi: Tsula, relela, nguko vathu vako, avale u nga va humisa ditikoni da Egipta, va onhile.

Marku 12:44

Votshe vamwani va vekile male, na yi txi khukhela kutalelwani kwawe; kasi ene, kupwatani kwakwe, a ningete sotshe simaleana si a nga ti naso, asi a nga ti fanela kuhanya ngu sona.”

Luka 15:29

Kambe ene a xamute ka tate wakwe, a txi khene: ‘Malembe amangi ni ku thumelako, kha ni zivi kundaka ni wumwewo ka milayo yako, kambe khu zivi ku nga ni ninga phongo ni txi busa ni vangana vangu.

Luka 15:31

Kambe tate a mu xamute ku khene: ‘Mwanangu, awe u zumba ni nani yotshe mbimo, sotshe si i ku sangu, nzako.