Levhi 26:30 - Bhiblia Yo Sawuleka

³⁰ Ni na haxulela makhalo anu o guleka, ni txi fayetela sithombe sanu sa ditambo, se ni na tshotsha sirumbi sanu txitimwi ka sirumbi sa sithombe sa sizimu sanu; moya wangu wu na karala ngu nganu.

Levhi 26:30 Referans Kwoze

2 Vafumeli 23:20

A to dayela votshe vaphaxeli va siluvelo, va nga ti ti ho koneho, txitimwi ka siluvelo, se a to hisa marambu a vathu txitimwi ka sona; ngu magwito, a to wuya Jerusalema.

Isaya 27:9

Ngu mhaka yeto, txi na thaveka txionho txa Jakobe, se awuwa wu na va m'hando wotshe wa kuva ku di thavisilwe txionho txakwe; mbimo yi a no maha ti to, otshe marigwi a ha txiluveloni, kufana ni marigwi a dibumba, ma nga khundumuselwa, tiphande ni sithombe sa ditambo, kha si na mbi ema

Ezekhiyele 6:13

Sekoko mi na tiziva taku ani ngani Mkoma, mbimo yile sirumbi sawe si no maneka hagari ka sithombe sawe, madhawani ka siluvelo sawe, ni ka sotshe simangwana so guleka, kotshe titshokani ka mimango, ni hahatshi ka yotshe mindonga yo nakana, ni hahatshi ka mikusu, ka wukhalo wule va nga ti ti ningela mafura o bhumula, ka sotshe sithombe sawe.

Jeremiya 14:19

Ina u mlekete magwito Judha kani? Mwendo u ngava u di swirekile mbiluni ngu Siyoni kani? Ngu kutxani u nga hi pekisa ti to hi si sikoti ni kuthumwa kani? Hi ti verete kuthutha, aniko wunene kha wa woneka; Hi verete mbimo yo thumwa, na kuve kuthava kuho!

Masalmo 89:38

Hambi keto, awe Mkoma, u henyete msawulwa wako; u karate ngu ngene u txi mtsukula.

2 Makronika 31:1

Msana ka kuva va di gwitile kumaha Pasika, votshe va ka Israyeli va to khukha veya ka madhoropa a va ka Judha va txiya fayetela marigwi awe a wukhongeli va txi wilela ni tiphande tawe, va khundumusela ni makhalo awe o guleka ni siluvelo ka ditiko dotshe da va ka Judha ni da va ka Bhenjamini, ni da va ka Efrayime ni da va ka Manasi, kala kuza va txi heta sotshe. Se votshe vanana va ka Israyeli va ta tshumelela madhoropani kwawe.

2 Makronika 23:17

Msana keto, votshe vathu va to wulela nyumbani ka Bhahali, ve yi khundumusa, va to fayetela siluvelo sakwe ni sithombe sakwe, se Matani mphaxeli wa Bhahali va to m'dayela masoni ka siluvelo.

2 Vafumeli 23:16

Se Josiya a to tshembera e wona mathitha ale ma ngadi hammangoni hale, a to rumisa taku kuthaviswa marambu mathithani, e ma hisa txitimwi ka txiluvelo txile, ngu kumaha keto, a txi nyenyezisile, madingano ni dipswi da Mkoma, di nga huwelelwa ngu m'thu wa Txizimu, mbimo yile a nga huwelela mapswi awa.

2 Vafumeli 23:8

Se a to dhana votshe vaphaxeli va madhoropa a ka Judha, e nyamisela siluvelo si va nga txi hisa ka sona dibaselo, kukhukhela Gebha kala Bhersebha, se a to khundumusa siluvelo sa matimba, si nga ti ti maneka ha txikeni ka ditimba da Joxuwa, mthangeli wa didhoropa, si nga ti ti maneka ka didhawa da txibhabha ka wule a nga ti ti wulela ngu ditimba da didhoropa.

1 Vafumeli 13:2

Se a to ruketela txiluvelo ngu dipswi da Mkoma, a txi khene: Awe txiluvelo! Awe txiluvelo! Mkoma a womba tiya: Wona ti to ku na velekwa dizambi ka nyumba ya Dhavhidha, ditina dakwe i nava Josiya, awule a no ningela kwako vaphaxeli va wukholo ko guleka avale va hisako dibaselo, ni marambu a vathu ma hiswa txitimwi kwako.

Levhi 26:15

ni kungako mi txi eyisa milayo yangu, moya wanu wu txi lamba sileleto sangu, miza mi txi hoka aha ko mbi xayisa mithetho yangu, mi funya txitumelelano txangu,

Levhi 26:11

Ni na aka nyumba yangu hagari kwanu, ni moya wangu kha wu na mbi hambana ni nanu.

Levhi 20:23

Mi nga londeteni mikhuwo ya vathu va ditiko edo ni no ya va tovela masoni kwanu, nguko va mahetete totshe to biha; ngu toneto va ni xamukisile.

Genesisi 19:13

nguko hi lava kuhaxula wukhalo wuwa, huwa yi yi nga kwangula yo mangalela wukhalo wuwa masoni ka Mkoma, njahombe, se ene Mkoma a hi rumile ku ta wu fuvisa.”

Dhewuteronome 32:19

Mkoma a ti woni toneto, e henya, a txi xamukiswa ngu vanana vakwe vavafana ni vamahorana;

1 Vafumeli 13:32

nguko ngu ditshuri ku na tatiseka ati ti nga wombwa ngu dipswi da Mkoma di txi ruketela txiluvelo txa Bheteli, kumweko ni totshe tinyumba ta makhalo o guleka ti ku madhoropani ka Samariya.

Masalmo 106:40

Ngu toneto, Mkoma a to henyela vathu vakwe, e tsukula vathu va i kuthomba yakwe.

Ezekhiyele 43:7

a txi ta khene kwangu: Awe mwanana wa m'thu, awuwa mbukhalo wangu wa wukoma, aho mikondo yangu yi kandako kona, ni na zumba kona hagari ka vanana va ka Israyeli kala kupinduka; kambe va nyumba ya ka Israyeli, kha va na mbi ngadi ve nyenyezisa ditina dangu do sawuleka, vona, hambi vafumeli vawe, ni wugelegele wawe, ni sirumbi sa vafumeli vawe, siluveloni kwawe.

Amosi 6:8

A xambanyile Mkoma Txizimu, ngu dihika dakwe, Mkoma, Txizimu txa Mabutho a Tiyimbi, a khene: Na nyenya kutikulisa ka va ka Jakobe, ni venga ni tinyumba tawe ta wukoma; na ningela didhoropa ni sotshe si si ku ka dona.

Amosi 7:9

Kambe makhalo o guleka a Israyeli ma na hoxotwa ni makhalo a vakhongeli va Israyeli ma na loviselwa magwito. Se na wukela nyumba ya ka Jerobhowamu ngu ditxhari.

Jeremiya 16:18

Se kukhata ni na va tshumetela kumbidi wubihi wawe ni sionho sawe, nguko va nyenyezisile ditiko dangu ngu sirumbi sa manyala awe, kambe ngu sinyenyeko sawe va tatile thomba yangu.”

Ezekhiyele 16:39

Se ni na kuningela manzani kwawe, va na wisa nzuma yako, kambe va na onhetela makhalo ako o guleka, va txi kuambula syambalo sako, ve teka singwavila sako sa ku ti tshurisela ngu sona, va na kusiya u di tximbwiri u sa fenengela txilo.

Hoseya 10:2

Timbilu tawe ti abanekile; ngu kumaha keto, va na va ni mnandu; a na wilela siluvelo sawe, e khundumusa ni sifananiso sawe so wumbwa.