Levhi 25:9 - Bhiblia Yo Sawuleka

⁹ Sekoko ka ditshiku da digumi ka mtxhima wa wutxhanu ni yimbidi; i ku ditshiku da hombe da kudivalelwa ka sionho, u na ruma vahuweleli va txi veta mipundu ditikoni kotshe.

Levhi 25:9 Referans Kwoze

Levhi 23:24

Gela vanana va ka Israyeli u txi khawe: Ditshiku do khata da mtxima wa wutxhanu ni yimbidi, ku nava i di ditshiku do humula: Mi fanete kuramba msengeletano wo sawuleka, mi maha txialakanyiso txo huwelela, ngu kuveta mpundu.

Levhi 23:27

Ka ditshiku da wugumi, da mtxima wa wutxhanu ni yimbidi, ditshiku da hombe do divalela sionho: Mi fanete kuramba msengeletano wo sawuleka, mi txi maha mithumo ya kukomba kupandiseka ngu sionho ni kumaha mningelo wa mhamba ya Mkoma.

1 Vatesalonika 1:8

Kha ditshuri, Dipswi da Txizimu, di di nga engiswa di txi khukhela kwanu, kha da engiswa dwe ngu Vamakedhoniya ni va Akaya, aniko likholo lanu ka Txizimu li tshanganisile otshe makhalo; se ngu kota yeto, kha kuswi ku txi laveka ti to hi ngadi hi txi womba-womba ngu mhakeyo.

Varoma 15:19

ngu mtamo wa sikombiso ni sidiwukiso, ni mtamo wa Moya. Ngu toneto, ni txhumayete Evhangeli ya Kristu ka otshe madhawa, kukhukhela Jerusalema kala kuya hoka Iliriya;

Varoma 10:18

Se na wotisa: Ina kha va tiengisa kani? Kha ditshuri va ti engisile, nguko ti bhatwe taku: “Kutxhumayela kwawe ku pfate ka dotshe ditiko, ni mapswi awe ma hokile magemeta-mitshi ka mafu.”

Masalmo 89:15

Va katekile vathu vale va zivako ku kudhumisa, Mkoma, avale va hanyako kuwonekelani ka khohe yako.

Mitengo 36:4

Kambe ku txi hoka Dilembe da M'buso wa Hombe wa vanana va ka Israyeli, thomba yawe yi engetelwa ka thomba ya lihunzu la vale va no tekana navo; ngu mamahelo awa thomba yawe yi na thaviswa ka thomba ya vatate vathu.

Mitengo 10:10

Atiya, ti maheni hambi ka masiku a mibuso yanu ya kutsaka, kukhatani ka mtxima mi na veta mipundu, mbimo yi mi ningelako miphaxo yanu ya kuhiswa ni ya kubonga, kasi ku Txizimu txi mi alakanya. Nguko ngani Mkoma, Txizimu txanu.”

Levhi 27:24

Ka dilembe da kutsaka ka hombe, thembwe yi na tshumela yi txi lumba awule a nga yi xavisa, nguko thembwe i thomba yakwe.

Levhi 27:17

Ngako a di mahile mningelo wa thembwe, kukhukhela ka dilembe da kutsaka ka hombe, mtengo wa kona wa male ngu wonewo yi no va ni fanelo yo tekiswa ngu wona.

Levhi 16:30

Nguko, ka donedo ditshiku, ku na mahwa mhamba yo divalela sionho sanu, kasi mi txi basiswa, ka sotshe sionho sanu, masoni ka Mkoma.

Levhi 16:20

Msana ka kuva Aroni a di mahile mphaxo wa kubasisa wukhalo wo sawuleka, ni ditenda da msengeletano, ni txiluvelo, sekoko a na tisa mabhongwe wo hanya.

Levhi 25:8

U na bala mtxhanu wa mavhiki ni mambidi a malembe, i ku mtxhanu wa malembe ni mambidi a ku wuyeletwa mtxhanu ni kumbidi, se ku ma pata otshe ma dinganako mtengo wa mune wa magumi ni mtxhanu ni mune wa malembe.

Joxuwa 6:4

Se mtxhanu wa vaphaxeli ni vambidi va na teka mtxhanu wa titshodi ni timbidi, ta titxheho ta tihamba, va txi thangela masoni ka dibhokiso, se ka ditshiku da wutxhanu ni mambidi, mi na tenderuka didhoropa mtxhanu wa sikhati ni simbidi; se vaphaxeli va na veta titshodi.

Isaya 27:13

Se ku na maheka ka ditshiku dile, taku ku na vetwa mpundu wa hombe, se vale va nga ti mwalate ditikoni ka Asiriya, ni vale va nga tsuliswa ditikoni ka Egipta, va na tshumela ve wuya, ve ta khozela Mkoma, mmangoni ko sawuleka, kona Jerusalema.

Levhi 16:29

Awuwa mlayo ngu wu anu mi no wu vekisa ka yotshe mbimo. Ka ditshiku da wugumi, ka mtxima wa wutxhanu ni yimbidi, mi fanete mi txi va ni masaluko o ti dilela sionho sanu, anu ni valuveli vanu, avale va hanyako kumweko ni nanu, kambe mi nga nõleni mthumo ni wawumwewo.

Masalmo 89:16

Otshe masiku va tsaka ngu ngawe va nengela ngu mhaka ya wunene wako.