Levhi 22:32 - Bhiblia Yo Sawuleka

³² Mi nga nyenyeziseni ditina dangu do sawuleka; kasiku ani ni txi dhumiswa hagari ka vanana va ka Israyeli: Ani ngani Mkoma, ni mahako ti to anu mi va vathu vo sawuleka.

Levhi 22:32 Referans Kwoze

Luka 11:2

Jesu a to va xamula a txi khene: “Mbimo yi mi khongelako, indani khanu: ‘Tata, ditina dako di na sawulwe, wu nate kwathu mfumo wako,

Levhi 18:21

U nga ningele ni mmweyo wa vanana vako, va txi mahwa mphaxo ka Moloke; nguko ngu nyenyezisa ditina da Txizimu txako! Ani ngani Mkoma!

Matewu 6:9

“Ngu konaho, anu mi na khongelisa tiya: Tata wathu, u ku nzumani, ditina dako di na sawulwe,

Levhi 22:2

Gela Aroni ni vanana vakwe, ti to ve tsule kule ni simaha so sawuleka sa vanana va ka Israyeli, ava va ni sawulekisako, kasiku va si nyenyezisi ditina dangu do sawuleka: Ani ngani Mkoma!

Levhi 10:3

Se Mosi a to womba ka Aroni a txi khene: Ngu tona tiya Mkoma a nga womba, a txi khene: Ka vale va tshuketako hafuhi kwangu ni na va komba ti to ani ni sawulekile ni ka vathu votshe ni na komba mtamo wangu! Aroni a to malala a so dwe.

1 Vakorinto 1:2

ka Dibanza da Txizimu, adi di ku Korinto, ka va va nga sawulekiswa ngu Kristu Jesu, ava va nga dhanelwa ku ta maha vasawuleki kumweko ni votshe va va khongelako, hani ni hani, ngu ditina da Mkoma Jesu Kristu, i ku Mkoma wawe ni wathu.

Johani 17:17

Va sawulekise ngu ditshuri. Dipswi dako ngu dona ditshuri.

Isaya 5:16

Aniko Mkoma wa Mabutho a Tiyimbi a na guletwa ngu kululama, se Txizimu txo Sawuleka, txi na sawulekiswa ngu wululamo.

Levhi 21:15

kasiku asi nyenyezisi liveleko lakwe, hagari ka vathu va ka kwawe. Ani ngani Mkoma ni nga msawula.

Levhi 21:8

Ngu toneto, u fanete kuziva ti to i m'thu wo sawuleka, nguko mthumo wakwe ngu kumaha mningelo wa sakudya ka Mkoma. Ziva taku mbwo sawuleka, nguko ani ni sawulekile, ani ni Mkoma, ni wo sawuleka, ani ni nga mi sawula, kasiku mi txi maha vo sawuleka.

Levhi 20:8

Vekisani milayo yangu mi txi yi xayisa. Ani ngani Mkoma ni mi mahako vathu vangu vavanene.

Levhi 22:16

Ngako vaphaxeli va txi tumetisa vamwani vathu va txidya sa mningelo wa mhamba, vona vathuvo va na rwala txionho txi txi ku ni fanelo yo dihelwa: Ani ngani Mkoma, ni sawulekisako.

Levhi 22:31

Vekisani sirumo sangu mi si xayisa: Ani ngani Mkoma!

Levhi 22:33

Nguko ani ni mi humisile ditikoni ka Egipta, kasiku ni va ni di Txizimu txanu. Ani ngani Mkoma!

Isaya 8:13

Sawulekisani Mkoma wa Mabutho a Tiyimbi, nguko ngene msawuleki wanu; ngene a thisako kwanu, ngene a dhukisako kwanu.