Ngako mi txi elula tithembweni kwanu, mi nga funyeleni kala magwito ka thembwe, kambe mi nga yeni mi txi ya roletela asi si nga saletela, msana ka kuelul; mi na siyela sisiwana ni vapfhumba va va nga mi wuyela. Ani ngani Mkoma, Txizimu txanu!
Gela vanana va ka Israyeli u txi khawe: Ditshiku do khata da mtxima wa wutxhanu ni yimbidi, ku nava i di ditshiku do humula: Mi fanete kuramba msengeletano wo sawuleka, mi maha txialakanyiso txo huwelela, ngu kuveta mpundu.
Ngu kufana nito, mi na va ni kusengeletana ko sawuleka, ka mtxima wa wutxhanu ni yimbidi, ngu ditshiku do khata ka mtxima; mi nga maheni mthumo wo nemela ni wawumwewo; di na va ditshiku da kutsaka ka hombe kwanu.
mi humisa mningelo ka Mkoma, mphaxo wo hiswa, mwendo mhamba yo tatisa txixambanyo, mwendo ku ngava mningelo wa kuranda kwanu, ngu mixuvo yo lava kuningela ka Mkoma mningelo wo bhumula, ngu tinvuta, mwendo tihomu ta mikati;
