Levhi 26:6 - Bhiblia Yo Sawuleka

⁶ Ni na ninga kudikha ditikoni; se mi na otela mi di tsani, kha ku na mbi va ni wa ku mi dhukisa; kambe ni na fuvisa sihari sa tshofu sa mafu, ni ti to ditikoni kwanu kha ku na mbi maneka ditxhari.

Levhi 26:6 Referans Kwoze

Isaya 35:9

Eho kha ku na mbi va ni ngonyamo, hambi txihari txa tshofu, kha txi na mbi tsimbila ngu yona, kambe kha txi na mbi maneka ka yona; aniko vale va nga tirulwa, va na tsimbila ngu yona.

Zefaniya 3:13

Miboti ya Israyeli kha yi na mbi maha wubihi, hambi kuwombawomba makuhu, ni mkanani kwawe kha ku na mbi huma mapswi o kanganyisa, nguko va na dyiswa, va na otela, kambe kha ku na mbi va ni wo va dhukisa.

Masalmo 147:14

Wa tsanisa kudikha mndani ka mihingano ya ditiko dako a txi kukhurisa ngu fulaho ya yinene.

Jeremiya 30:10

U nga thave koko, awe txithumi txangu Jakobe, kuwomba Mkoma, kambe u nga xamale, awe Israyeli; nguko ni na kuhumisa ka matiko a kule, ni vanana vako, ngu ditikoni ka wukhumbi wawe; se Jakobe a na wuya, e ta humula, kambe a na zumbiseka, kha ku na mbi vaho wo m'dhukisela.

Hagayi 2:9

Wudhumo wa nyumba yi yo gwitisa, wu na va wa hombe kupinda wa yile yo khata, kuwomba Mkoma wa Mabutho a Tiyimbi, kambe ka wukhalo wuwa ni na ninga kudikha, kuwomba Mkoma wa Mabutho a Tiyimbi.

Hoseya 2:18

Se ka ditshiku dile ni na maha ngu vona txitumelelano, ni sihari sa tshofu sa txitinga, ni sinyana sa nzumani, ni sihari so tsimbila ngu mrumbu sa ha mafuni; kambe ni na thavisa wulaho ni ditxhari, ni gumisa ni yimbi ditikoni, ni va maha ve zumba ngu kutsana.

Ezekhiyele 34:25

Kambe ni na maha txitumelelano txa kuthutha kumweko nato, ni txi heta sihari sa tshofu ha mafuni; ti na zumba txiwulani ti di tsani, ti txi otela sitingani.

Masalmo 29:11

Mkoma wa ninga mtamo ngamu yakwe; Mkoma a katekisa ngamu yakwe ngu kudikha.

Ezekhiyele 14:15

Ngako ani ni txi pindisa ngu ditikoni kwawe sihari sa txhofu, se sona si txi di xasela, di na xaselwe, ni wammweyo a nga pinde ngu ka dona ngu mhaka ya sibanda;

Jobe 11:19

Se u na otela, ni wammweyo kha na mbi kuxamala; votala va na swahutela khohe yako.

Eksodha 23:29

Kha ni na mbi va tutumisa masoni kwako ngu dilembe dimwedo dwe, kasiku ditiko di si mahi txiwula, se sihari sa txitinga si txi anda si txi mi wukela.

Johani 14:27

“Kudikha na kusiya kwanu, na mi ninga kudikha kwangu. Kha ni mi ningi kufana ni ti ditiko di ningisako tona. Mbilu yanu yi nga karateke, hambi ni kuthava.

Zakariya 9:10

Se ni na hoxota sikotxikani sa Efrayime, ni mahantxhi a Jerusalema, ni kufunyeletela wulaho wa yimbi; se ene a na pfalisa kudikha matikoni; se kufuma kwakwe ku na nava, kukhukhela ka linene limwelo, kala ka limwani linene, ni kukhukhela ka mnambo kala magwito ka mafu.

Mika 4:4

Se dimwani ni dimwani di na khalahatsha hahatshi ka m'vhinya wa dona, ni hahatshi ka mkuwu wa dona, se kha ku na mbi va ni wo va dhukisa, nguko txisofu txa Mkoma wa Mabutho a Tiyimbi, txi wombile.

Ezekhiyele 14:17

Ni ku ngako ni txi tisa ditxhari txitimwi ka ditiko, ni txi khani: Awe ditxhari, pinda ngu ditikoni mule: Se ani ni txi thavisa ka dona vathu ni sihari;

Ezekhiyele 5:17

Se ni na rumela nzala kwanu, ni sibanda si si nota daya vanana vako; mitungu ni kuthekela ka mnoha, si na pinda ngu kwako; ni na tisa ditxhari txitimwi kwako. Ani Mkoma ni wombile.

Masalmo 85:8

Ni na engisa atile Txizimu txi no womba. Kha ditshuri Mkoma a thembisile kudikha ka vathu vakwe, ka vathu va va m'thembako kasiku va si tshumeleli wupumbuni.

Masalmo 4:8

Ni na rwama ni txi otela ngu kudikha, nguko awe, Mkoma, ngawe dwe u ni ningako kuhanya ngu kuxayiseka.

1 Makronika 22:9

Wona taku, mwanana wule a no velekwa, a na va wamwamna wo thutha; nguko ni na mninga kudikha ka votshe valala vakwe ka madhawa otshe; ngu kumaha keto, ditina dakwe i nava Solomoni, se kudikha ni kuhumula ni na ninga Israyeli ka otshe masiku akwe.

2 Vafumeli 2:24

Se mbimo yile Elixa a nga tshembereka e wona msana, a to va ruketela ditinani ka Mkoma. Sekoko ku to huma singwingwi ngu mu ka txitxhotxhota, si vhandamulela vafana vale va mune wa magumi ni vambidi.

Varoma 5:1

Ngu toneto, ngako hi nga amukela wululami ngu kukholwa, hi ni kudikha ni Txizimu, ngu Mkoma wathu Jesu Kristu;

Mithumo 12:6

Ku ti ngako Herodha a txi pimisa ku mu humisa masoni ka vathu, ni wusiku wa kona Pedro a ti otete hagari ka masotxhwa mambidi, na a di sungilwe ngu titxhini timbidi, na kambe ha txikeni ka mkora ku ti ni vawoneleti.

Ezekhiyele 14:21

Nguko Mkoma Txizimu a khene: Ngutu-ngutu ni txi rumela valamuli vangu va mune va tshofu, ditxhari, nzala, sihari sa tshofu, ni mtungu, kona Jerusalema, kasi kuthavisa vathu ni sihari kani?

Jeremiya 31:26

Ka tona tiya ni vhumukile ni wona, se wukohe wangu wu ni tshambete.

Isaya 45:7

Ani na maha kuwonekela ni va nga txidema; ani na vanga kudikha, ni va nga dikhombo; ani Mkoma, na maha totshe tiya.

Isaya 9:7

Kuanda ka kufuma ni kudikha kwakwe, kha ku na mbi va ni magwito txitimwi ka txikhalo txa wukoma txa Dhavhidha, ni ka mfumo wakwe, kasi kutsanisa ni kuseketela ngu wulamuli ni kululama, kukhukhela konkuwa, kala kupinduka; lirando la Mkoma wa Mabutho a Tiyimbi, a na maha eto.

Masalmo 3:5

Na rwama ni txi otela wotshe wusiku, ngu msana ni txi wuka, nguko Mkoma wa ni vhikela.

Mavingu 6:22

Mbimo yi u no tsimbila, txi na kutsimbitisa; aha u no otela, txi na kuxayisa; u txi wuka txi na womba-womba ni nawe.

Mavingu 3:24

Mbimo yi u no otela, khu na mbi thava; ngako u txi na otela, ni wukohe wako wu na va wo tsakisa ka wusiku wotshe.

Jobe 5:23

Nguko txitumelelano txako txi na va txa marigwi; se sihari sa txitinga si na va ni nawe.

Levhi 26:22

Ni na leka sihari sa txitinga si dayela vanana vanu, si na heta sifuyo sanu, si mi heta nanu mi sala mi di vadotho, se tinzila tanu ti na maha mapfhela.

Levhi 26:7

Se mi na tutumisa valala vanu, avale va no dawa ngu matxhari a ditikoni kwanu.

Levhi 26:25

Nguko ni na rumela matxhari txitimwi kwanu, kasi ku ta photela txitumelelano txangu; ka mbimo yile mi no maneka mi di sengeletanile didhoropani kwanu, ni na rumela mtungu hagari kwanu, ni kumaha ti to mi txi ningelwa manzani ka valala vanu.

Levhi 25:18

Londetani sileleto sangu, mi vekisa silayelo sangu, mi txi si xayisa ngu kuthemba, kasiku mi na hanya mi di tsani amu ditikoni.

Levhi 25:19

Ditiko di na humisa mihando ya dona, nanu mi na va ni sakudya sasingi, mi txi hanya ka dona ditikodo, ngu kudikha.

2 Makronika 20:30

Se wukoma wa Josafati wu to mana kuthutha, Txizimu txakwe txi to mninga kuhumula ngu madhawa otshe.

Masalmo 144:14

Tihomu tathu ti na have kwati, ti txi ena. Mikhokhola yathu kha ya dolwa, kha ku nga ni kuyiswa kupayulwani, kha ku nga ni kudila maphangoni kwathu.

Isaya 35:8

Se, ahale ku nava ni nzila ya lisima, nzila yi yi no dhanwa ti to i Nzila yo Sawuleka; m'bihi kha na mbi tsimbila ngu yona, aniko yi na lumba vathu va Txizimu; ava va no tsimbila ngu yona, hambi siphukuphuku kha si na mbi timela.

Ezekhiyele 34:27

Se mindonga ya txitinga yi na ninga mihando ya yona, ni mafu ma na humisa sasiphya, ti nava ti di tsani ditikoni ka tona; se va na tiziva taku ani ngani Mkoma, mbimo yile ni no funya tindonga ta dikange da tona, ni txi ti txhatxhisa manzani ka vale va nga ti ti thuma kuranda ngu tona.

Hoseya 2:20

Se ni na kuteka ngu kuthembeka, kambe u na ziva Mkoma.