Luka 15:15 - Bhiblia Yo Sawuleka

¹⁵ Ene a to tsula a txi ya kombela mthumo ka mmweyo wa vathu va ditiko dileya, awu a nga m'rumela tithembweni kwakwe, kasi kuya dyisa tikhumba.

Luka 15:15 Referans Kwoze

Titosi 3:3

Nguko nathu kale hi ti sipumbu, ni sikanyisi, ni vatimeli va nzila, ni tikhumbi ta lotshe lixaka la minavelo yo biha, hi txi hanya kubihani ni mu kubavelanani, hi txi zondwa ngu vathu ni kuzondana athu ngu txathu.

Isaya 1:5

Ngu kutxani mi no tsayiswa, nga kusimama miya masoni ngu kueyisa kani? Wotshe msungo wa lwala, ni yotshe mbilu yi pandisekile.

Malakiya 2:9

Ngu toneto, nani ni mi mahile vo eyiseka, ni kutxhipa masoni ka votshe vathu, ti ti wombako ku kha ma xayisa tinzila tangu, aniko mi sawute tikhohe kutxhamuselani ka mlayo.

Jeremiya 5:3

O Mkoma, ina maso ako kha ma vereli tinene kani? Awe u va pekile, aniko kha vapfa kupanda. U va lovisile, aniko kha va tumela kulaywa. Va bangisile tikhohe tawe kupinda ni dirigwi Va lambile kuhunduluka.

Varoma 6:22

Akuwa mi nga thuswa ka txionho mi maha tikhumbi ta Txizimu, mi bhindute mihando yi yi yisako kubasiswani, akuwa ku hokisako ka wutomi wo mbi guma.

Luka 15:13

Msana ka masikuanyana madotho, awu wa mnanda a to pakela thundu yakwe, e khukha a txi tsula ka ditiko da kule, a txi ya hangalasela thomba yakwe, ngu kuhanyisa ku ambi ti pimela.

Nahume 3:6

Se ni na rinza txitimwi kwako simaha so nyenyeza, kambe ni na kupoyila, ni txi kumaha txikombiso txa walo.

Ezekhiyele 16:63

ekasi ku u na alakanya, u txi wa tingana, khu na mbiswa kambe u tula txisofu txako, ngu mhaka ya tingana tako, mbimo yile hi no divalelana ni nawe, ka totshe tile u nga ti maha, kuwomba Mkoma.

Ezekhiyele 16:52

Awe koko, u xaniswa ngu tingana tako, u nga basisile vananau ngu sionho sako, u nga mahetela manyala ngutu kupinda vona; vona va lulamile ngutu kupinda awe; wa ti wisa tingana koko, u xaniswa ngu tingana tako, ngu kumaha keto u basisile vananu.

Isaya 57:17

Ngu mhaka ya wubihi wa likungo lakwe, ni henyile, ni va peka; ni to barama, ni henya; aniko sindaka-milayo si to tsimbitisa ngu nzila ya kuranda ka mbilu ya sona.

2 Makronika 28:22

Hambi kule a nga ti ti kuxanisekani, mfumeli Akazi a toya masoni e onhela Mkoma.

Eksodha 10:3

Se Mosi ni Aroni, va yite kambe ka Faro, va txi ya m'gela tiya: “Mkoma, Txizimu txa Vahebheru, a khene: U na gwita mbimo muni kukaneta u si ti veki hahatshi masoni kwangu kani? Leka vathu vangu ve huma, kasi va txi ya ni khozela.

Matewu 7:6

“Mi nga thukeni mi ninga timbwa silo si si nga sawulwa, hambi kutshotsha tidhayimana tanu ka tikhumba, kasiku ti si ti kandeteli ngu mikondo, ti mi wukela, ti txi mi vhandamulela ngu makwasa.”

Luka 15:14

Ngako a di hetile kudya sotshe, ku to humelela nzala ya hombe ditikoni mule, se ene a txi khata kupfa wusiwana.

Luka 15:16

Ene a ti navela kukhura ngu makamba awa ma dyiwako ngu tikhumba, aniko a ti si nga ho ni mmweyo a nga txi mu ha.”