Luka 12:15 - Bhiblia Yo Sawuleka

¹⁵ Se a txi khene kwawe: “Ti woneleni ta tinene ka hanyelo ya timbiti, nguko hambi m'thu a di taletwe ngu thomba, wutomi wakwe kha wu tsaniswi ngu si a ku naso.”

Luka 12:15 Referans Kwoze

Vahebheru 13:5

Mi nga fumweni ngu male kuhanyani kwanu. Tsakani ngu si mi ku naso, nguko Mkoma apune a wombile a txi khene: “Kha ni na mbi thuka ni kuleka, kha ni na mbi nga va ni ku kutshotsha.”

Mavingu 15:16

I txhuko kuva ni sa sidotho u txi thava Mkoma, kupinda kuva ni thomba ya hombe, na ku si nga ni kuthutha.

Mavingu 16:16

I txhuko ngutu kumana wutxhari kupinda kumana nzalama! Kambe i txhuko ngutu kumana mapimo kupinda silivhela.

2 Timoti 3:2

Nguko vathu va na va vo ti randa vapune, vanyatimbiti, va ku ti mahisa, va kutikulisa, varuketeli, vaeyisi va vaveleki, vo mbi ziva kubonga, va vo mbi khongela,

Luka 16:14

Vafarisi va i ku vathu va makolo ni male, va ti tiengisa totshe timhaketo, se ve mu seka.

Vakolosa 3:5

Ngu toneto, ha mmidini kwanu, dayani asi i ku sa mafu: Wugango, mahanyelo a nzambwa, makolo, mixuvo yo biha, likungo, li fanako ni kukhozela siwumbwa.

Luka 8:14

Ati ti nga wela mipani, ngu va va nga engisa dipswi, aniko, va di ngadi ve tsula masoni, va to di leka di kamaretwa ngu kuvilela ni kudhunda tithomba, ni kutitsakela ka wutomi wuwa, se va si ngadi ve veka mihando ya kuvitwa.

Masalmo 62:10

Mi nga thembeni wukhinyavezi, mwendo ku ti kanganyisa ngu sile i ku sa walo. Ngako mi txi wona tithomba tanu ti txi tala, mi nga vekeni timbilu tanu ka tona.

Masalmo 37:16

Si na ni lisima ngutu sa sidotho asi m'thu wo lulama a ku naso kupinda tithomba tatingi ta vabihi.

2 Pedro 2:3

Se ngu mhaka ya timbiti tawe, va na lava mabhindu ngu nganu, ngu kuthumisa mawombawombelo a kukanganyisa. Aniko, kulamulwa kwawe i kale ku di lulamisilwe, ni kulova kwawe kha ku na mbi swela.

Marku 7:22

wugango, kunavela ko biha, tshofu, kukanganyisa, ku ambi ti ñola, mabava, sisolo, kutikulisa, wukhwanda.

Habhakuki 2:9

Dikhombo ka wule a sengeletako tithomba to ti mana ngu mamahelo awalo, kasi kuveka txisaka txakwe txitimwi, a txi mahela ku ti txhatxhisa ka dianza do biha.

Masalmo 10:3

M'thu wa kubiha wa ti dhumisa ngu minavelo yakwe; m'thu wa makolo wa ruketela ni kunyenya Mkoma.

Jobe 2:4

Sekoko Sathani a to xamula ka Mkoma, a txi khene: Didhowo ngu didhowo, se sotshe sile wamwamna a ku naso, a na diha ngu wutomi wakwe.

Joxuwa 7:21

Mbimo yile ni nga wona dijasi do tshura hagari ka sile so handwa, ni 200 wa maxekele a silivhela, ni dibwinzi da nzalama ya mtxhanu wa magumi a maxekele, ni to si navela ni txi si teka, wona taku, ni si sisile hahatshi ka mafu, hagari ka ditenda dangu, se silivhela yi ngu hahatshi ka sotshe.”

1 Vakorinto 6:10

ni makhamba, ni vanyatimbiti, ni sidhakwa, ni varuketeli, ni vavamna va va mahako txionho txa tingana ni mwamna kulowe, kuwalo ni wammweyo kwawe a no sikota kudya thomba ya mfumo wa Txizimu.

Luka 21:34

“Kambe ti woneleni, kasiku timbilu tanu ti si thuki ti nemelwa ngu kwa mbi ti pimela, ni wudevi, ni kuvilela ngu sa wutomi wuwa, ti to ditshikudo di si mi ñoli ngu txidhukisa,

Mika 2:2

Se va navela tithembwe ni tinyumba ve ti honyola; ngu kumaha keto va lwisa wamwamna ni mwaya wakwe, ni m'thu kumweko ni thomba yakwe.

Jeremiya 6:13

Nguko va ti ningetete mu ka kumbilukela, vanana ni vahombe, vaprofeti ni vaphaxeli, votshe va onga.

Mavingu 28:16

Mthangeli wo pwata mapimo nene wa engetela kutsindaveta, kambe awule a vengako kutikulisa a na engetelwa masiku.

2 Pedro 2:14

Maso awe ma tate ngu wugango, kha ma kolwi ngu sionho; se va lava ku ndindela txionhoni ava i ku vo mbi tsana; mbilu yawe yi tolovete makolo. Vona mbanana vo ruketelwa.

Ezekhiyele 33:31

Se vona vata kwako, nga tile vathu va tisako tona kwako, ve ta khalahatsha masoni kwako kufana ni vathu vangu, kambe ve engisa dipswi dako, aniko kha va mahi txilo; va tumeletela ngu sisofu sawe, kambe timbilu tawe ti londetela ta minavelo yawe.

Luka 12:16

Se a to va mahela txidinganiso a txi khene: “Thembwe ya nyatithombe wokari yi ti pfuni ngutu.

1 Vafumeli 2:40

Se Simeyi a to khukha, e gadha mbongola yakwe, e tsula Gati, ka Akixi, e londeta sithumi sakwe; a mahisileto Simeyi kuya teka sithumi sakwe Gati.