Levhi 26:32 - Bhiblia Yo Sawuleka

³² Ni na haxulela ditiko danu, kasiku valala vanu, avale va nota zumba ka dona, va txi ta dhuka ve xamala, masoni ka dona. Ni na mi hangalasa hagari ka mifumo.

Levhi 26:32 Referans Kwoze

Jeremiya 9:11

Ni na maha ngu Jerusalema mimumbu ya marigwi, dizumbo da maxolwa; madhoropa a ka Judha ni na ma maha marumbi, ku si vi ni m'thu.

Jeremiya 25:11

Dotshe diya ditiko di na va marumbi ni txidiwukiso; ni matiko awa, ma na thumela mfumeli wa Bhabhilona, mndani ka mtxhanu wa magumi ni magumi mambidi a malembe.

Jeremiya 19:8

Ni na maha didhoropa diya diva txidiwukiso ni txiruko; ni wihi a no pinda ngu kona, a na diwuka aha koza e veta mloti ngu kuxamala, ngu mhaka ya otshe makhombo eyo.

Jeremiya 18:16

Eko va maha ti to ditiko dawe diva txixamaliso, ni txiruko ngu ha ku si gwitiko. Ti taku ni wuhi a pindako ngu kona e xamala, e zinginisa msungo wakwe.

Ezekhiyele 5:15

Se awule wa txisekiso ni wa txibwebwe, va na va vagondisi ni txixamaliso ka matiko ale ma nga kurandela, mbimo yile ni no kulamula ngu kuhenya ni txiviti, ngu sitsayiso sa txiviti.

Jeremiya 25:18

I Jerusalema ni madhoropa a ka Judha, ni vafumeli va kona ni tinduna tawe, ti taku si txi maha marumbi, ni txidiwukiso, ni txiruko, nga ti ma ku ngu tona nyamsi.

1 Vafumeli 9:8

Se nyumba yiya yo guletwa ngutu, ni wuhi wu a no pinda ngu hawa, a na xamala, ni kuveta mloti, a na khene: Kasi Mkoma a mahisa tiya ka diya ditiko ni ka yiya nyumba ngu txani kani?

Dhewuteronome 28:37

U na va u di txidiwukiso, ni txisekiso, ni txiruko, hagari ka vathu votshe vava, Mkoma a no va a di ku yisile kwawe.

Luka 21:20

Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi.

Habhakuki 3:17

Hambi keto, hambi mkuwu wu si nzi kuhuma siluva, hambi ku si maneki mihando amu ka mu uvha, mihando ya muolivha yi nga woneke, ni tithembwe ti nga humise sakudya, txi bala txa tinvuta txi na fuviswe, ni sibalani ku nga maneke tihomu ta mikati.

Dhaniyeli 9:18

Awe Txizimu txangu, namisa tinzeve tako u engisa; tula maso ako u wona marumbi athu, ni didhoropa di di dhanwako ngu ditina dako, nguko kha hi ya tisa kudila kwathu masoni kwako, ngu kululama kwathu, kambe ngu mhaka ya wumbilu wako wo tala.

Dhaniyeli 9:2

Ka dilembe do khata da kufuma kwakwe, ani Dhaniyeli, ni to pfisisa ngu mu ka mabhuku, ti taku mtengo wa malembe ale Mkoma a nga khene ka mprofeti Jeremiya, Jerusalema ku na xaselwa mndani ka mtxhanu wa magumi ni mambidi a malembe.

Sidilo 5:18

Nguko mmango wa Siyoni wu xasetwe, vanyapwe va tsimbila-tsimbila kona.

Sidilo 4:12

Vafumeli va hawa mafuni, hambi i di vaaki va ona otshe kha va kholwa ti to valala va nga thuka va di wulete sikenini ka Jerusalema.

Jeremiya 44:22

Mkoma a ti sa dingana kuxaniswa mbimo yayingi ngu wubihi wa mithumo yanu, sinyenyeko si mi nga si maha; ngu toneto ditiko danu di mahile txiwula, ni txixamaliso, ni txiruko, ku si na vo zumba, nga ti ku wonekisako tona nyamsi.

Jeremiya 44:2

A womba tiya Mkoma wa Mabutho a Tiyimbi, Txizimu txa Israyeli: Anu mi woni wotshe wubihi wu ni nga wu maha txitimwi ka Jerusalema, ni txitimwi ka otshe madhoropa a ka Judha, wona ti taku ona nziwula, kha ku nga ni wo zumba ka ona;

Jeremiya 25:38

Ene a humile m'dhutini kwakwe nga txingonyamwana, nguko ditiko dawe di mahile dirumbi, ngu mhaka ya kuthisa ka ditxhari da Mkoma, ni kutura ka kuhenya kwakwe.

Isaya 64:10

Madhoropa ako o sawuleka ma mahile txiwula; Siyoni a mahile txiwula, Jerusalema a xasetwe.

Isaya 24:1

Wonani taku Mkoma wa maha ti to mafu meva txiwula, kambe wa ma kona, wa hindula zumbelo ya ona, e hangalasa vaaki va ona.

Isaya 6:11

Sekoko ani ni to khani: Kala yihi mbimo kani Mkoma? A to xamula a txi khene: Kala kuza madhoropa me maha marumbi, kupwateka ni vaaki, ni tinyumba ti si nga ni vathu, ni ditiko dotshe di maha dirumbi.

Isaya 5:9

Mkoma wa Mabutho a Tiyimbi, a to khene tinzeveni kwangu: Ngu ditshuri tinyumba tatingi ti na maha marumbi, tinyumba ta hombe, totshura ti na pwata vathu.

Isaya 5:6

Thembwe yi na maha txiwula, kha yi na mbi sakatwa, hambi kudimwa; kambe ku na mila txipopo ni mipa; ni na leleta marefu ti to ma si nisi nzuma txitimwi ka yona.

Jeremiya 12:11

Va di onhile, da dila kwangu nguko di mahisilwe dirumbi; ditiko dotshe di mahile dirumbi! Nguko kha ku na m'thu a di khatalelako.

Jeremiya 33:10

Mkoma a khene: Ka wukhalo wuwa (anu mi ku khanu njiwula, kha ku nga ni m'thu hambi txihari), ni madhoropani ka Judha, ni magondoni ka Jerusalema, aawa ma nga onhetelwa, ati to ku si maneki ni m'thu emo.